Dubai driverless pods; ഗതാഗത കുരുക്കിൽ പെടാതെയും ബസ് കാത്തുനിൽക്കാതെയും ലക്ഷ്യസ്ഥാനത്ത് നേരിട്ടെത്താൻ സഹായിക്കുന്ന ഡ്രൈവറില്ലാത്ത ഇലക്ട്രിക് പോഡുകളുടെ പരീക്ഷണ ഓട്ടം ദുബായിൽ ആരംഭിച്ചു. ഭാവിയിലെ യാത്രാനുഭവം നഗരവാസികൾക്ക് ലഭ്യമാക്കുന്നതിന്റെ ഭാഗമായാണ് പുതിയ പദ്ധതി നടപ്പിലാക്കുന്നത്. ബ്ലൂവാട്ടേഴ്സ് ഐലൻഡിൽ നാല് ആഴ്ച നീണ്ടുനിൽക്കുന്ന പരീക്ഷണ ഓട്ടത്തിന് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി ഞായറാഴ്ച ഔദ്യോഗിക തുടക്കം കുറിച്ചു. ആറ് പേർക്ക് വരെ സഞ്ചരിക്കാവുന്ന ചെറിയ സ്വയം ഡ്രൈവിംഗ് ഇലക്ട്രിക് വാഹനങ്ങളാണ് ‘ദുബായ് ഗ്ലൈഡ്‌വേയ്സ്’ യാത്രാ സംവിധാനത്തിലൂടെ അവതരിപ്പിച്ചിരിക്കുന്നത്. മണിക്കൂറിൽ 50 കിലോമീറ്റർ വേഗതയിൽ സഞ്ചരിക്കാൻ കഴിയുന്ന ഈ വാഹനങ്ങൾക്ക് ഒറ്റ ചാർജിൽ 250 കിലോമീറ്റർ വരെ പിന്നിടാൻ സാധിക്കും. ഗ്ലൈഡ്‌വേയ്സ് കമ്പനിയുമായി സഹകരിച്ചാണ് ആർ.ടി.എ ഈ പദ്ധതി നടപ്പിലാക്കുന്നത്. ആർ.ടി.എ ഡയറക്ടർ ജനറലും ബോർഡ് ചെയർമാനുമായ മറ്റർ അൽ തായർ ബ്ലൂവാട്ടേഴ്സിൽ ഈ വാഹനത്തിൽ സഞ്ചരിച്ചുകൊണ്ടാണ് പരീക്ഷണ ഓട്ടം ഔദ്യോഗികമായി ഉദ്ഘാടനം ചെയ്തത്.
- പരമ്പരാഗത ബസുകളിൽ നിന്നും ടാക്സികളിൽ നിന്നും വ്യത്യസ്തമായി, റോഡ് ഗതാഗതത്തിന് പുറമെ പ്രത്യേകം തയ്യാറാക്കിയ ഇടുങ്ങിയ പാതകളിലൂടെയാണ് ഈ പോഡുകൾ സഞ്ചരിക്കുക. ഇത് തടസ്സമില്ലാത്ത യാത്ര ഉറപ്പാക്കും.
- ഓരോ വാഹനത്തിലും നാല് മുതൽ ആറ് പേർക്ക് വരെ യാത്ര ചെയ്യാം. ആർട്ടിഫിഷ്യൽ ഇന്റലിജൻസ് (AI), LIDAR സെൻസറുകൾ, റഡാർ, ഹൈ-ഡെഫനിഷൻ ക്യാമറകൾ എന്നിവ സുരക്ഷിത യാത്രയ്ക്കായി ഇവയിൽ സജ്ജീകരിച്ചിട്ടുണ്ട്. യാത്രക്കാർക്ക് സ്വന്തം താല്പര്യത്തിനനുസരിച്ച് കാത്തിനുള്ളിലെ താപനിലയും വിനോദ സംവിധാനങ്ങളും ക്രമീകരിക്കാം.
- ഇരുവശങ്ങളിലേക്കുമായി മണിക്കൂറിൽ 20,000-ലധികം യാത്രക്കാരെ വഹിക്കാൻ ഈ ശൃംഖലയ്ക്ക് സാധിക്കും.
മെട്രോ സ്റ്റേഷനുകളെയും സമീപ പ്രദേശങ്ങളെയും തമ്മിൽ ബന്ധിപ്പിക്കുന്നതിനാണ് ഈ പദ്ധതി പ്രധാനമായും ലക്ഷ്യമിടുന്നത്. ആദ്യ ഘട്ടമെന്ന നിലയിൽ ബ്ലൂവാട്ടേഴ്സ് ഐലൻഡിലാണ് പരീക്ഷണം നടക്കുന്നത്. ജുമൈറ വില്ലേജ് സർക്കിൾ (JVC), ദുബായ് ഫെസ്റ്റിവൽ സിറ്റി, ബിസിനസ് ബേ, മുഹമ്മദ് ബിൻ റാഷിദ് സിറ്റി തുടങ്ങിയ വിവിധ പ്രദേശങ്ങളിലേക്ക് ഭാവിയിൽ ഈ സംവിധാനം വ്യാപിപ്പിക്കുന്നത് ആർ.ടി.എ പരിഗണിക്കുന്നുണ്ട്. നാല് ആഴ്ച നീണ്ടുനിൽക്കുന്ന പരീക്ഷണ ഓട്ടത്തിന് ശേഷം സുരക്ഷ, കൃത്യത, യാത്രാ സമയം, യാത്രക്കാരുടെ അനുഭവം എന്നിവ വിലയിരുത്തിയ ശേഷമാകും പദ്ധതി കൂടുതൽ സ്ഥലങ്ങളിലേക്ക് വ്യാപിപ്പിക്കുന്ന കാര്യത്തിൽ അന്തിമ തീരുമാനം എടുക്കുക. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
