മേഖലയിൽ ഇറാൻ–ഇസ്രയേൽ സംഘർഷം തുടരുന്നതിനിടെ യുഎഇയിലെ മത്സ്യച്ചന്തകളിൽ മത്സ്യവില കുത്തനെ ഉയർന്നതായി റിപ്പോർട്ട്. മുൻ മാസങ്ങളെ അപേക്ഷിച്ച് മിക്ക മത്സ്യ ഇനങ്ങൾക്കും 30 മുതൽ 50 ശതമാനം വരെ വില വർധിച്ചതോടെ സാധാരണക്കാരായ പ്രവാസികൾക്കും നാട്ടുകാർക്കും വലിയ സാമ്പത്തിക ഭാരം അനുഭവപ്പെടുകയാണ്.

ഭക്ഷണമേശയിലെ പ്രധാന വിഭവമായ മീൻ പോലും വാങ്ങാൻ കഴിയാത്ത സാഹചര്യമാണെന്ന് ഉപഭോക്താക്കൾ പരാതിപ്പെടുന്നു. പ്രത്യേകിച്ച് റമസാൻ മാസമായതിനാൽ ഉയർന്ന വില കൂടുതൽ തിരിച്ചടിയാകുന്നുവെന്നാണ് പറയുന്നത്. പ്രദേശത്തെ അസ്ഥിരമായ സാഹചര്യത്തെ തുടർന്ന് കടലിൽ മത്സ്യബന്ധനത്തിന് പോകുന്ന ബോട്ടുകൾക്ക് കർശന നിയന്ത്രണങ്ങൾ ഏർപ്പെടുത്തിയതും മത്സ്യലഭ്യത കുറയാൻ കാരണമായതായി വ്യാപാരികൾ പറയുന്നു. കടലിൽ നിന്നുള്ള മീൻവരവ് കുറഞ്ഞതോടെ വിപണിയിൽ വില കുത്തനെ ഉയർന്നിരിക്കുകയാണ്. സാധാരണക്കാർ കൂടുതലായി വാങ്ങുന്ന മത്തി, അയല തുടങ്ങിയ മത്സ്യങ്ങൾക്കും ഇപ്പോൾ ഉയർന്ന വിലയാണ് ഈടാക്കുന്നത്.

പ്രധാന മത്സ്യങ്ങളുടെ വിപണിവില

ദുബായിലെ സൂപ്പർ-ഹൈപ്പർമാർക്കറ്റുകളിൽ ഇന്നലത്തെ വിലനിലവാരം ഇങ്ങനെ:

മത്തി – കിലോയ്ക്ക് 15 ദിർഹം

അയല – 28 ദിർഹം

അഴക്കൂറ – 74 ദിർഹം

ചെറിയ ഷേറി – 23.90 ദിർഹം

അറേബ്യൻ സീ ബാസ് – 38 ദിർഹം

ചൂര – 36.90 ദിർഹം

നോർവീജിയൻ സാൽമൻ – 89.90 ദിർഹം

നോർവീജിയൻ സാൽമൻ ഫില്ലറ്റ് – 99.90 ദിർഹം

അതേസമയം, ദെയ്റയിലും ഷാർജയിലുമുള്ള മത്സ്യച്ചന്തകളിൽ ഇതിനെക്കാൾ കുറഞ്ഞ വിലയ്ക്ക് മത്സ്യം ലഭിക്കുന്നുണ്ടെന്ന് ഉപഭോക്താക്കൾ പറയുന്നു.

ഓൺലൈൻ വിപണിയിലും വില ഉയർന്നു

മാളുകളിലെ ഹൈപ്പർമാർക്കറ്റുകളുടെ ഓൺലൈൻ പ്ലാറ്റ്ഫോമുകളിലും മത്സ്യവിലയിൽ വർധനവുണ്ടായി. ലഭ്യമായ ചില വിലകൾ:

ചെമ്മീൻ – കിലോയ്ക്ക് 30 മുതൽ 60 ദിർഹം വരെ

തിലാപ്പിയ – 600 ഗ്രാമിന് 8 ദിർഹം

നോർവീജിയൻ സാൽമൻ – ഏകദേശം 100 ദിർഹം

കൂന്തൾ – 35 ദിർഹം

ഞണ്ട് – 30 ദിർഹം

മത്തി – 15 ദിർഹം

അയക്കൂറ – 80 ദിർഹം

വെള്ള ആവോലി – 38 ദിർഹം

പ്രാദേശിക സുൽത്താൻ ഇബ്രാഹിം – 40 ദിർഹം

യുഎഇയിൽ ഇറക്കുമതി ചെയ്യുന്ന മത്സ്യം

യുഎഇയിൽ ഉപയോഗിക്കുന്ന മത്സ്യത്തിന്റെ വലിയൊരു വിഹിതം വിദേശരാജ്യങ്ങളിൽ നിന്നാണ് എത്തുന്നത്. ഇന്ത്യ, ഒമാൻ, നോർവേ, വിയറ്റ്നാം, പാകിസ്ഥാൻ, തുർക്കി, ഇറാൻ, തായ്‌ലൻഡ്, ചൈന തുടങ്ങിയ രാജ്യങ്ങളാണ് പ്രധാന വിതരണക്കാർ. ചെമ്മീൻ, ട്യൂണ, സാൽമൺ (പ്രത്യേകിച്ച് നോർവേയിൽ നിന്ന്), വിവിധ തരം ഫ്രോസൺ മത്സ്യങ്ങൾ എന്നിവയാണ് കൂടുതലായി ഇറക്കുമതി ചെയ്യുന്നത്. മത്തി കൂടുതലായി ഒമാനിൽ നിന്നാണ് എത്തുന്നത്. ചെമ്മീനും കരിമീനും ഇന്ത്യയിൽ നിന്നുമെത്തുന്നു.

അതേസമയം, യുഎഇയുടെ അറേബ്യൻ ഗൾഫും ഗൾഫ് ഓഫ് ഒമാനും ഉൾപ്പെടുന്ന തീരപ്രദേശങ്ങളിൽ സമൃദ്ധമായ സമുദ്രജീവികളും ലഭ്യമാണ്. ഹമൂർ എന്ന ഗ്രൂപ്പർ ഇനം മത്സ്യം യുഎഇയിൽ ഏറെ ജനപ്രിയമാണ്. സ്വദേശികൾക്ക് ഏറെ ഇഷ്ടമുള്ള മറ്റൊരു മത്സ്യമാണ് അയക്കൂറ (നെയ് മീൻ). സാഫി, ജെഷ്, ഷേറി തുടങ്ങിയ മത്സ്യങ്ങളും ഇവിടെ വ്യാപകമായി ഉപയോഗിക്കുന്നു. ട്യൂണ, ബറാക്കുഡ, കോബിയ, വിവിധ തരം തിരണ്ടികൾ, ഞണ്ട് തുടങ്ങിയവയും യുഎഇ തീരപ്രദേശങ്ങളിൽ സാധാരണയായി ലഭ്യമാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

ഭാഗ്യം പരീക്ഷിച്ചു, ഒടുവിൽ തേടിയെത്തി; ബിഗ് ടിക്കറ്റ് നറുക്കെടുപ്പിൽ തിളങ്ങി പ്രവാസി മലയാളി

അബുദാബി: ആറ് വർഷം മുൻപ് കേരളത്തിൽ നിന്ന് അബുദാബിയിലെത്തിയ മലയാളി എഞ്ചിനീയർ നിബിൻ മാത്യുവിനെ (36) തേടി ബിഗ് ടിക്കറ്റിന്റെ വലിയ ഭാഗ്യമെത്തി. സുഹൃത്തുക്കൾ വഴി ബിഗ് ടിക്കറ്റിനെക്കുറിച്ച് അറിഞ്ഞ് വെറും അഞ്ച് മാസം മുൻപ് മാത്രം നറുക്കെടുപ്പിൽ പങ്കെടുത്തു തുടങ്ങിയ നിബിൻ, ഒരു ഗ്രൂപ്പിന്റെ ഭാഗമായാണ് 50,000 ദിര്‍ഹം (ഏകദേശം 11 ലക്ഷത്തിലധികം രൂപ) സമ്മാനം സ്വന്തമാക്കിയത്. തനിക്ക് ലഭിച്ച ഈ വലിയ സമ്മാനം വിശ്വസിക്കാനായില്ലെന്നും ഈ തുക നാട്ടിലെ കുടുംബത്തെ സഹായിക്കാൻ ഉപയോഗിക്കുമെന്നും നിബിൻ പറഞ്ഞു. വരും മാസങ്ങളിലും തന്റെ ഭാഗ്യം പരീക്ഷിക്കുമെന്ന ആത്മവിശ്വാസത്തിലാണ് ഈ യുവാവ്.

ഫെബ്രുവരി മാസം ബിഗ് ടിക്കറ്റ് ഉപഭോക്താക്കൾക്കായി വമ്പിച്ച സമ്മാനങ്ങളാണ് ഒരുക്കിയിരിക്കുന്നത്. മാർച്ച് 3-ന് നടക്കുന്ന തത്സമയ നറുക്കെടുപ്പിലെ ഒന്നാം സമ്മാനം 15 ദശലക്ഷം ദിര്‍ഹമാണ്. കൂടാതെ അഞ്ച് പേർക്ക് ഒരു ലക്ഷം ദിർഹം വീതം സമാശ്വാസ സമ്മാനങ്ങളും ലഭിക്കും. ഫെബ്രുവരിയിൽ ആഴ്ചതോറും നടക്കുന്ന ഇ-നറുക്കെടുപ്പിലൂടെ 50,000 ദിർഹം വീതം നാല് വിജയികൾക്ക് നൽകുന്നുണ്ട്. ഫെബ്രുവരി 16-നും 22-നും ഇടയിൽ ടിക്കറ്റെടുത്തവർക്കുള്ള നറുക്കെടുപ്പ് ഫെബ്രുവരി 23-ന് നടക്കും. കൂടാതെ, ഫെബ്രുവരി 1 മുതൽ 24 വരെ രണ്ട് ടിക്കറ്റുകൾ ഒന്നിച്ച് വാങ്ങുന്നവർക്ക് പ്രത്യേക മത്സരത്തിൽ പങ്കെടുക്കാനും 50,000 മുതൽ 1.5 ലക്ഷം ദിർഹം വരെ ഉറപ്പായ സമ്മാനങ്ങൾ നേടാനും അവസരമുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം

റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്‌സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്‌ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.

ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt