യുഎഇയിൽ ആപ്പിളിന്റെ ആദ്യ മടക്കാവുന്ന ഫോണായ ‘ഐഫോൺ ഡ്യുവോ’ സ്വന്തമാക്കാൻ വൻ തിരക്ക്. ഇന്നലെ വൈകിട്ട് നാലിന് ആരംഭിച്ച പ്രീ-ബുക്കിങ്ങിന് മികച്ച പ്രതികരണമാണ് ലഭിക്കുന്നതെന്ന് വ്യാപാരികൾ പറയുന്നു. 8,499 ദിർഹം (രണ്ട് ലക്ഷത്തിലേറെ ഇന്ത്യൻ രൂപ) പ്രാരംഭ വിലയുള്ള ഫോൺ ഈ മാസം 23 മുതൽ വിപണിയിലെത്തും. സ്റ്റാർ വൈറ്റ്, നൈറ്റ് സ്കൈ എന്നീ രണ്ട് നിറങ്ങളിലാണ് ഫോൺ ലഭ്യമാകുക.

വിപണിയിലെത്തും മുൻപേ ആവശ്യക്കാർ ഏറെ; അധിക തുക നൽകാനും തയ്യാറായി ആരാധകർ

ഫോൺ പുറത്തിറങ്ങുന്ന ആദ്യ ദിവസം തന്നെ സ്വന്തമാക്കുന്നതിനായി 2,500 ദിർഹം വരെ അധികമായി നൽകാൻ ഉപയോക്താക്കൾ തയ്യാറാണെന്നാണ് വ്യാപാരികളുടെ വെളിപ്പെടുത്തൽ. അടുത്ത രണ്ടോ മൂന്നോ ആഴ്ചകളിൽ ഈ അധിക വില തുടരാനാണ് സാധ്യതയെന്നും അവർ വിലയിരുത്തുന്നു. 256 ജിബി, 512 ജിബി മോഡലുകൾക്കാണ് കൂടുതൽ ആവശ്യക്കാരുള്ളത്. രണ്ട് നിറങ്ങൾക്കും ഒരുപോലെ മികച്ച പ്രതികരണമാണ് ലഭിക്കുന്നത്.

ആപ്പിൾ നിരയിലെ വ്യത്യസ്തമായ ഈ മോഡൽ ആദ്യദിനം തന്നെ സ്വന്തമാക്കുന്നത് പല ആരാധകർക്കും അഭിമാനത്തിന്റെ ഭാഗമാണ്. ഐഫോൺ 17 പ്രോ മാക്സ് ഉപയോഗിക്കുന്നവരിൽ ചിലർ പുതിയ ഐഫോൺ 18 പ്രോ മാക്സിലേക്ക് മാറാനും താൽപര്യം പ്രകടിപ്പിക്കുന്നുണ്ട്. ഐഫോൺ 11, 15, 17 മോഡലുകൾ പുറത്തിറങ്ങിയ സമയത്തും സമാനമായ തിരക്ക് അനുഭവപ്പെട്ടിരുന്നു.

എന്നാൽ പുതിയ മോഡൽ ഉടൻ വാങ്ങുന്നതിനുപകരം കാത്തിരിക്കാനാണ് ചില ആപ്പിൾ ആരാധകരുടെ തീരുമാനം. ഐഫോൺ ഡ്യുവോയിൽ ഫേസ് ഐഡി സംവിധാനം ഇല്ലാത്തതാണ് ഇവർ ചൂണ്ടിക്കാട്ടുന്ന പ്രധാന പോരായ്മ. അടുത്ത വർഷം ഫേസ് ഐഡിയും മിനി ആപ്പിൾ പെൻസിലും ഉൾപ്പെടുത്തി പുതിയ പതിപ്പ് പുറത്തിറങ്ങുമെന്ന പ്രതീക്ഷയിൽ കാത്തിരിക്കാനാണ് ഇവരുടെ തീരുമാനം.