ജുവനൈൽ പുനരധിവാസ രംഗത്ത് കുടുംബങ്ങളുടെ പങ്ക് ശക്തിപ്പെടുത്തുന്നതിനായി ‘ഫാമിലി ഡേ’ എന്ന പുതിയ പദ്ധതിയുമായി കമ്മ്യൂണിറ്റി ഡെവലപ്മെൻറ് അതോറിറ്റി രംഗത്തെത്തി. സൺ സെന്റർ ഫോർ കെയർ ആൻഡ് റിഹാബിലിറ്റേഷനിലാണ് പദ്ധതി നടപ്പാക്കുന്നത്. കുടുംബബന്ധം മെച്ചപ്പെടുത്തുന്നതിലൂടെ കുട്ടികളെ സമൂഹത്തിലേക്ക് തിരിച്ചുകൊണ്ടുവരുന്നതാണ് പദ്ധതിയുടെ പ്രധാന ലക്ഷ്യം. കുടുംബസാന്നിധ്യം ഒരു ചികിത്സാപരമായ ഘടകമായി ഉപയോഗിച്ച് പുനരധിവാസം ഫലപ്രദമാക്കാനാണ് ശ്രമം.
യു.എ.ഇയുടെ ‘Year of the Family 2026’ ലക്ഷ്യങ്ങളോട് അനുബന്ധിച്ചാണ് പദ്ധതി രൂപകൽപ്പന ചെയ്തിരിക്കുന്നത്. കുടുംബവും കുട്ടിയും തമ്മിലുള്ള വിശ്വാസവും ആശയവിനിമയവും പുനഃസ്ഥാപിക്കാൻ ഇത് സഹായിക്കുമെന്ന് അധികൃതർ വ്യക്തമാക്കി.
പദ്ധതിയുടെ ഭാഗമായി:

-സെന്ററിൽ പ്രവേശിച്ച ഉടൻ കുടുംബസംഗമം
-കൗൺസിലിംഗ് സെഷനുകൾ
-കല, കായിക പ്രവർത്തനങ്ങൾ ഉൾപ്പെടുന്ന കുടുംബസമയം
-‘Message to My Family’ പോലുള്ള ആശയവിനിമയ പരിപാടികൾ

എന്നിവ ഉൾപ്പെടുത്തിയിട്ടുണ്ട്.
കുട്ടികൾ മോചിതരാകുന്നതിന് മുൻപ് കുടുംബങ്ങളെ സജ്ജമാക്കുന്നതിനും തുടർന്ന് വീടുകളിലെ സന്ദർശനങ്ങളിലൂടെ പിന്തുണ നൽകുന്നതിനും പദ്ധതി സഹായകരമാകും. ഇതിലൂടെ വീണ്ടും കുറ്റകൃത്യങ്ങളിലേക്ക് മടങ്ങുന്ന പ്രവണത കുറയ്ക്കാനും സാമൂഹിക പുനരധിവാസം ശക്തിപ്പെടുത്താനും ലക്ഷ്യമിടുന്നു. ഓരോ കുടുംബസംഗമവും ശിക്ഷാപരമല്ലാതെ, വിദഗ്ധരുടെ നിർദേശപ്രകാരം കുട്ടിയുടെ മാനസിക വളർച്ചക്കും സമൂഹത്തിലേക്കുള്ള മടങ്ങിവരവിനും സഹായിക്കുന്ന രീതിയിലാണ് ക്രമീകരിച്ചിരിക്കുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t