അബുദാബി ബിഗ് ടിക്കറ്റ് തത്സമയ നറുക്കെടുപ്പിൽ പ്രവാസി മലയാളിക്ക് രണ്ട് കോടി ദിർഹത്തിന്റെ (52 കോടിയിലധികം ഇന്ത്യൻ രൂപ) ഒന്നാം സമ്മാനം ലഭിച്ചു. ബഹ്‌റൈനിൽ സ്വന്തമായി ബിസിനസ് നടത്തുന്ന തൃശൂർ സ്വദേശി കൃഷ്ണകുമാർ ശ്യാമള രവീന്ദ്രനാണ് ഈ വലിയ ഭാഗ്യം തേടിയെത്തിയത്. കഴിഞ്ഞ 23 വർഷമായി ബഹ്‌റൈനിൽ കഴിയുന്ന 43-കാരനായ കൃഷ്ണകുമാർ ഏഴു വർഷമായി ബിഗ് ടിക്കറ്റ് നറുക്കെടുപ്പുകളിൽ പങ്കാളിയാണ്. കോവിഡ് കാലത്ത് സുഹൃത്തുക്കൾക്കൊപ്പം ചേർന്നായിരുന്നു ടിക്കറ്റ് എടുത്തു തുടങ്ങിയതെങ്കിലും, ഇത്തവണ സ്വന്തമായി എടുത്ത ഒറ്റ ടിക്കറ്റിലൂടെയാണ് അദ്ദേഹം കോടീശ്വരനായത്.

നറുക്കെടുപ്പ് നടന്ന സമയത്ത് ഫോൺ സ്വിച്ച് ഓഫ് ആയിരുന്നതിനാൽ ബിഗ് ടിക്കറ്റ് അധികൃതർ വിളിച്ചപ്പോൾ കൃഷ്ണകുമാറിന് ആദ്യം ഫോൺ എടുക്കാൻ കഴിഞ്ഞിരുന്നില്ല. പിന്നീട് സമ്മാനവിവരം അറിഞ്ഞപ്പോൾ വിശ്വസിക്കാനായില്ലെന്നും ഇപ്പോഴും അതിന്റെ ഞെട്ടലിലാണെന്നും അദ്ദേഹം പറഞ്ഞു. സമ്മാനത്തുക എന്തുചെയ്യണമെന്നത് നാട്ടിലുള്ള കുടുംബവുമായി ആലോചിച്ചു മാത്രമേ തീരുമാനിക്കൂ എന്നും, മെച്ചപ്പെട്ട ജീവിതസാഹചര്യങ്ങൾക്കായി പ്രതീക്ഷയോടെ പ്രയത്നിക്കുന്നവർ ആരും തന്നെ ശ്രമം ഉപേക്ഷിക്കരുതെന്നും കൃഷ്ണകുമാർ കൂട്ടിച്ചേർത്തു.

ഇതേ നറുക്കെടുപ്പിൽ അൽ ഐനിൽ ഇലക്ട്രിക്കൽ മെയിന്റനൻസ് ജോലി ചെയ്യുന്ന ബംഗ്ലാദേശ് സ്വദേശിയായ എംഡി റാനു മിയ ആഡംബര കാറായ റേഞ്ച് റോവർ വെലാർ സ്വന്തമാക്കി. കടുത്ത സാമ്പത്തിക പ്രതിസന്ധിയിലൂടെ കടന്നുപോകുകയായിരുന്ന 39-കാരനായ റാനുവിന് ഈ ഭാഗ്യം കൃത്യസമയത്താണ് എത്തിയത്. സമ്മാനമായി ലഭിച്ച കാർ നിലനിർത്തണമോ അതോ അതിന്റെ മൂല്യമുള്ള പണമായി വാങ്ങണമോ എന്ന കാര്യത്തിൽ അദ്ദേഹം തീരുമാനമെടുത്തിട്ടില്ല.

അടുത്ത മാസത്തെ നറുക്കെടുപ്പിൽ സമ്മാനത്തുകകളിൽ വലിയ വർധനവാണ് ബിഗ് ടിക്കറ്റ് പ്രഖ്യാപിച്ചിരിക്കുന്നത്. ജൂലൈ മൂന്നിന് നടക്കുന്ന നറുക്കെടുപ്പിലെ ഒന്നാം സമ്മാനം രണ്ടരക്കോടി ദിർഹമാണ് (ഏകദേശം 56 കോടിയിലധികം ഇന്ത്യൻ രൂപ). ഇതുകൂടാതെ അഞ്ച് പേർക്ക് ഒരു ദശലക്ഷം ദിർഹം വീതം ആശ്വാസ സമ്മാനവും ലഭിക്കും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t