UAE public holidays 2027; 2027-ലെ വിശുദ്ധ റമദാൻ മാസത്തിന്റെ ആരംഭം, ഈദുൽ ഫിത്തർ (ചെറിയ പെരുന്നാൾ), ഈദുൽ അദ്ഹാ (ബലിപെരുന്നാൾ) എന്നിവയുടെ സാധ്യതാ തീയതികൾ സംബന്ധിച്ച പ്രാഥമിക ഗോളശാസ്ത്ര കണക്കുകൂട്ടലുകൾ പുറത്തുവന്നു. മുൻകൂട്ടി അവധിക്കാല യാത്രകൾ ആസൂത്രണം ചെയ്യുന്ന യുഎഇയിലെ പ്രവാസികൾക്ക് വലിയ ആശ്വാസം നൽകുന്ന വിവരങ്ങളാണ് ഇപ്പോൾ പുറത്തുവന്നിരിക്കുന്നത്. വരുന്ന ചെറിയ പെരുന്നാളിന് വാരാന്ത്യം ഉൾപ്പെടെ തുടർച്ചയായ 6 ദിവസത്തെ നീണ്ട അവധി ലഭിച്ചേക്കുമെന്നാണ് കണക്കുകൂട്ടലുകൾ സൂചിപ്പിക്കുന്നത്.

എമിറേറ്റ്സ് അസ്ട്രോണമിക് സൊസൈറ്റി ചെയർമാൻ ഇബ്രാഹിം അൽ ജർവാന്റെ നിരീക്ഷണപ്രകാരം, 2027 ഫെബ്രുവരി 8 തിങ്കളാഴ്ച റമദാൻ വ്രതാരംഭം കുറിക്കാനാണ് കൂടുതൽ സാധ്യത. റമദാൻ മാസം 29-ഓ 30-ഓ ദിവസങ്ങൾ നീണ്ടുനിന്നേക്കാം.

ഈദുൽ ഫിത്തറും 6 ദിവസത്തെ അവധിയും

ശവ്വാൽ മാസപ്പിറവി കാണുന്നതിനെ ആശ്രയിച്ച് 2027-ലെ ഈദുൽ ഫിത്തർ മാർച്ച് 9 ചൊവ്വാഴ്ചയോ മാർച്ച് 10 ബുധനാഴ്ചയോ ആയിരിക്കും.

മാർച്ച് 8-ന് മാസപ്പിറവി ദൃശ്യമായാൽ റമദാൻ 29 പൂർത്തിയാക്കി മാർച്ച് 9 ചൊവ്വാഴ്ച പെരുന്നാൾ ആഘോഷിക്കും.

മാസപ്പിറവി കണ്ടില്ലെങ്കിൽ റമദാൻ 30 പൂർത്തിയാക്കി മാർച്ച് 10 ബുധനാഴ്ചയായിരിക്കും ചെറിയ പെരുന്നാൾ.

യുഎഇ കാബിനറ്റ് പ്രമേയം (Cabinet Resolution No. 27 of 2024) അനുസരിച്ച് റമദാൻ 30 പൂർത്തിയാവുകയാണെങ്കിൽ, റമദാൻ 30 ഉൾപ്പെടെ ആദ്യ മൂന്ന് ശവ്വാൽ ദിനങ്ങൾ ഔദ്യോഗിക പൊതുഅവധിയായിരിക്കും. ഇതനുസരിച്ച് ശനി, ഞായർ വാരാന്ത്യ അവധി ലഭിക്കുന്ന സ്ഥാപനങ്ങളിലെ ജീവനക്കാർക്ക് ലഭിക്കുക 6 ദിവസത്തെ നീണ്ട ഇടവേളയായിരിക്കും.

സാധ്യതാ അവധി ദിനങ്ങൾ ഇപ്രകാരം

മാർച്ച് 9 (ചൊവ്വ): റമദാൻ 30 (പൊതുഅവധി)

മാർച്ച് 10 – 12 (ബുധൻ മുതൽ വെള്ളി വരെ): ഈദുൽ ഫിത്തർ ഔദ്യോഗിക അവധികൾ

മാർച്ച് 13, 14 (ശനി, ഞായർ): വാരാന്ത്യ അവധികൾ (Weekend)

ബലിപെരുന്നാൾ അവധി (ഈദുൽ അദ്ഹാ)

അറഫാ ദിനവും ബലിപെരുന്നാളും പ്രമാണിച്ച് 2027 മേയ് 15 ശനിയാഴ്ച മുതൽ മേയ് 18 ചൊവ്വാഴ്ച വരെ 4 ദിവസത്തെ പൊതുഅവധിക്കാണ് സാധ്യത കൽപ്പിക്കപ്പെടുന്നത്.  യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t