കുവൈറ്റ് സിറ്റി: രാജ്യത്തെ സഹകരണ മേഖലയിൽ സുതാര്യത ഉറപ്പാക്കാനും സാമ്പത്തിക വെട്ടിപ്പുകൾക്ക് അറുതി വരുത്താനുമായി അത്യാധുനികമായ ഓട്ടോമേറ്റഡ് സംവിധാനം നടപ്പിലാക്കാൻ കുവൈറ്റ് ഒരുങ്ങുന്നു. സഹകരണ സംഘങ്ങളുടെ പ്രവർത്തനങ്ങളിൽ സംഭവിക്കുന്ന ക്രമക്കേടുകൾ തത്സമയം കണ്ടെത്തുകയും അവ ഉടൻ തന്നെ തടയുകയും ചെയ്യുന്ന രീതിയിലാണ് ഈ ഡിജിറ്റൽ സംവിധാനം രൂപകൽപ്പന ചെയ്തിരിക്കുന്നത്. ഇതോടെ സൊസൈറ്റികളുടെ സ്റ്റോക്ക് പരിശോധന, സാമ്പത്തിക ഇടപാടുകൾ, പർച്ചേസ് ഓർഡറുകൾ എന്നിവയെല്ലാം ഇനി മുതൽ മന്ത്രാലയത്തിന്റെ നേരിട്ടുള്ള ഡിജിറ്റൽ നിരീക്ഷണത്തിന് കീഴിലാകും.

വ്യാജ ബില്ലുകൾ ഉപയോഗിച്ചുള്ള പണം തട്ടൽ, സാധനങ്ങൾ വിപണിയിൽ നിന്ന് മറിച്ചുവിൽക്കൽ തുടങ്ങിയ നിയമലംഘനങ്ങൾ പൂർണ്ണമായും ഇല്ലാതാക്കാൻ ഈ നീക്കത്തിലൂടെ സാധിക്കുമെന്ന് സാമൂഹിക കാര്യ മന്ത്രാലയം വ്യക്തമാക്കി. സൊസൈറ്റികളുടെ വരുമാനവും ചിലവും കൃത്യമായി നിരീക്ഷിക്കുന്നതിലൂടെ അനാവശ്യമായ സാമ്പത്തിക ധൂർത്ത് ഒഴിവാക്കാനും സാധിക്കും. ഉപഭോക്താക്കളെ സംബന്ധിച്ചിടത്തോളം സാധനങ്ങൾക്ക് കൃത്രിമമായി വില വർദ്ധിപ്പിക്കുന്നത് തടയാനും അവശ്യസാധനങ്ങൾ യഥാസമയം സ്റ്റോക്കിൽ ഉണ്ടെന്ന് ഉറപ്പുവരുത്താനും ഈ സംവിധാനം ഏറെ ഗുണകരമാകും.

എവിടെയെങ്കിലും ക്രമക്കേടുകൾ ശ്രദ്ധയിൽപ്പെട്ടാൽ ഈ ഓട്ടോമേറ്റഡ് സിസ്റ്റം വഴി മന്ത്രാലയത്തിന് ഉടനടി റിപ്പോർട്ട് ലഭിക്കുന്നതിനാൽ കുറ്റക്കാർക്കെതിരെ വേഗത്തിൽ നടപടിയെടുക്കാൻ സാധിക്കും. സഹകരണ മേഖലയെ കൂടുതൽ ശക്തിപ്പെടുത്തുന്നതിനും ഓഹരിയുടമകളുടെ അവകാശങ്ങൾ കൃത്യമായി സംരക്ഷിക്കുന്നതിനും ഈ ഡിജിറ്റൽ പരിവർത്തനം വലിയൊരു നാഴികക്കല്ലാകുമെന്നാണ് അധികൃതരുടെ വിലയിരുത്തൽ. ആദ്യഘട്ടത്തിൽ തിരഞ്ഞെടുത്ത സൊസൈറ്റികളിൽ നടപ്പിലാക്കുന്ന ഈ പദ്ധതി വൈകാതെ രാജ്യവ്യാപകമാക്കാനാണ് കുവൈറ്റ് ലക്ഷ്യമിടുന്നത്.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL

കുവൈത്തിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

കുവൈറ്റിൽ ഉദ്യോഗസ്ഥർക്കിടയിലും ഇനി ലഹരി പരിശോധന; ആദ്യഘട്ടം ആരംഭിച്ചു

കുവൈത്ത് ആഭ്യന്തര മന്ത്രാലയത്തിന് കീഴിലുള്ള ഉദ്യോഗസ്ഥർക്കിടയിൽ മയക്കുമരുന്ന് ഉൾപ്പെടെയുള്ള ലഹരി വസ്തുക്കളുടെ ഉപയോഗം കണ്ടെത്തുന്നതിനായി റാൻഡം പരിശോധനകൾ ആരംഭിച്ചു. ക്രിമിനൽ എവിഡൻസ് ഡിപ്പാർട്ട്‌മെന്റിന്റെ നേതൃത്വത്തിലാണ് പരിശോധനകൾ നടക്കുന്നതെന്ന് മന്ത്രാലയം അറിയിച്ചു. ജോലിസ്ഥലങ്ങളിൽ അച്ചടക്കം ശക്തിപ്പെടുത്താനും സുരക്ഷാ സേനാംഗങ്ങൾ സമൂഹത്തിന് മാതൃകയാകുന്ന രീതിയിൽ പ്രവർത്തിക്കുന്നുണ്ടെന്ന് ഉറപ്പാക്കാനും ലക്ഷ്യമിട്ടാണ് ഈ നടപടി. ആഭ്യന്തര മന്ത്രാലയം പുറത്തിറക്കിയ വാർത്താക്കുറിപ്പിലാണ് പദ്ധതിയുടെ വിശദാംശങ്ങൾ വ്യക്തമാക്കിയത്. ആദ്യഘട്ടത്തിൽ പൊലീസ് സ്പോർട്സ് ഫെഡറേഷനിലെ അംഗങ്ങളെയാണ് പരിശോധനയ്ക്ക് വിധേയമാക്കിയത്. ഫെഡറേഷൻ ചെയർമാൻ ബ്രിഗേഡിയർ ജനറൽ ഷെയ്ഖ് മുബാറക് അലി യൂസഫ് അൽ സബാഹ്, ഡെപ്യൂട്ടി ചെയർമാൻ, ബോർഡ് അംഗങ്ങൾ എന്നിവരടക്കം വിവിധ ഉദ്യോഗസ്ഥർ പരിശോധനയിൽ പങ്കെടുത്തു.

മയക്കുമരുന്ന് വിരുദ്ധ പ്രവർത്തനങ്ങൾ ശക്തമാക്കുന്നതിന്റെ ഭാഗമായി നിലവിൽ വന്ന 2025ലെ 159-ാം നമ്പർ നിയമത്തിന്റെ അടിസ്ഥാനത്തിലാണ് റാൻഡം പരിശോധനകൾ നടത്തുന്നതെന്ന് മന്ത്രാലയം വ്യക്തമാക്കി. ആഭ്യന്തര മന്ത്രാലയത്തിന്റെ എല്ലാ വിഭാഗങ്ങളിലേക്കും പരിശോധന വ്യാപിപ്പിക്കുമെന്നും ഇതിനായി പ്രത്യേക സമയക്രമം അംഗീകരിച്ചിട്ടുണ്ടെന്നും അധികൃതർ അറിയിച്ചു.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL

കുവൈത്ത് സെൻട്രൽ ജയിലിലെ തീപിടിത്തം: പരിക്കേറ്റ കേണൽ അന്തരിച്ചു

സുലൈബിയ സെൻട്രൽ ജയിലിലെ കെട്ടിടത്തിൽ ഉണ്ടായ തീപിടിത്തത്തിൽ ഗുരുതരമായി പരിക്കേറ്റ് ചികിത്സയിലായിരുന്ന ഉന്നത പോലീസ് ഉദ്യോഗസ്ഥൻ മരിച്ചു. ജനറൽ ഡയറക്ടറേറ്റ് ഓഫ് കറക്ഷണൽ ഇൻസ്റ്റിറ്റ്യൂഷൻസ് വിഭാഗത്തിലെ ഉദ്യോഗസ്ഥനായ കേണൽ സൗദ് അൽ-ഖംസാനാണ് അന്തരിച്ചത്.
കഴിഞ്ഞ ഞായറാഴ്ച ജയിലിന്റെ കെട്ടിടത്തിൽ തീപിടിത്തം ഉണ്ടായത്. കെട്ടിടത്തിന്റെ ഒന്നാം നിലയിലെ ഇടനാഴിയിൽ കാർപെറ്റുകളും ഫർണിച്ചറുകളും മാറ്റുന്നതുൾപ്പെടെയുള്ള അറ്റകുറ്റപ്പണികൾ പുരോഗമിക്കുകയായിരുന്ന സമയത്തായിരുന്നു അപകടം. അറ്റകുറ്റപ്പണികൾക്കിടെയുണ്ടായ വൈദ്യുത ഷോർട്ട് സർക്യൂട്ടിനെ തുടർന്ന് വലിയ സ്ഫോടനം സംഭവിച്ചിരിക്കാമെന്നാണ് പ്രാഥമിക നിഗമനം.

സംഭവത്തിൽ കേണൽ സൗദ് അൽ-ഖംസാൻ ഉൾപ്പെടെ ആറ് പേർക്ക് പരിക്കേറ്റിരുന്നു. പരിക്കേറ്റ ഉദ്യോഗസ്ഥരെയും തൊഴിലാളികളെയും ഉടൻ ആശുപത്രിയിൽ പ്രവേശിപ്പിച്ചെങ്കിലും കേണലിന്റെ ജീവൻ രക്ഷിക്കാൻ സാധിച്ചില്ല. കേണൽ സൗദ് അൽ-ഖംസാന്റെ നിര്യാണത്തിൽ കുവൈറ്റ് ആഭ്യന്തര മന്ത്രി ഷെയ്ഖ് ഫഹദ് അൽ യൂസുഫ് അൽ സബാഹ് അനുശോചനം രേഖപ്പെടുത്തി. ഔദ്യോഗിക കൃത്യനിർവഹണത്തിനിടെയാണ് അദ്ദേഹം ജീവൻ ബലിയർപ്പിച്ചതെന്നും, അദ്ദേഹത്തിന്റെ വേർപാട് പോലീസ് സേനയ്ക്ക് വലിയ നഷ്ടമാണെന്നും മന്ത്രി പറഞ്ഞു.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL