മുബാറക് അൽ-കബീർ ഗവർണറേറ്റിൽ 44 വയസ്സുകാരനായ കുവൈത്തി പൗരനെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. സംഭവത്തിൽ അസ്വാഭാവികതയുണ്ടെന്ന് സംശയിക്കുന്നതായി ഡെപ്യൂട്ടി പബ്ലിക് പ്രൊസിക്യൂട്ടർ വ്യക്തമാക്കിയതോടെ സുരക്ഷാ സേന സമഗ്രമായ അന്വേഷണം ആരംഭിച്ചു.
മരിച്ചയാളുടെ സഹോദരനാണ് സംഭവം ഓപ്പറേഷൻസ് റൂമിൽ വിളിച്ച് അറിയിച്ചത്. വിവരം ലഭിച്ച ഉടൻ തന്നെ സുരക്ഷാ ഉദ്യോഗസ്ഥരും ഫോറൻസിക് വിദഗ്ധരും സംഭവസ്ഥലത്തെത്തി പരിശോധനകൾ നടത്തി. തുടർന്ന് കേസ് ‘സംശയാസ്പദമായ മരണം’ (Suspicious Death) ആയി രജിസ്റ്റർ ചെയ്യാൻ ഡെപ്യൂട്ടി പബ്ലിക് പ്രൊസിക്യൂട്ടർ നിർദ്ദേശം നൽകുകയായിരുന്നു.
മരണകാരണം കൃത്യമായി കണ്ടെത്താൻ ഫോറൻസിക് മെഡിക്കൽ വിദഗ്ധരെ ചുമതലപ്പെടുത്തിയിട്ടുണ്ട്. ഇതുമായി ബന്ധപ്പെട്ട കൂടുതൽ വിവരങ്ങൾ ശേഖരിക്കാനും സാഹചര്യങ്ങൾ വിശകലനം ചെയ്യാനും പ്രത്യേക അന്വേഷണ സംഘത്തെയും നിയോഗിച്ചു. അത്യാധുനിക ഫോറൻസിക് സാങ്കേതികവിദ്യകൾ ഉപയോഗിച്ചായിരിക്കും അന്വേഷണം മുന്നോട്ട് പോകുക. മെഡിക്കൽ റിപ്പോർട്ടും ഫോറൻസിക് പരിശോധനാ ഫലവും പുറത്തുവന്നാൽ മാത്രമേ മരണത്തിലെ ദുരൂഹത നീങ്ങുകയുള്ളൂ. നിലവിൽ കേസ് അന്വേഷണ ഘട്ടത്തിലായതിനാൽ കൂടുതൽ വിവരങ്ങൾ അധികൃതർ വെളിപ്പെടുത്തിയിട്ടില്ല.