അബുദാബിയിൽ വിവാഹ വാഗ്ദാനത്തിൽ നിന്ന് പിന്മാറിയ ശേഷം പ്രതിശ്രുത വരനിൽ നിന്ന് കൈപ്പറ്റിയ പണവും സ്വർണ്ണക്കട്ടികളും തിരികെ നൽകാതിരുന്ന യുവതിക്ക് കോടതി ഉത്തരവ്. യുവാവിന് 60,000 ദിർഹം (ഏകദേശം 13.5 ലക്ഷം രൂപ) തിരികെ നൽകണമെന്നാണ് അബുദാബി ഫാമിലി, സിവിൽ ആൻഡ് അഡ്മിനിസ്‌ട്രേറ്റീവ് ക്ലെയിംസ് കോടതി വിധിച്ചത്. വിവാഹനിശ്ചയത്തിന് പിന്നാലെ യുവാവ് യുവതിക്ക് പണവും സ്വർണ്ണക്കട്ടികളും ഉൾപ്പെടെ ആകെ 67,827 ദിർഹം നൽകിയിരുന്നു. പിന്നീട് വിവാഹത്തിൽ നിന്ന് യുവതി പിന്മാറിയതോടെ താൻ നൽകിയ തുകയും സ്വർണവും തിരികെ നൽകണമെന്ന് യുവാവ് ആവശ്യപ്പെട്ടു. എന്നാൽ പണം തിരിച്ചുകിട്ടാത്തതിനെ തുടർന്ന് ബാങ്ക് ട്രാൻസ്ഫർ രേഖകളും യുവതി ഒപ്പിട്ട രേഖകളും ഉൾപ്പെടെയുള്ള തെളിവുകളുമായി യുവാവ് കോടതിയെ സമീപിക്കുകയായിരുന്നു.

കേസ് പരിഗണിക്കുന്നതിനിടെ 60,000 ദിർഹം രണ്ട് ഗഡുക്കളായി തിരികെ നൽകി തർക്കം അവസാനിപ്പിക്കാൻ ഇരുവിഭാഗവും ധാരണയിലെത്തി. എന്നാൽ ധാരണ സ്ഥിരീകരിക്കുന്നതിനായി കേസ് വീണ്ടും പരിഗണിച്ചപ്പോൾ യുവതി കോടതിയിൽ ഹാജരാകുകയോ അന്തിമ ഒത്തുതീർപ്പ് രേഖയിൽ ഒപ്പിടുകയോ ചെയ്തില്ല. യുവതിക്ക് 17,300 ദിർഹം പണമായും രണ്ട് വൺ ഔൺസ് സ്വർണ്ണക്കട്ടികളായും ബാധ്യതയുണ്ടെന്ന് വ്യക്തമാക്കുന്ന രേഖകൾ യുവാവ് കോടതിയിൽ സമർപ്പിച്ചിരുന്നു. നേരത്തെ ഒപ്പിട്ട രേഖകളിലെ വിവരങ്ങൾ യുവതി നിഷേധിച്ചിട്ടില്ലെന്നും കോടതി ചൂണ്ടിക്കാട്ടി. അതേസമയം, 60,000 ദിർഹം ഒത്തുതീർപ്പ് തുകയായി നൽകാൻ യുവതി നേരത്തെ തന്നെ സമ്മതിച്ചിരുന്നതും കോടതി പരിഗണിച്ചു. ഇതിന്റെ അടിസ്ഥാനത്തിലാണ് 60,000 ദിർഹം യുവാവിന് നൽകണമെന്ന് കോടതി ഉത്തരവിട്ടത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t