Dubai Police humanitarian gesture; ഇരട്ടക്കുട്ടികൾക്ക് ജന്മം നൽകുന്നതിനിടെ സുഡാനി സ്വദേശിനിയായ ജീവനക്കാരി മരിച്ച സംഭവത്തിൽ, ആ കുടുംബത്തിന് താങ്ങായി ദുബായ് പൊലീസ്. കുടുംബത്തിന്റെ ഏക വരുമാനദായിനിയായിരുന്ന മർവ എന്ന യുവതിയുടെ വിയോഗത്തോടെ പ്രതിസന്ധിയിലായ കുടുംബത്തെ സഹായിക്കാൻ ഭർത്താവിനും ഇളയ സഹോദരിക്കും ദുബായ് പൊലീസ് ജോലി നൽകി. 2016 മേയ് മുതൽ ദുബായ് പൊലീസ് ഹെൽത്ത് സെന്ററിലെ ജീവനക്കാരിയായിരുന്നു മർവ. ഏതാനും ആഴ്ചകൾക്ക് മുൻപാണ് ഇരട്ടക്കുട്ടികൾക്ക് ജന്മം നൽകുന്നതിനിടെ ഇവർ ജീവൻ വെടിഞ്ഞത്. മർവയുടെ വേർപാടോടെ കുടുംബത്തിന്റെ പ്രധാന വരുമാനമാർഗ്ഗം നിലയ്ക്കുകയും അജ്മാനിൽ താമസിച്ചിരുന്ന വീടിന്റെ കരാർ കാലാവധി അവസാനിക്കുകയും ചെയ്തിരുന്നു. നിലവിൽ അബുദാബിയിലുള്ള മർവയുടെ മൂത്ത സഹോദരിയാണ് നവജാത ശിശുക്കളെ സംരക്ഷിക്കുന്നത്. സ്വന്തമായി അഞ്ച് മക്കളുള്ള ഇവർ ഇരട്ടക്കുട്ടികൾ കൂടി എത്തിയതോടെ ഇപ്പോൾ ഏഴ് കുട്ടികളെയാണ് പരിപാലിക്കുന്നത്. കുടുംബത്തിന് ജോലി നൽകിയതിന് പുറമെ, അവരുമായി നിരന്തരം സമ്പർക്കം പുലർത്തുകയും ആവശ്യമായ എല്ലാവിധ സാമൂഹിക-മാനസിക പിന്തുണകൾ ഉറപ്പാക്കുകയും ചെയ്യുന്നുണ്ടെന്ന് ദുബായ് പൊലീസ് വ്യക്തമാക്കി.

മർവയുടെ കുടുംബവുമായി ദുബായ് പൊലീസിന് 40 വർഷത്തെ നീണ്ട ബന്ധമാണുള്ളത്. 1983-ൽ മർവയുടെ പിതാവ് സർജന്റ് അഹമ്മദ് അൽ അമീൻ ബഖീത് ദുബായ് പൊലീസിന്റെ ക്രിമിനൽ ഇൻവെസ്റ്റിഗേഷൻ വിഭാഗത്തിൽ (CID) ചേർന്നതോടെയാണ് ഈ സൗഹൃദം തുടങ്ങുന്നത്. 1992-ൽ സ്വന്തം നാട്ടിൽ അവധിയിലായിരിക്കെ അദ്ദേഹം മരണപ്പെട്ടു. ഭാര്യയും മൂന്ന് പെൺമക്കളുമടങ്ങുന്ന കുടുംബത്തെ സഹായിക്കാനായി ദുബായ് പൊലീസ് അന്ന് അദ്ദേഹത്തിന്റെ ഭാര്യയ്ക്ക് ജോലി നൽകി.പിന്നീട് അവർക്ക് അസുഖം ബാധിച്ചപ്പോൾ വിദേശത്തെ ചികിത്സാച്ചെലവ് ദുബായ് പൊലീസ് വഹിച്ചെങ്കിലും 2016 മാർച്ചിൽ അവർ മരണപ്പെട്ടു. തുടർന്ന് കുടുംബത്തിന്റെ സംരക്ഷണം ഏറ്റെടുക്കാൻ 2016 മേയിൽ മർവ ദുബായ് പൊലീസ് ഹെൽത്ത് സെന്ററിൽ ജോലിയിൽ പ്രവേശിക്കുകയായിരുന്നു.തൊഴിലിനോട് അതീവ ആത്മാർത്ഥതയും സത്സ്വഭാവവുമുള്ള ജീവനക്കാരിയായിരുന്നു മർവയെന്ന് ദുബായ് പൊലീസ് അനുസ്മരിച്ചു. അവരുടെ വിയോഗത്തോടെയാണ് മൂന്നാം തലമുറയിലും ആ കുടുംബത്തെ കൈവിടാതെ ഭർത്താവിനും സഹോദരിക്കും പൊലീസ് തൊഴിൽ നൽകിയത്.

സെപ്റ്റംബർ 25-ന് ദുബായ് അൽ ഖുസൈസ് ഖബർസ്ഥാൻ മസ്ജിദിൽ നടന്ന മർവയുടെ ജനാസ നമസ്കാരത്തിലും ഖബറടക്കത്തിലും യുഎഇയുടെ വിവിധ എമിറേറ്റുകളിൽ നിന്നായി നൂറുകണക്കിന് ആളുകളാണ് പങ്കെടുത്തത്. ‘ജനാസ യുഎഇ’ എന്ന കൂട്ടായ്മ സമൂഹമാധ്യമങ്ങളിലൂടെ നൽകിയ സന്ദേശത്തെ തുടർന്നായിരുന്നു ഇത്. പള്ളിക്കുള്ളിൽ സ്ഥലം തികയാതെ പുറത്തുനിന്നാണ് പലരും പ്രാർത്ഥനയിൽ പങ്കുചേർന്നത്. “മർവ അത്രയേറെ ഭാഗ്യവതിയായിരുന്നു, യുഎഇ ഒന്നാകെ അവരുടെ കുടുംബമായി മാറിയ നിമിഷമായിരുന്നു അത്,” എന്ന് സുഹൃത്ത് ആയ മാധ്യമങ്ങളോട് പ്രതികരിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t