ചൊവ്വാഴ്ച പുലർച്ചെ യുഎഇയുടെ വിവിധ ഭാഗങ്ങളിൽ അനുഭവപ്പെട്ട അതിശക്തമായ മൂടൽമഞ്ഞ് ജനജീവിതത്തെ സാരമായി ബാധിച്ചു. ദുബായ്, ഷാർജ തുടങ്ങിയ എമിറേറ്റുകളിൽ ദൂരക്കാഴ്ച ഏതാനും മീറ്ററുകളായി കുറഞ്ഞതോടെ റോഡ് ഗതാഗതം മന്ദഗതിയിലായിരിക്കുകയാണ്.
മുന്നറിയിപ്പ് സൂചകമായി ആർടിഎ ഇലക്ട്രോണിക് ബോർഡുകൾ വഴി വാഹനയാത്രക്കാർക്ക് പ്രത്യേക നിർദ്ദേശങ്ങൾ നൽകി. വേഗത കുറയ്ക്കുക, വാഹനങ്ങൾ തമ്മിൽ സുരക്ഷിതമായ അകലം പാലിക്കുക, ഫോഗ് ലൈറ്റുകൾ ഉപയോഗിക്കുക എന്നിവയാണ് പ്രധാനമായും പാലിക്കേണ്ട കാര്യങ്ങൾ. ഷാർജ ഇൻഡസ്ട്രിയൽ ഏരിയ, അൽ ഖുസൈസ് തുടങ്ങിയ ഇടങ്ങളിൽ ദൂരക്കാഴ്ച 200 മീറ്ററിൽ താഴെയായതിനാൽ അപകടസാധ്യത ഒഴിവാക്കാൻ ഡ്രൈവർമാർ അതീവ ജാഗ്രത പാലിച്ചു.
രാജ്യത്തെ പ്രധാന പാതയായ ഇ-311 (ഷെയ്ഖ് മുഹമ്മദ് ബിൻ സായിദ് റോഡ്) ഉൾപ്പെടെയുള്ള ഇടങ്ങളിൽ സുരക്ഷ ഉറപ്പാക്കാൻ ശക്തമായ പോലീസ് സാന്നിധ്യമുണ്ടായിരുന്നു. അപകടങ്ങൾ ഒഴിവാക്കുന്നതിനായി വലിയ വാഹനങ്ങൾ റോഡരികിൽ മാറ്റി നിർത്തി. കനത്ത മൂടൽമഞ്ഞ് കാരണം പലയിടങ്ങളിലും സ്കൂൾ ബസുകൾ വൈകിയാണ് എത്തിയത്. രാവിലെ 5.50-ന് കാലാവസ്ഥ സാധാരണ നിലയിലായിരുന്നെങ്കിലും 6.30 ആയപ്പോഴേക്കും വീടിന് തൊട്ടടുത്തുള്ള പള്ളി പോലും കാണാൻ കഴിയാത്ത വിധം മഞ്ഞ് മൂടിയെന്ന് ഷാർജയിലെ താമസക്കാർ സാക്ഷ്യപ്പെടുത്തുന്നു.
ദേശീയ കാലാവസ്ഥാ നിരീക്ഷണ കേന്ദ്രം രാജ്യത്തിന്റെ മിക്ക ഭാഗങ്ങളിലും റെഡ്, യെല്ലോ അലേർട്ടുകൾ പ്രഖ്യാപിച്ചിട്ടുണ്ട്. അബുദാബിയിലെ പ്രധാന റോഡുകളിൽ സുരക്ഷ കണക്കിലെടുത്ത് വേഗപരിധി മണിക്കൂറിൽ 80 കിലോമീറ്റർ ആയി കുറച്ചിട്ടുണ്ട്. വാഹനയാത്രക്കാർ ഹസാർഡ് ലൈറ്റുകൾക്ക് പകരം ഫോഗ് ലൈറ്റുകൾ മാത്രം ഉപയോഗിക്കണമെന്നും ഇലക്ട്രോണിക് ബോർഡുകളിൽ തെളിയുന്ന നിർദ്ദേശങ്ങൾ കൃത്യമായി പാലിക്കണമെന്നും അധികൃതർ അറിയിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം
റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.
ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt
