Abu Dhabi Police E-scooter seizures; റോഡുകളിൽ നിന്ന് ഇലക്ട്രിക് സ്കൂട്ടറുകൾ പിടിച്ചെടുക്കുന്നത് പോലീസിന്റെ പ്രധാന ലക്ഷ്യമല്ലെന്നും, അപകടങ്ങൾ ഒഴിവാക്കി കാൽനടയാത്രക്കാരുടെയും മറ്റ് റോഡ് ഉപയോക്താക്കളുടെയും ജീവനും സുരക്ഷയ്ക്കും മുൻഗണന നൽകാനാണ് നടപടിയെന്നും അബുദാബി പോലീസ് വ്യക്തമാക്കി. അപകടകരമായ ഡ്രൈവിംഗ് രീതികൾ തടയാനും സ്കൂട്ടറുകൾ സുരക്ഷിതമായും ഉത്തരവാദിത്തത്തോടെയും ഉപയോഗിക്കുന്നു എന്ന് ഉറപ്പാക്കാനുമാണ് വാഹനം കണ്ടുകെട്ടുന്ന നടപടികളിലേക്ക് കടക്കുന്നതെന്ന് ട്രാഫിക് ആൻഡ് സെക്യൂരിറ്റി പട്രോൾസ് ഡിപ്പാർട്ട്‌മെന്റ് (അൽ ഐൻ) ഡയറക്ടർ കേണൽ ജാബർ സഈദാൻ അൽ മൻസൂരി പറഞ്ഞു. അബുദാബി റേഡിയോയിലൂടെ സംസാരിക്കുകയായിരുന്നു അദ്ദേഹം. കുട്ടികൾ മുതൽ മുതിർന്നവർ വരെയുള്ള ആളുകൾ വ്യക്തിഗത യാത്രാമാർഗ്ഗമായി ഇ-സ്കൂട്ടറുകൾ തിരഞ്ഞെടുക്കുന്നുണ്ട്. എന്നാൽ, ചിലരുടെ അശ്രദ്ധമായ ഡ്രൈവിംഗ് കാൽനടയാത്രക്കാർക്ക് വലിയ ബുദ്ധിമുട്ടുകൾ സൃഷ്ടിക്കുകയും ഗുരുതരമായ അപകടങ്ങൾക്കും പരിക്കുകൾക്കും കാരണമാവുകയും ചെയ്യുന്നുണ്ടെന്ന് അദ്ദേഹം വിശദീകരിച്ചു. ഓടുന്ന മറ്റ് വാഹനങ്ങൾക്കിടയിലൂടെ പ്രധാന റോഡുകളിൽ ഇ-സ്കൂട്ടർ ഓടിക്കുന്നത് യാത്രക്കാരുടെ ജീവൻ തന്നെ അപകടത്തിലാക്കുന്നു. കൂടാതെ, കാൽനടക്കാർക്കുള്ള നടപ്പാതകളിൽ ആളുകൾക്ക് തടസ്സമുണ്ടാക്കുന്ന തരത്തിലും കൂട്ടിയിടികൾക്ക് കാരണമാകുന്ന തരത്തിലും സ്കൂട്ടർ ഓടിക്കുന്നതും വലിയ ആശങ്കയുണ്ടാക്കുന്ന പ്രവണതയാണെന്ന് അദ്ദേഹം ചൂണ്ടിക്കാട്ടി.

ട്രാഫിക് നിയമലംഘനങ്ങൾ നടത്തിയതിന് 2026-ലെ ആദ്യ പത്ത് മാസത്തിനിടെ 9,237 ഇലക്ട്രിക് സ്കൂട്ടറുകൾ പിടിച്ചെടുത്തതായി അബുദാബി പോലീസ് കഴിഞ്ഞ ദിവസം അറിയിച്ചിരുന്നു. പൊതുനിരത്തുകളിലും അനുവദനീയമല്ലാത്ത ഇടങ്ങളിലും വാഹനങ്ങൾക്കിടയിലൂടെയും സ്കൂട്ടർ ഓടിച്ചതിനാണ് ഇവ പിടിച്ചെടുത്തത്. കൂടാതെ, ഹെൽമെറ്റും മറ്റ് സുരക്ഷാ കവചങ്ങളും ധരിക്കാതിരിക്കുക, ചുറ്റുമുള്ള ഗതാഗത സാഹചര്യങ്ങൾ ശ്രദ്ധിക്കാതെ അശ്രദ്ധമായി വാഹനം ഓടിക്കുക തുടങ്ങിയ നിയമലംഘനങ്ങളും വ്യാപകമായി കണ്ടെത്തിയിട്ടുണ്ട്. ഫീൽഡ് പരിശോധനകൾ കർശനമാക്കുന്നതിനൊപ്പം ഉപയോക്താക്കൾക്കിടയിൽ ബോധവൽക്കരണ കാമ്പയിനുകൾ ശക്തമായി തുടരുമെന്നും കേണൽ അൽ മൻസൂരി പറഞ്ഞു. ഇ-സ്കൂട്ടറുകൾ മറ്റുള്ളവർക്ക് ശല്യമോ അപകടമോ ആകാതെ സുരക്ഷിതമായ ഒരു യാത്രാമാർഗ്ഗമായി തുടരുക എന്നതാണ് പോലീസിന്റെ പ്രധാന ലക്ഷ്യം. ഇ-സ്കൂട്ടറുകൾക്കായി നിശ്ചയിച്ചിട്ടുള്ള പ്രത്യേക ട്രാക്കുകളിൽ മാത്രം വാഹനം ഓടിക്കുക, ഹെൽമെറ്റും മറ്റ് സുരക്ഷാ ഉപകരണങ്ങളും നിർബന്ധമായും ധരിക്കുക, പ്രധാന റോഡുകളിലോ വാഹനങ്ങൾക്കിടയിലോ യാത്ര ചെയ്യുന്നത് പൂർണ്ണമായും ഒഴിവാക്കുക തുടങ്ങിയ ട്രാഫിക് നിർദ്ദേശങ്ങൾ കർശനമായി പാലിക്കണമെന്ന് അബുദാബി പോലീസ് ഉപയോക്താക്കളോട് ആവർത്തിച്ച് അഭ്യർത്ഥിച്ചു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t