യുഎഇയിലെ പ്രമുഖ ബാങ്കായ എമിറേറ്റ്സ് എൻബിഡി ഉപഭോക്താക്കൾക്കായുള്ള സാമ്പത്തിക സഹായ പദ്ധതികൾ കൂടുതൽ വ്യാപിപ്പിച്ചു. പ്രാദേശിക അനിശ്ചിതത്വങ്ങൾക്കിടയിൽ സാമ്പത്തിക സ്ഥിരത ഉറപ്പാക്കാൻ ഫീസ് ഇളവുകളും പൂജ്യം ശതമാനം പലിശയുള്ള പദ്ധതികളും ഉൾപ്പെടുന്ന ആനുകൂല്യങ്ങളാണ് ബാങ്ക് പ്രഖ്യാപിച്ചത്. പുതിയ തീരുമാനപ്രകാരം, വായ്പാ തിരിച്ചടവ് മാറ്റിവയ്ക്കുന്നതിനുള്ള ഫീസ് ജൂൺ 30 വരെ ഒഴിവാക്കും. ക്രെഡിറ്റ് കാർഡ് ബാലൻസ് ട്രാൻസ്ഫറുകൾക്ക് സീറോ ശതമാനം പലിശയും, ഇൻസ്റ്റാൾമെന്റ് പദ്ധതികളിൽ പ്രോസസ്സിംഗ് ഫീസില്ലാത്ത സൗകര്യവും ജൂൺ മധ്യം വരെ ലഭ്യമാകും.
അതേസമയം, ഉപഭോക്താക്കൾക്ക് കൂടുതൽ സൗകര്യം നൽകുന്നതിനായി എടിഎം പിന്വലിക്കൽ പരിധിയും ഉയർത്തിയിട്ടുണ്ട്. ഏപ്രിൽ 20 മുതൽ ജൂൺ 30 വരെ പ്രതിദിന പരിധിയിൽ 5,000 ദിർഹം വരെ വർധനവുണ്ടാകും. യുഎഇയിലും ജിസിസി രാജ്യങ്ങളിലുമുള്ള എടിഎമ്മുകളിൽ നിന്ന് സൗജന്യ പിന്വലിക്കൽ, കേടായ ഡെബിറ്റ് കാർഡുകൾ സൗജന്യമായി മാറ്റിവാങ്ങൽ എന്നിവയും ഈ കാലയളവിൽ ലഭിക്കും.
ദുബൈ സർക്കാർ പ്രഖ്യാപിച്ച വൻ സാമ്പത്തിക പിന്തുണാ പദ്ധതിക്ക് പിന്നാലെയാണ് ബാങ്കിന്റെ നീക്കം. അബുദബി ഇസ് ലാമിക് ബാങ്ക് (ADIB), ഫസ്റ്റ് അബുദബി ബാങ്ക് (FAB) തുടങ്ങിയ മറ്റ് പ്രമുഖ ബാങ്കുകളും സമാനമായ സഹായ പദ്ധതികൾ നടപ്പിലാക്കിയിട്ടുണ്ട്. സെൻട്രൽ ബാങ്ക് ഓഫ് യുഎഇ പിന്തുണയും കരുതൽ നടപടികളും രാജ്യത്തെ ബാങ്കിംഗ് മേഖലയെ കൂടുതൽ ശക്തിപ്പെടുത്തുന്നുവെന്നാണ് വിലയിരുത്തൽ.
സാമ്പത്തിക സമ്മർദ്ദങ്ങൾ കുറയ്ക്കാനും ഉപഭോക്താക്കളുടെയും ബിസിനസ് മേഖലയുടെയും ആത്മവിശ്വാസം വർധിപ്പിക്കാനും ഇത്തരം നടപടികൾ സഹായകരമാകുമെന്ന് ബാങ്കിംഗ് വൃത്തങ്ങൾ ചൂണ്ടിക്കാട്ടുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
