ദിവസവും ജോലിയും കുടുംബബാധ്യതകളും തിരക്കേറിയ ജീവിതവും… ആരോഗ്യവാനാണെന്ന ആത്മവിശ്വാസത്തിൽ പലരും ശരീരം നൽകുന്ന ചെറിയ സൂചനകൾ പോലും അവഗണിക്കാറുണ്ട്. എന്നാൽ യുഎഇയിലെ പ്രവാസി സമൂഹത്തിനിടയിൽ ചെറുപ്പക്കാരിൽ പോലും പെട്ടെന്നുള്ള ഹൃദയാഘാതവും അപ്രതീക്ഷിത മരണങ്ങളും റിപ്പോർട്ട് ചെയ്യപ്പെടുന്നത് ആശങ്ക ഉയർത്തുകയാണ്. പുറമേ ആരോഗ്യവാനെന്ന് തോന്നുന്നവരിലും ‘സൈലന്റ് ഹാർട്ട് അറ്റാക്ക്’ സംഭവിക്കാമെന്നാണ് വിദഗ്ധർ മുന്നറിയിപ്പ് നൽകുന്നത്.

കഴിഞ്ഞ ദിവസം ഷാർജയിൽ 32കാരിയായ മലയാളി ദന്തഡോക്ടർ അഫിന ബഷീർ വീട്ടിൽ കുഴഞ്ഞുവീണ് മരിച്ച സംഭവം ഉൾപ്പെടെ, യുവ പ്രവാസികളിലെ അപ്രതീക്ഷിത മരണങ്ങൾ വീണ്ടും ചർച്ചയാകുകയാണ്. ഈ വർഷം ദുബായിൽ ബാഡ്മിന്റൺ കളിക്കുന്നതിനിടെ 42കാരനായ മലയാളിയും ക്രിക്കറ്റ് മത്സരത്തിനിടെ 38കാരനായ കായികതാരവും കുഴഞ്ഞുവീണ് മരിച്ച സംഭവങ്ങളും റിപ്പോർട്ട് ചെയ്തിരുന്നു.

എന്താണ് സൈലന്റ് ഹാർട്ട് അറ്റാക്ക്?

സാധാരണ ഹൃദയാഘാതത്തിൽ നെഞ്ചുവേദന, ശ്വാസംമുട്ടൽ, അമിത വിയർപ്പ്, നെഞ്ചിൽ ഭാരമനുഭവപ്പെടൽ തുടങ്ങിയ ലക്ഷണങ്ങൾ ഉണ്ടാകാം. എന്നാൽ സൈലന്റ് ഹാർട്ട് അറ്റാക്കിൽ ഇത്തരം വ്യക്തമായ സൂചനകൾ പലപ്പോഴും ഉണ്ടാകില്ല. ചെറിയ ക്ഷീണം, നെഞ്ചെരിച്ചിൽ, പുറംവേദന, പേശിവേദന തുടങ്ങിയവ മാത്രമായിരിക്കാം അനുഭവപ്പെടുക. അതിനാൽ ഗ്യാസ്ട്രബിൾ അല്ലെങ്കിൽ ജോലിയുടെ ക്ഷീണം എന്ന് കരുതി അവഗണിക്കുന്ന സാഹചര്യം ഉണ്ടാകാമെന്ന് അബുദാബി മുസഫ എൽഎൽഎച്ച് ആശുപത്രിയിലെ കൺസൽട്ടൻറ് കാർഡിയോളജിസ്റ്റ് ഡോ. ജമുന ദേവി പറയുന്നു.

പ്രമേഹവുമായി ബന്ധപ്പെട്ട നാഡീസംബന്ധമായ പ്രശ്നങ്ങളുള്ളവരിലും പ്രായമായവരിലും വേദന ഉൾപ്പെടെയുള്ള മുന്നറിയിപ്പ് ലക്ഷണങ്ങൾ തിരിച്ചറിയാൻ ബുദ്ധിമുട്ടുണ്ടാകാം. ഇതുമൂലം ചികിത്സ വൈകാനും ഹൃദയപേശികൾക്ക് ഗുരുതരമായ കേടുപാടുകൾ സംഭവിക്കാനും സാധ്യതയുണ്ടെന്ന് ഡോക്ടർ വിശദീകരിക്കുന്നു.

പ്രവാസി ജീവിതത്തിലെ ഏത് കാര്യങ്ങളാണ് അപകടസാധ്യത കൂട്ടുന്നത്?

ജോലിയിലെ സമ്മർദ്ദം, സാമ്പത്തിക ബാധ്യതകൾ, കുടുംബത്തിൽനിന്നുള്ള അകലം, വ്യായാമക്കുറവ്, ഉറക്കക്കുറവ്, അനാരോഗ്യകരമായ ഭക്ഷണശീലം എന്നിവയെല്ലാം ഹൃദയാരോഗ്യത്തെ ബാധിക്കാവുന്ന ഘടകങ്ങളാണ്. പുകവലി, വേപ്പിങ്, മദ്യപാനം, ശരീരത്തിൽ ജലാംശം കുറയുന്നത് എന്നിവയും അപകടസാധ്യത വർധിപ്പിക്കുന്ന ഘടകങ്ങളായി ഡോക്ടർമാർ ചൂണ്ടിക്കാട്ടുന്നു.

ഫാസ്റ്റ് ഫുഡ്, എണ്ണയിൽ വറുത്ത ഭക്ഷണം, കൊഴുപ്പ് കൂടുതലുള്ള മാംസാഹാരം എന്നിവയുടെ അമിത ഉപയോഗം കൊളസ്ട്രോൾ ഉയരാൻ കാരണമാകാം. അതേസമയം, വർഷങ്ങളോളം ആരോഗ്യ പരിശോധന നടത്താതെ കഴിയുന്നതും പ്രശ്നങ്ങൾ തിരിച്ചറിയുന്നത് വൈകിപ്പിക്കാം. ഉയർന്ന കൊളസ്ട്രോൾ, രക്തസമ്മർദ്ദം, പ്രമേഹം തുടങ്ങിയവ നിയന്ത്രിക്കാതെ പോയാൽ ഹൃദയത്തിലേക്കുള്ള രക്തക്കുഴലുകളിൽ തടസ്സം രൂപപ്പെടാനുള്ള സാധ്യതയുണ്ട്.

സ്ത്രീകളിലും ഹൃദയാഘാതത്തിന്റെ ലക്ഷണങ്ങൾ എല്ലായ്പ്പോഴും വ്യക്തമായിരിക്കണമെന്നില്ല. ക്ഷീണം, നടുവേദന, ശ്വാസതടസ്സം തുടങ്ങിയ ലക്ഷണങ്ങൾ മറ്റ് കാരണങ്ങളുമായി തെറ്റിദ്ധരിക്കപ്പെടാം.

ഹൃദയത്തെ എങ്ങനെ സംരക്ഷിക്കാം?

30 വയസ്സ് കഴിഞ്ഞവർ വർഷത്തിൽ ഒരിക്കലെങ്കിലും സമഗ്ര ആരോഗ്യ പരിശോധന നടത്തുന്നത് രക്തസമ്മർദ്ദം, കൊളസ്ട്രോൾ, പ്രമേഹം തുടങ്ങിയവ നേരത്തെ തിരിച്ചറിയാൻ സഹായിക്കും. ആവശ്യാനുസരണം ഇസിജി, എക്കോ, ട്രെഡ്മിൽ ടെസ്റ്റ് തുടങ്ങിയ പരിശോധനകൾ ഡോക്ടറുടെ നിർദേശപ്രകാരം നടത്താം.

ദിവസവും 30 മുതൽ 45 മിനിറ്റ് വരെ വേഗത്തിലുള്ള നടത്തം പോലുള്ള വ്യായാമങ്ങൾക്ക് സമയം കണ്ടെത്തുക, ഉറക്കത്തിന് പ്രാധാന്യം നൽകുക, സമ്മർദ്ദം കുറയ്ക്കാൻ യോഗയോ ധ്യാനമോ ശീലമാക്കുക എന്നിവയും സഹായകരമാണ്. പുകവലിയും മദ്യപാനവും ഒഴിവാക്കുന്നതിനൊപ്പം പഴങ്ങളും പച്ചക്കറികളും ഉൾപ്പെടുത്തിയ സമീകൃതാഹാരം പിന്തുടരുകയും ഭക്ഷണത്തിലെ ഉപ്പിന്റെയും പഞ്ചസാരയുടെയും അളവ് കുറയ്ക്കുകയും ചെയ്യണമെന്ന് വിദഗ്ധർ നിർദേശിക്കുന്നു.ശരീരം നൽകുന്ന ചെറിയ മുന്നറിയിപ്പുകൾ പോലും അവഗണിക്കാതിരിക്കുക. പ്രത്യേകിച്ച് നെഞ്ചുവേദന, ശ്വാസംമുട്ടൽ, അസാധാരണമായ ക്ഷീണം തുടങ്ങിയ ലക്ഷണങ്ങൾ അനുഭവപ്പെട്ടാൽ സ്വയം ചികിത്സ നടത്താതെ ഉടൻ വൈദ്യസഹായം തേടുന്നതാണ് സുരക്ഷിതം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t