Indian startups Dubai opportunity; ഇന്ത്യൻ സ്റ്റാർട്ടപ്പ് സംരംഭകരെ യുഎഇയിലെ വൻകിട ബിസിനസ് ലോകവുമായി ബന്ധിപ്പിക്കുന്നതിനും ആഗോള വിപണിയിലേക്ക് വളർത്തുന്നതിനുമായി ബൃഹദ് പദ്ധതിയുമായി ദുബായ് വേൾഡ് ട്രേഡ് സെന്ററിലെ പ്രമുഖ ബിസിനസ് ഹബ്ബായ ‘സെൻട്രൽ’. ‘ഡെസ്റ്റിനേഷൻ എക്സ്പാൻഡ് നോർത്ത് സ്റ്റാർ’ എന്ന പേരിൽ ആരംഭിച്ച ഈ പദ്ധതിയിലൂടെ ഇന്ത്യയിൽ നിന്ന് തിരഞ്ഞെടുക്കപ്പെടുന്ന 100 സ്റ്റാർട്ടപ്പുകൾക്ക് ദുബായിൽ ഒരാഴ്ച നീളുന്ന വിപുലമായ ബിസിനസ്, നിക്ഷേപ അവസരങ്ങളാണ് ഒരുക്കുന്നത്. കേരളമുൾപ്പെടെയുള്ള സംസ്ഥാനങ്ങളിലെ സംരംഭകർക്ക് വലിയ സാധ്യതകളാണ് ഇതിലൂടെ തുറന്നുകിട്ടുന്നത്. പദ്ധതിയുടെ ഭാഗമായി മികച്ച സ്റ്റാർട്ടപ്പുകളെ കണ്ടെത്തുന്നതിനായി കൊച്ചി, തിരുവനന്തപുരം, കോഴിക്കോട്, ബെംഗളൂരു, ചെന്നൈ തുടങ്ങിയ പ്രമുഖ നഗരങ്ങളിൽ സെൻട്രലിന്റെ നേതൃത്വത്തിൽ റോഡ്‌ഷോകൾ സംഘടിപ്പിക്കും. കേരള സർക്കാരിന് കീഴിലുള്ള ഇൻഫോപാർക്ക്, ടെക്നോപാർക്ക്, സൈബർപാർക്ക് എന്നിവയ്ക്ക് പുറമെ ഹൈലൈറ്റ് ബിസിനസ് പാർക്ക്, കഫീറ്റ്, ജി-ടെക് തുടങ്ങിയ പ്രമുഖ ഐടി കൂട്ടായ്മകളും പദ്ധതിയുമായി സഹകരിക്കുന്നുണ്ട്. ഇതിനുപുറമെ കർണാടക ഡിജിറ്റൽ ഇക്കോണമി മിഷന്റെയും ‘സ്റ്റാർട്ടപ്പ് തമിഴ്‌നാടി’ന്റെയും പങ്കാളിത്തവും പദ്ധതിക്കുണ്ട്. തിരഞ്ഞെടുക്കപ്പെടുന്ന സംരംഭകർക്ക് ദുബായിലെ പ്രമുഖ കമ്പനികളുമായും ആഗോളതലത്തിലെ മുൻനിര നിക്ഷേപകരുമായും നേരിട്ട് ബിസിനസ് ചർച്ചകൾ നടത്താൻ അവസരം ലഭിക്കും. ലോകപ്രശസ്തമായ ജൈടെക്സ് ഗ്ലോബൽ, എക്സ്പാൻഡ് നോർത്ത് സ്റ്റാർ എന്നീ രാജ്യാന്തര ബിസിനസ് മേളകളിൽ പങ്കെടുക്കാനും അവസരമൊരുക്കും. ദുബായിലെ സെൻട്രൽ കേന്ദ്രമാക്കി തങ്ങളുടെ ബിസിനസ് അന്താരാഷ്ട്ര തലത്തിലേക്ക് വ്യാപിപ്പിക്കാൻ സ്റ്റാർട്ടപ്പുകൾക്ക് ഇതിലൂടെ സാധിക്കുമെന്ന് സെൻട്രൽ ചീഫ് എക്സിക്യൂട്ടീവ് ഡയറക്ടർ റഫീസ് റഹ്‌മത്തുല്ല വ്യക്തമാക്കി. പദ്ധതി വിപുലീകരണത്തിന്റെ ഭാഗമായി രണ്ട് പുതിയ ബിസിനസ് കേന്ദ്രങ്ങൾ കൂടി സെൻട്രൽ ദുബായിൽ പ്രവർത്തനം ആരംഭിച്ചിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t