സാമ്പത്തിക അനിശ്ചിതത്വം കടുത്തതോടെ യുഎഇയിലെ ബിസിനസ് ലോകത്ത് പ്രയാസകരമായ തീരുമാനങ്ങളാണ് ഉയർന്നുവരുന്നത്. സ്ഥാപനങ്ങളുടെ നിലനിൽപ്പ് ഉറപ്പാക്കാൻ ജീവനക്കാരെ പിരിച്ചുവിടേണ്ടി വരുന്ന സാഹചര്യങ്ങൾ പല കമ്പനികളെയും മാനസികമായി പോലും ബാധിക്കുന്നതായി സിഇഒമാർ തുറന്നു പറയുന്നു. ആരെ തുടരാൻ അനുവദിക്കണം, ആരെ ഒഴിവാക്കണം എന്നത് കണക്കുകൂട്ടലുകൾക്ക് അപ്പുറമുള്ള വലിയ വെല്ലുവിളിയായി മാറിയിരിക്കുകയാണ്. ടിഷ് ടാഷ് ഗ്രൂപ്പിന്റെ സ്ഥാപകയും സിഇഒയുമായ നതാഷ ഹാതെറാൾ അഭിപ്രായപ്പെടുന്നത്, ഓരോ പിരിച്ചുവിടലും വെറും ബിസിനസ് തീരുമാനമല്ലെന്നതാണ്. “കമ്പനിയുടെ നിലനിൽപ്പ് പ്രധാനമാണെങ്കിലും, അതിനൊപ്പം ഓരോ ജീവനക്കാരന്റെയും ജീവിതത്തെ അത് ബാധിക്കുന്നുവെന്ന ബോധം വലിയ മാനസികഭാരമാണ്,” അവർ വ്യക്തമാക്കി. ഓരോ ജീവനക്കാരനും ഒരു സംഖ്യയല്ല, വ്യക്തിത്വമുള്ള ആളുകളാണെന്നും അവർ ചൂണ്ടിക്കാട്ടി.

മുൻപ് വളർച്ചക്കും വ്യാപനത്തിനും മുൻഗണന നൽകിയിരുന്ന സ്ഥാപനങ്ങൾ ഇപ്പോൾ നിലനിൽപ്പിനും സാമ്പത്തിക സ്ഥിരതയ്ക്കുമാണ് കൂടുതൽ ശ്രദ്ധ കേന്ദ്രീകരിക്കുന്നത്. സാമ്പത്തിക വിദഗ്ധൻ അൻവർ റുഫായി പറയുന്നത്, നിലവിലെ സാഹചര്യത്തിൽ പല കമ്പനികൾക്കും ആറുമാസത്തേക്കെങ്കിലും പണമൊഴുക്ക് ഉറപ്പാക്കുക തന്നെ വലിയ വെല്ലുവിളിയായിരിക്കുകയാണെന്നാണ്. അതിനാൽ ദീർഘകാല ലക്ഷ്യങ്ങളെ താൽക്കാലികമായി മാറ്റിനിർത്തി അടിയന്തര ആവശ്യങ്ങൾക്കനുസരിച്ച് തീരുമാനങ്ങൾ എടുക്കേണ്ടി വരുന്നു.

ഇത്തരം തീരുമാനങ്ങൾ ജീവനക്കാരുടെ മാനസികാവസ്ഥയെ ഗൗരവമായി ബാധിക്കാമെന്ന് കോർപ്പറേറ്റ് വെൽനസ് വിദഗ്ധൻ മോഹനാദ് അൽ തായർ ചൂണ്ടിക്കാട്ടുന്നു. വ്യക്തമായ ആശയവിനിമയം വഴിയാണ് സ്ഥാപനത്തിനുള്ളിലെ വിശ്വാസം നിലനിർത്താൻ കഴിയുക എന്നും അദ്ദേഹം പറയുന്നു. പ്രതിസന്ധികൾക്ക് ശേഷം ബിസിനസുകൾ പഴയ രീതിയിലേക്ക് മടങ്ങുകയല്ല, മറിച്ച് കൂടുതൽ ശക്തമായ ഘടനയിലേക്ക് പുനർനിർമ്മിക്കപ്പെടേണ്ടതാണെന്ന് നതാഷ ഹാതെറാൾ അഭിപ്രായപ്പെടുന്നു. നിലവിലെ സാഹചര്യങ്ങളിൽ വ്യക്തതയും സ്ഥിരതയും ഉറപ്പാക്കുന്നതാണ് മുന്നോട്ടുള്ള വഴിയെന്ന് വിദഗ്ധർ വിലയിരുത്തുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t