ദുബായ്: പശ്ചിമേഷ്യയിലെ നിലവിലെ അസ്ഥിരമായ സാഹചര്യങ്ങൾ കണക്കിലെടുത്ത് യുഎഇയിലെ ഇന്ത്യൻ സ്കൂളുകൾ അധ്യയന വർഷാവസാന അവധി നേരത്തെയാക്കി. വിദ്യാർത്ഥികളുടെ സുരക്ഷയ്ക്ക് മുൻഗണന നൽകിയാണ് സ്കൂൾ അധികൃതരുടെ ഈ നീക്കം. പല സ്കൂളുകളിലും വാർഷിക പരീക്ഷകൾ പൂർത്തിയായെങ്കിലും ബാക്കിയുള്ള അക്കാദമിക് പ്രവർത്തനങ്ങൾ ഓൺലൈനായി തുടരാനാണ് തീരുമാനം.

അബുദാബി ഷൈനിങ് സ്റ്റാർ ഇന്റർനാഷണൽ സ്കൂൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങളിൽ പരീക്ഷകൾ ഇതിനകം പൂർത്തിയായിട്ടുണ്ട്. ഫെബ്രുവരി പകുതിയോടെ ആരംഭിച്ച പരീക്ഷകൾ പലയിടത്തും ഓൺലൈൻ വഴിയാണ് നടത്തിയത്. പരീക്ഷാ ഫലങ്ങൾ തയ്യാറാക്കുന്നതിനായി അധ്യാപകർ വീട്ടിലിരുന്ന് ജോലി തുടരുമെന്ന് സ്കൂൾ പ്രിൻസിപ്പൽമാർ അറിയിച്ചു.

ദുബായ് സ്പ്രിങ്ഡേൽസ് സ്കൂൾ പോലുള്ള സ്ഥാപനങ്ങളിൽ പരീക്ഷകൾ നടന്നുകൊണ്ടിരിക്കെയാണ് അവധി പ്രഖ്യാപനം വന്നത്. ഇതേത്തുടർന്ന് ബാക്കിയുള്ള പരീക്ഷകൾ ഓൺലൈൻ പ്ലാറ്റ്‌ഫോമുകളിലൂടെ വേഗത്തിൽ പൂർത്തിയാക്കാൻ സ്കൂൾ മാനേജ്‌മെന്റ് പ്രത്യേക ക്രമീകരണങ്ങൾ ഏർപ്പെടുത്തിയിട്ടുണ്ട്. കൂടാതെ പത്താം ക്ലാസ്, പന്ത്രണ്ടാം ക്ലാസ് വിദ്യാർത്ഥികൾക്കായുള്ള ബ്രിഡ്ജ് ക്ലാസുകൾ ഓൺലൈനായി ആരംഭിക്കുമെന്നും അധികൃതർ വ്യക്തമാക്കി.

റാസൽഖൈമ ഇന്ത്യൻ സ്കൂൾ ഉൾപ്പെടെയുള്ള സ്കൂളുകൾ മാർച്ച് 30 വരെയാണ് അവധി നൽകിയിരിക്കുന്നത്. വിവിധ കാരണങ്ങളാൽ പരീക്ഷകളിൽ പങ്കെടുക്കാൻ കഴിയാത്തവർക്കായി പ്രത്യേക പുനഃപരീക്ഷകളും ക്രമീകരിച്ചിട്ടുണ്ട്. അപ്രതീക്ഷിതമായ അവധി പ്രഖ്യാപനം കുട്ടികളുടെ പഠനത്തെ ബാധിക്കില്ലെന്നും അധ്യയന വർഷത്തെ ഫലപ്രഖ്യാപനം കൃത്യസമയത്ത് തന്നെ ഉണ്ടാകുമെന്നും സ്കൂൾ അധികൃതർ രക്ഷിതാക്കൾക്ക് ഉറപ്പുനൽകി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം

റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്‌സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്‌ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.

ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt