വേനൽച്ചൂടിൽ നിന്ന് ആശ്വാസം തേടി ഓഗസ്റ്റ് മാസത്തിൽ യൂറോപ്പിലേക്ക് അവധിയാത്ര നടത്താറുള്ള യുഎഇ നിവാസികൾ ഇത്തവണ യാത്രാ പദ്ധതികൾ പുനഃപരിശോധിക്കുകയാണ്. യൂറോപ്പിൽ അനുഭവപ്പെടുന്ന കാലാവസ്ഥ പ്രതീക്ഷിച്ചതിൽ നിന്ന് ഏറെ വ്യത്യസ്തമായതിനാലാണ് യാത്രക്കാർക്ക് പുതിയ അനുഭവം. എല്ലാ വർഷവും കുടുംബത്തെ കാണാനായി യുഎഇയിൽ നിന്ന് ഫ്രാൻസിലേക്ക് യാത്ര ചെയ്യുന്ന സെയ്ന ഇത്തവണ ഓഗസ്റ്റിലാണ് യാത്ര തിരഞ്ഞെടുത്തത്. ദുബായിൽ ഏറ്റവും ചൂടേറിയ മാസമായതിനാൽ ഓഗസ്റ്റിൽ ഫ്രാൻസിലെത്തുന്നത് ചൂടിൽ നിന്ന് ആശ്വാസം നൽകുമെന്നായിരുന്നു പ്രതീക്ഷ. പാരീസിലെത്തുന്നതിന് മുമ്പ് ഫ്രാൻസിന്റെ തെക്കൻ മേഖലകളിലും അവർ സന്ദർശനം നടത്തി.

എന്നാൽ ഇത്തവണത്തെ കാലാവസ്ഥ പ്രതീക്ഷിച്ചതുപോലെ ആയിരുന്നില്ലെന്ന് സെയ്ന പറയുന്നു. ഈ വർഷം അനുഭവപ്പെട്ട ചൂട് അസാധാരണമായിരുന്നുവെന്നും വൈകുന്നേരങ്ങളിലും താപനില ഉയർന്നുതന്നെയായിരുന്നുവെന്നും അവർ വ്യക്തമാക്കി. ഫ്രാൻസിന്റെ തെക്കൻ മേഖലയിൽ വിവിധ നഗരങ്ങൾ സന്ദർശിച്ചെങ്കിലും ചൂട് കാരണം യാത്രാപദ്ധതികളിൽ ചിലത് റദ്ദാക്കേണ്ടിവന്നു. ബീച്ചിൽ ഏതാനും മണിക്കൂറുകൾ ചെലവഴിച്ചതിന് പുറമെ മറ്റ് പ്രവർത്തനങ്ങൾക്കുള്ള അവസരങ്ങളും പരിമിതമായിരുന്നുവെന്ന് സെയ്ന പറഞ്ഞു. അതേസമയം, യുഎഇയിൽ നിന്നുള്ള മറ്റൊരു യാത്രക്കാരിയായ ലിസ് യുകെയിൽ എത്തിയത് സുഖകരമായ വേനൽക്കാല കാലാവസ്ഥ പ്രതീക്ഷിച്ചാണ്. എന്നാൽ യാത്രയുടെ ചില ഘട്ടങ്ങളിൽ പ്രതീക്ഷിച്ചതിലും വലിയ തണുപ്പാണ് അനുഭവപ്പെട്ടത്.

ലിസ് യുകെയിലെത്തിയപ്പോഴേക്കും ഉഷ്ണതരംഗം അവസാനിച്ചിരുന്നു. സ്കോട്ട്‌ലൻഡിലും വടക്കൻ ഇംഗ്ലണ്ടിലും താപനില 10 ഡിഗ്രി സെൽഷ്യസ് വരെ താഴ്ന്നതോടെ തണുപ്പിനെ നേരിടാൻ ആവശ്യമായ വസ്ത്രങ്ങൾ കൈവശമില്ലാത്ത അവസ്ഥയിലായി. ഒടുവിൽ ഒരു ഹുഡ്ഡി വാങ്ങേണ്ടിവന്നതായും അവർ പറഞ്ഞു. ഇതോടെ ഓഗസ്റ്റ് യൂറോപ്യൻ വേനൽക്കാല അവധിക്ക് അനുയോജ്യമായ മാസമാണോ എന്ന കാര്യത്തിൽ യാത്രക്കാർ തന്നെ ആശയക്കുഴപ്പത്തിലാണ്. എന്നാൽ ഓഗസ്റ്റിൽ യൂറോപ്പ് സന്ദർശിക്കുന്നവർ ചൂടിനൊപ്പം തണുത്ത കാലാവസ്ഥയും കണക്കിലെടുത്ത് വസ്ത്രങ്ങളും യാത്രാപദ്ധതികളും തയ്യാറാക്കേണ്ട സാഹചര്യമാണെന്നാണ് യാത്രക്കാരുടെ അനുഭവം വ്യക്തമാക്കുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t