അബുദാബി: മേഖലയിൽ വർദ്ധിച്ചുവരുന്ന വെല്ലുവിളികൾക്കിടയിൽ രാജ്യത്തിന്റെ സുരക്ഷയും പരമാധികാരവും സംരക്ഷിക്കാൻ ഉറച്ച നീക്കങ്ങളുമായി യുഎഇ. സിവിലിയൻ കേന്ദ്രങ്ങളെ ലക്ഷ്യമിട്ട് ഇറാൻ നടത്തിയ മിസൈൽ ആക്രമണങ്ങളെ യുഎഇയുടെ അത്യാധുനിക വ്യോമപ്രതിരോധ സംവിധാനം വിജയകരമായി പ്രതിരോധിച്ചു. ഇതിന് പിന്നാലെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനെ ഫോണിൽ വിളിച്ച അമേരിക്കൻ പ്രസിഡന്റ് ഡോണൾഡ് ട്രംപ് രാജ്യത്തിന് പൂർണ്ണ പിന്തുണ വാഗ്ദാനം ചെയ്തു. യുഎഇയുടെ സുരക്ഷയ്ക്കും സ്ഥിരതയ്ക്കും ഭീഷണിയാകുന്ന ഏത് നീക്കത്തെയും നേരിടാൻ അമേരിക്ക ഒപ്പമുണ്ടാകുമെന്ന് ട്രംപ് ഉറപ്പുനൽകി.

മിസൈൽ ഭീഷണിയെ ആകാശത്ത് തകർത്തു പെരുന്നാൾ ദിനമായ ഇന്ന് പുലർച്ചെ ദുബായ് ഉൾപ്പെടെയുള്ള നഗരങ്ങളിൽ വലിയ സ്ഫോടന ശബ്ദങ്ങൾ കേട്ടത് ജനങ്ങളിൽ പരിഭ്രാന്തിയുണ്ടാക്കിയിരുന്നു. എന്നാൽ, ശത്രുപക്ഷത്തുനിന്നുള്ള മിസൈൽ ഭീഷണികളെ യുഎഇയുടെ പ്രതിരോധ സംവിധാനം ആകാശത്തുവെച്ച് തന്നെ വെടിവെച്ചിട്ടതാണെന്ന് പ്രതിരോധ മന്ത്രാലയം സ്ഥിരീകരിച്ചു. രാജ്യത്തിന്റെ വ്യോമാതിർത്തിയും സിവിലിയന്മാരുടെ ജീവനും സുരക്ഷിതമാണെന്നും സാഹചര്യങ്ങൾ പൂർണ്ണമായും നിയന്ത്രണവിധേയമാണെന്നും അധികൃതർ അറിയിച്ചു. ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും സമൂഹമാധ്യമങ്ങളിലൂടെയുള്ള തെറ്റായ പ്രചാരണങ്ങളിൽ വീഴരുതെന്നും മന്ത്രാലയം കർശന നിർദ്ദേശം നൽകിയിട്ടുണ്ട്.

ഭീകരശൃംഖലയുടെ അന്ത്യം മിസൈൽ ആക്രമണങ്ങളെ പ്രതിരോധിക്കുന്നതിനൊപ്പം തന്നെ ആഭ്യന്തര സുരക്ഷ ഉറപ്പാക്കാനുള്ള നിർണ്ണായക നീക്കവും യുഎഇ നടത്തി. രാജ്യത്തിന്റെ സാമ്പത്തിക സുസ്ഥിരത തകർക്കാൻ ലക്ഷ്യമിട്ട് പ്രവർത്തിച്ചിരുന്ന വൻ ഭീകരശൃംഖലയെ യുഎഇ സ്റ്റേറ്റ് സെക്യൂരിറ്റി അപ്പാരറ്റസ് (SSA) തകർത്തു. ഇറാനും ഹിസ്ബുല്ലയുമായി നേരിട്ട് ബന്ധമുള്ള ഈ സംഘം സാധാരണ വാണിജ്യ സ്ഥാപനങ്ങളുടെ മറവിലാണ് പ്രവർത്തിച്ചിരുന്നത്. വിദേശ ശക്തികളുടെ സഹായത്തോടെ കള്ളപ്പണം വെളുപ്പിക്കാനും ആ തുക ഉപയോഗിച്ച് ഭീകരപ്രവർത്തനങ്ങൾക്ക് ഫണ്ട് നൽകാനുമായിരുന്നു ഇവരുടെ പദ്ധതി.

സാമ്പത്തിക അട്ടിമറി നീക്കം രാജ്യത്തിന്റെ സാമ്പത്തിക അടിത്തറയെ തകർക്കാനുള്ള ഗൂഢാലോചനയാണ് ഈ നീക്കത്തിലൂടെ പൊളിഞ്ഞത്. ബിസിനസ് ഗ്രൂപ്പുകളെന്ന വ്യാജേന വലിയൊരു ശൃംഖല തന്നെ ഇവർ കെട്ടിപ്പടുത്തിരുന്നു. പിടിയിലായവരിൽ നിന്ന് രാജ്യവിരുദ്ധ പ്രവർത്തനങ്ങളുടെ നിർണ്ണായക രേഖകൾ സുരക്ഷാ വിഭാഗം കണ്ടെടുത്തു. രാജ്യത്തിന്റെ സുരക്ഷയെ ബാധിക്കുന്ന ഒരു നീക്കവും അനുവദിക്കില്ലെന്നും പുറത്തുനിന്നുള്ള ഇടപെടലുകളെ ഉരുക്കുമുഷ്ടിയോടെ നേരിടുമെന്നും സ്റ്റേറ്റ് സെക്യൂരിറ്റി അപ്പാരറ്റസ് പ്രസ്താവനയിൽ വ്യക്തമാക്കി.

മേഖലയിൽ സംഘർഷാവസ്ഥ നിലനിൽക്കുമ്പോഴും ജനങ്ങളുടെ സുരക്ഷ ഉറപ്പാക്കാൻ സുരക്ഷാ ഏജൻസികൾ അതീവ ജാഗ്രതയിലാണ്. അമേരിക്കയുടെയും മറ്റ് സഖ്യകക്ഷികളുടെയും പിന്തുണയോടെ കൂടുതൽ കരുത്തുറ്റ പ്രതിരോധ നിര തീർക്കാനാണ് യുഎഇയുടെ തീരുമാനം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിലെ പ്രവാസി മലയാളിയുടെ അസ്വാഭാവിക മരണം: 23 ദിവസത്തെ കാത്തിരിപ്പിന് വിട, യാത്രാമൊഴി

ഷാർജയിൽ കഴിഞ്ഞ 18ന് മരിച്ച കാസർകോട് തെക്കേക്കര വണ്ണാത്തികടവ് അർജുൻ നിവാസിൽ വിജയചന്ദ്രൻ (50)യുടെ മൃതദേഹം ഇന്ന് നാട്ടിലെത്തിക്കുമെന്ന് ബന്ധുക്കൾ അറിയിച്ചു. അസ്വാഭാവിക മരണമായതിനാൽ ആവശ്യമായ നിയമനടപടികളും സാങ്കേതിക നടപടിക്രമങ്ങളും പൂർത്തിയാക്കേണ്ടി വന്നതും ഗൾഫ് മേഖലയിലെ നിലവിലെ സാഹചര്യം മൂലമുള്ള അനിശ്ചിതത്വവും കാരണം മൃതദേഹം എപ്പോൾ നാട്ടിലെത്തുമെന്ന ആശങ്കയിൽ ആയിരുന്നു കുടുംബാംഗങ്ങളും നാട്ടുകാരും. മൃതദേഹം വിട്ടുകിട്ടുന്നതിനായി യുഎഇയിലെ പാലക്കുന്ന് പ്രവാസി കൂട്ടായ്മകൾ ഇടപെട്ടിരുന്നു. അവരുടെ ശ്രമഫലമായി ഇന്ന് പുലർച്ചെ കോഴിക്കോട് അന്താരാഷ്ട്ര വിമാനത്താവളത്തിൽ മൃതദേഹം എത്തുമെന്ന വിവരം കഴിഞ്ഞ രാത്രി വീട്ടുകാർക്ക് ലഭിച്ചതായി ബന്ധുക്കൾ അറിയിച്ചു.

മൃതദേഹം സമയത്ത് എത്തിച്ചാൽ തെക്കേക്കരയിലെ വീട്ടിൽ മരണാനന്തര ചടങ്ങുകൾ നടത്തിയ ശേഷം ഉച്ചയ്ക്ക് 2.30ന് കാപ്പിൽ സമുദായ ശ്മശാനത്തിൽ സംസ്കാരം നടത്തുമെന്ന് തെക്കേക്കര പ്രാദേശിക സമിതി പ്രവർത്തകർ അറിയിച്ചു. യുഎഇയിൽ കഴിഞ്ഞ 15 വർഷത്തിലേറെയായി ഒരു പലചരക്ക് കടയിൽ ജോലി ചെയ്തുവരികയായിരുന്നു വിജയചന്ദ്രൻ. അവധി കഴിഞ്ഞ് എട്ട് മാസം മുൻപാണ് അദ്ദേഹം വീണ്ടും ഷാർജയിലേക്ക് തിരിച്ചുപോയത്. പരേതരായ പാലാട്ട് നാരായണന്റെയും കുണ്ടിൽ കുഞ്ഞമ്മയുടെയും മകനാണ്. ഭാര്യ: ശ്രീജ (മുക്കുന്നോത്ത്). മക്കൾ: അർജുൻ വിജയ് (ബാര ഗവ. ഹൈസ്കൂൾ, പത്താം ക്ലാസ് വിദ്യാർഥി), ആരുഷ് (ഉദുമ പടിഞ്ഞാർ അംബിക എഎൽപി സ്കൂൾ, രണ്ടാം ക്ലാസ്). സഹോദരങ്ങൾ: ചന്ദ്രൻ കുണ്ടിൽ, ചന്ദ്രിക, രോഹിണി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt