മേഖലയിലെ നിലവിലെ അസാധാരണ സാഹചര്യങ്ങളിലും യുഎഇയിലെ വിപണികളിൽ ഭക്ഷ്യവസ്തുക്കളുടെ ലഭ്യതയും വില നിലവാരവും സുരക്ഷിതമാണെന്ന് സാമ്പത്തിക മന്ത്രാലയം ഉറപ്പുനൽകി. റമസാൻ കാലയളവിൽ വിപണിയിൽ അനാവശ്യമായ വിലക്കയറ്റം ഉണ്ടാകുന്നത് തടയാനും ഉപഭോക്താക്കളുടെ താൽപ്പര്യം സംരക്ഷിക്കാനുമായി രാജ്യത്തുടനീളം വിപുലമായ പരിശോധനകളാണ് അധികൃതർ നടത്തിവരുന്നത്. ചിലയിടങ്ങളിൽ പച്ചക്കറികൾക്കും മറ്റ് അവശ്യസാധനങ്ങൾക്കും വില വർദ്ധിപ്പിക്കുന്നതായി പരാതികൾ ഉയർന്ന സാഹചര്യത്തിൽ, പ്രാദേശിക സാമ്പത്തിക വികസന വകുപ്പുകളുമായി ചേർന്നാണ് മന്ത്രാലയം കർശന നടപടികൾ സ്വീകരിക്കുന്നത്.
രാജ്യത്തെ പ്രധാന മാർക്കറ്റുകളിലും സൂപ്പർമാർക്കറ്റുകളിലും ഫീൽഡ് ഇൻസ്പെക്ടർമാരുടെ പ്രത്യേക സംഘങ്ങൾ ഓരോ ദിവസവും സന്ദർശനം നടത്തുന്നുണ്ട്. അവശ്യസാധനങ്ങളുടെ സ്റ്റോക്ക് ഉറപ്പുവരുത്തുന്നതിനൊപ്പം കൃത്രിമമായ വിലക്കയറ്റം സൃഷ്ടിക്കുന്നവർക്കെതിരെ വലിയ തുക പിഴയായും മറ്റ് നിയമനടപടികളായും ഈടാക്കുന്നുണ്ട്. പ്രത്യേകിച്ചും അരി, പഞ്ചസാര, പാചകയെണ്ണ, മുട്ട, പാലുൽപന്നങ്ങൾ, കോഴിയിറച്ചി, പയർവർഗങ്ങൾ, റൊട്ടി, ഗോതമ്പ് എന്നിങ്ങനെ ഒൻപത് അടിസ്ഥാന വിഭവങ്ങളുടെ വില വർദ്ധിപ്പിക്കുന്നതിന് മന്ത്രാലയത്തിന്റെ മുൻകൂർ അനുമതി നിർബന്ധമാണ്. അനുമതിയില്ലാതെ ഇത്തരം സാധനങ്ങൾക്ക് വില കൂട്ടുന്നത് ഗുരുതരമായ നിയമലംഘനമായി കണക്കാക്കും.
യുഎഇയുടെ തന്ത്രപരമായ ഭക്ഷ്യശേഖരത്തെക്കുറിച്ച് അധികൃതർ ജനങ്ങൾക്ക് വ്യക്തമായ ഉറപ്പ് നൽകിയിട്ടുണ്ട്. ഏതൊരു അടിയന്തര സാഹചര്യത്തെയും നേരിടാൻ നാല് മുതൽ ആറ് മാസം വരെയുള്ള ഭക്ഷ്യവസ്തുക്കൾ രാജ്യത്ത് നിലവിൽ സ്റ്റോക്കുണ്ട്. അതിനാൽ സാധനങ്ങൾ തീർന്നുപോകുമെന്ന ഭീതിയിൽ കൂടുതൽ സാധനങ്ങൾ വാങ്ങി കൂട്ടുകയോ പൂഴ്ത്തിവെക്കുകയോ ചെയ്യേണ്ടതില്ലെന്ന് മന്ത്രാലയം പൊതുജനങ്ങളെ അറിയിച്ചു. വിപണിയിൽ സാധനങ്ങളുടെ വിതരണ ശൃംഖല സുഗമമായി തുടരുന്നുണ്ടെന്നും റമസാൻ മാസത്തിൽ ഉപഭോക്താക്കൾക്ക് യാതൊരുവിധ ബുദ്ധിമുട്ടുകളും ഉണ്ടാകില്ലെന്നും അധികൃതർ കൂട്ടിച്ചേർത്തു.
പൊതുജനങ്ങൾക്ക് വിപണിയിലെ അന്യായമായ വിലക്കയറ്റത്തെക്കുറിച്ചോ നിയമലംഘനങ്ങളെക്കുറിച്ചോ പരാതിയുണ്ടെങ്കിൽ സാമ്പത്തിക മന്ത്രാലയത്തിന്റെ ഹോട്ട്ലൈൻ നമ്പറിലോ ഔദ്യോഗിക വെബ്സൈറ്റ് വഴിയോ നേരിട്ട് റിപ്പോർട്ട് ചെയ്യാവുന്നതാണ്. ഓരോ പരാതിയിലും ഉടനടി അന്വേഷണം നടത്തി വിപണിയിലെ സുതാര്യത ഉറപ്പാക്കുമെന്ന് അധികൃതർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം
റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.
ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
