UAE AI policy; സർക്കാർ തലത്തിൽ നിർമ്മിത ബുദ്ധി (AI) ഉപയോഗിക്കുന്നതിൽ കർശന നിയന്ത്രണവുമായി യുഎഇ. വ്യക്തികളുടെ ഉപജീവനത്തെയോ ജോലിയെയോ ബാധിച്ചേക്കാവുന്ന ഒരു കാര്യത്തിലും തീരുമാനമെടുക്കാൻ എഐ ഏജന്റുകളെ അനുവദിക്കില്ലെന്ന് യുഎഇ വ്യക്തമാക്കി. സാങ്കേതികവിദ്യയുടെ യഥാർത്ഥ ശേഷികളെക്കുറിച്ച് പൂർണ്ണമായ ധാരണയില്ലാത്തതിനാൽ ഈ ഘട്ടത്തിൽ ഇത്തരം നിയന്ത്രണങ്ങൾ അനിവാര്യമാണെന്ന് അധികൃതർ അറിയിച്ചു. മനുഷ്യജീവിതത്തിനോ ഉപജീവനത്തിനോ ഡോളർ കണക്കിൽ വിലയിടാൻ കഴിയില്ല, അത് തികച്ചും അമൂല്യമാണ്, എന്ന് യുഎഇ പ്രധാനമന്ത്രിയുടെ ഓഫീസിലെ ആർട്ടിഫിഷ്യൽ ഇന്റലിജൻസ് സഹമന്ത്രി ഒമർ സുൽത്താൻ അൽ ഒലാമ വ്യക്തമാക്കി. ദുബായിൽ നടന്ന വേൾഡ് ഇക്കണോമിക് ഫോറത്തിന്റെ ആനുവൽ മീറ്റിംഗ് ഓഫ് ഗ്ലോബൽ ഫ്യൂച്ചർ ലീഡേഴ്സിൽ ‘ട്രസ്റ്റ് ടെസ്റ്റ് ഫോർ ഏജന്റിക് എഐ’ എന്ന പാനൽ ചർച്ചയിൽ സംസാരിക്കുകയായിരുന്നു അദ്ദേഹം. എഐ മൂലം തൊഴിൽ നഷ്ടപ്പെടുമോ എന്ന ആഗോള ആശങ്കകൾ നിലനിൽക്കുന്ന പശ്ചാത്തലത്തിലാണ് യുഎഇയുടെ ഈ നിർണായക പ്രഖ്യാപനം.

വരുന്ന രണ്ട് വർഷത്തിനകം ഫെഡറൽ സർക്കാർ സേവനങ്ങളുടെ 50 ശതമാനവും എഐ ഏജന്റുകൾ വഴി ലഭ്യമാക്കുകയാണ് യുഎഇയുടെ ലക്ഷ്യമെന്ന് മന്ത്രി പറഞ്ഞു. ഇതിനായി സർക്കാർ സേവനങ്ങളെക്കുറിച്ച് നടത്തിയ സമഗ്രമായ പഠനത്തിൽ, 70 ശതമാനം സേവനങ്ങളിലും എഐ പ്രയോജനപ്പെടുത്താമെന്ന് കണ്ടെത്തി. എന്നാൽ ശേഷിക്കുന്ന 30 ശതമാനം സേവനങ്ങളിൽ ചെറിയൊരു പിഴവ് പോലും ഗുരുതര പ്രത്യാഘാതങ്ങൾ ഉണ്ടാക്കുമെന്നതിനാൽ അത്തരം മേഖലകളെ ഓട്ടോമേഷനിൽ നിന്ന് പൂർണ്ണമായി ഒഴിവാക്കിയിരിക്കുകയാണ്. പാസ്‌പോർട്ട് പുതുക്കൽ പോലുള്ള ലളിതമായ സേവനങ്ങൾ എഐക്ക് കൈമാറാം. എന്നാൽ മാനുഷിക വിവേചനബുദ്ധിയും സൂക്ഷ്മപരിശോധനയും ആവശ്യമുള്ള മേഖലകളിൽ എഐയെ നിലവിൽ ഉപയോഗിക്കില്ല.

സർക്കാർ തലത്തിൽ എഐ പ്രവർത്തനങ്ങൾ നിരീക്ഷിക്കുന്നതിനായി ‘ഏജന്റ് കൺട്രോൾ ടവർ’ (Agent Control Tower) സംവിധാനം ഏർപ്പെടുത്തിയതായി മന്ത്രി വെളിപ്പെടുത്തി. എല്ലാ എഐ ഏജന്റുകളും ഈ സംവിധാനവുമായി ബന്ധിപ്പിച്ചിരിക്കണം. അവയുടെ ഓരോ നീക്കങ്ങളും നിരീക്ഷണ വിധേയമായിരിക്കും. മറ്റ് എഐ ഏജന്റുകളും ഒപ്പം മനുഷ്യരും ചേർന്ന് നിരന്തരമായി ഇവയെ ഓഡിറ്റിംഗിന് വിധേയമാക്കുന്നുണ്ട്. പ്രത്യാഘാതങ്ങളെക്കുറിച്ച് കൃത്യമായ ബോധ്യമുള്ള വിശ്വസനീയമായ യുഎഇ സ്ഥാപനങ്ങൾ വഴിയാണ് സർക്കാർ എഐ ഏജന്റുകളെ വിന്യസിക്കുന്നത്.

എഐയുടെ വളർച്ചയുടെ വേഗത കൂട്ടണമോ കുറയ്ക്കണമോ എന്നതിലല്ല ചർച്ചകൾ നടക്കേണ്ടതെന്നും സാങ്കേതികവിദ്യ ഇതിനകം വളരെ മുന്നോട്ട് പോയിക്കഴിഞ്ഞുവെന്നും അമേരിക്കയും ചൈനയും തമ്മിലുള്ള മത്സരത്തെ പരാമർശിച്ച് അദ്ദേഹം പറഞ്ഞു. പകരം, സ്വന്തമായി തീരുമാനമെടുത്ത് ജീവനെടുക്കാൻ ശേഷിയുള്ള സ്വയംനിയന്ത്രിത ആയുധങ്ങൾ പോലുള്ള അതീവ ഗുരുതരമായ ഭീഷണികൾ തടയുന്നതിനാണ് ലോകരാജ്യങ്ങൾ മുൻഗണന നൽകേണ്ടത്. ഇത്തരം മാരകായുധങ്ങളുടെ കാര്യത്തിൽ ലോകത്ത് ഇതുവരെ പൊതുസമ്മതം രൂപപ്പെട്ടിട്ടില്ല. അണ്വായുധ നിരോധന കരാറുകൾ പോലെ, ഒരാൾ അംഗീകരിക്കുകയും എതിരാളി അംഗീകരിക്കാതിരിക്കുകയും ചെയ്താൽ അത് വലിയ തിരിച്ചടിയാകും. അതിനാൽ ആഗോള എഐ നിയന്ത്രണങ്ങൾ കൊണ്ടുവരുന്നതിന് സർക്കാരുകൾ കർശനമായ സമയപരിധി നിശ്ചയിക്കണമെന്ന് അദ്ദേഹം ആവശ്യപ്പെട്ടു.

സാങ്കേതികവിദ്യയെക്കുറിച്ചുള്ള അറിവില്ലായ്മയാണ് ആളുകളിൽ ഭയമുണ്ടാക്കുന്നതെന്ന് മന്ത്രി ചൂണ്ടിക്കാട്ടി. ജനങ്ങളെ ബോധവൽക്കരിക്കുന്നതിന്റെ ഭാഗമായി എല്ലാ വർഷവും ഒക്ടോബർ 29 യുഎഇയിൽ ‘എഐ ദിന’മായി ആചരിക്കുന്നുണ്ട്. അന്നേ ദിവസം രാജ്യത്തെ എല്ലാ താമസക്കാർക്കും എഐ പരിശീലനത്തിനുള്ള തുടക്ക സന്ദേശം എസ്എംഎസ് വഴി അയച്ചുനൽകും. രാജ്യത്തെ ഡാറ്റാ സെന്ററുകൾ സൗരോർജ്ജവും ആണവോർജ്ജവുമാണ് ഉപയോഗിക്കുന്നത് എന്നതിനാൽ ഇത് രാജ്യത്ത് ഊർജ പ്രതിസന്ധിക്കോ വിലക്കയറ്റത്തിനോ കാരണമാകുന്നില്ലെന്നും മന്ത്രി വ്യക്തമാക്കി. പത്ത് ലക്ഷം പേർക്ക് നൽകുന്ന ‘സൂപ്പർ പ്രോംപ്റ്റേഴ്‌സ്’ പരിശീലന പരിപാടി ഈ മാസം പൂർത്തിയാകും. കൂടാതെ, എല്ലാ ഫെഡറൽ ജീവനക്കാർക്കുമുള്ള സമഗ്രമായ എഐ പരിശീലനം അടുത്ത വർഷം ഓഗസ്റ്റോടെ പൂർത്തിയാക്കുമെന്നും മന്ത്രി കൂട്ടിച്ചേർത്തു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t