ഇന്ധനവിലയിലെ കുത്തനെ വർധനയും ചില വ്യോമപാതകൾ അടച്ചതും ആഗോള വിമാനയാത്ര നിരക്കുകളിൽ വലിയ ഉയർച്ചയ്ക്ക് ഇടയാക്കാനിടയുണ്ടെന്ന് റിപ്പോർട്ടുകൾ സൂചിപ്പിക്കുന്നു. ഏകദേശം 10 ശതമാനം വരെ ടിക്കറ്റ് നിരക്ക് കൂടാനിടയുണ്ടെന്നും, പ്രത്യേകിച്ച് ദീർഘദൂര യാത്രക്കാരെയാണ് ഈ വർധനവ് ഏറ്റവും കൂടുതൽ ബാധിക്കുകയെന്നും ഓക്സ്ഫോർഡ് ഇക്കണോമിക്സ് നടത്തിയ പഠനം വ്യക്തമാക്കുന്നു. പശ്ചിമേഷ്യയിൽ നിലനിൽക്കുന്ന സംഘർഷാവസ്ഥയെ തുടർന്ന് നിരവധി വിമാനങ്ങൾ വഴിതിരിച്ചുവിടേണ്ടി വരുന്നത് പ്രവർത്തനച്ചെലവും ഇന്ധന ഉപഭോഗവും ഉയരാൻ കാരണമായിട്ടുണ്ട്. ഫെബ്രുവരി 28 മുതൽ ആരംഭിച്ച സംഘർഷത്തിന് പിന്നാലെ വിമാന ഇന്ധനവില ഏകദേശം ഇരട്ടിയായി ഉയർന്നതായി റിപ്പോർട്ടുകൾ പറയുന്നു. സാധാരണയായി വിമാനക്കമ്പനികളുടെ മൊത്തം ചെലവിൽ 25 മുതൽ 35 ശതമാനം വരെ ഇന്ധനത്തിനാണ് ചെലവാകുന്നത്; ചില ലോ-കോസ്റ്റ് കമ്പനികളിൽ ഇത് 60 ശതമാനം വരെ എത്തുന്നുവെന്നും പഠനം ചൂണ്ടിക്കാട്ടുന്നു.

ഈ സാഹചര്യത്തിൽ വിമാനക്കമ്പനികൾക്ക് ബേസ് ഫെയറുകൾ 5 മുതൽ 10 ശതമാനം വരെ വർധിപ്പിക്കുകയോ, അധിക ഫ്യൂവൽ സർചാർജ് ഏർപ്പെടുത്തുകയോ ചെയ്യേണ്ടി വരും. ഇതോടൊപ്പം, യുഎസ്–ഇസ്രായേൽ–ഇറാൻ സംഘർഷം ശക്തമായാൽ 2026-ൽ മിഡിൽ ഈസ്റ്റിലെ യാത്രക്കാരുടെ എണ്ണം 41 ശതമാനം വരെ കുറയാൻ സാധ്യതയുണ്ടെന്നും പഠനം പ്രവചിക്കുന്നു. എന്നാൽ, എമിറേറ്റ്സ് , ഖത്തർ എയർവേയ്സ് , ഇത്തിഹാദ് എയർവെയ്സ് എന്നീ ഗൾഫ് മേഖലയിലെ പ്രധാന വിമാനക്കമ്പനികൾക്ക് മതിയായ കരുതൽ ധനം ഉള്ളതിനാൽ ഹ്രസ്വകാല പ്രതിസന്ധികളെ നേരിടാൻ കഴിയും. ഉദാഹരണത്തിന്, Emirates ഗ്രൂപ്പിന് മാത്രം ഏകദേശം 56 ബില്യൺ ദിർഹം (15.2 ബില്യൺ ഡോളർ) കരുതൽ നിക്ഷേപമായി നിലനിൽക്കുന്നുണ്ട്.

ദീർഘദൂര വിമാനയാത്രകളിൽ ഇന്ധനച്ചെലവിന് വലിയ പങ്കുള്ളതിനാൽ ഇത്തരം യാത്രകളിലാണ് നിരക്കുകൾ കൂടുതലായി ഉയരാൻ സാധ്യത. അതേസമയം, യുഎസ് വിമാനക്കമ്പനികൾ ‘ഫ്യൂവൽ ഹെഡ്ജിംഗ്’ പോലുള്ള സംരക്ഷണ മാർഗങ്ങൾ കുറച്ചതോടെ ഇന്ധനവില ഉയർച്ച നേരിട്ട് ടിക്കറ്റ് നിരക്കുകളിൽ പ്രതിഫലിക്കുന്ന സാഹചര്യം രൂപപ്പെടുകയാണ്.