കുവൈത്തിലെ അബ്ബാസിയയിൽ വാട്ടർ മോട്ടോർ അഴിച്ചുമാറ്റിയതിനെ തുടർന്ന് കുടിവെള്ളം ലഭിക്കാതെ ദുരിതത്തിലായി 80-ലധികം ഇന്ത്യൻ കുടുംബങ്ങൾ. ദിവസങ്ങളായി തുടരുന്ന ജലപ്രതിസന്ധി കുട്ടികൾ, ഗർഭിണികൾ, ചെറിയ കുട്ടികളുള്ള കുടുംബങ്ങൾ, നഴ്സുമാർ ഉൾപ്പെടെയുള്ള ജോലി ചെയ്യുന്ന സ്ത്രീകൾ എന്നിവരുടെ ജീവിതം ഏറെ പ്രയാസത്തിലാക്കിയിരിക്കുകയാണ്.

അബ്ബാസിയ ബ്ലോക്ക് 4, സ്ട്രീറ്റ് 6-ലെ കെട്ടിടം നമ്പർ 158-ൽ താമസിക്കുന്ന കുടുംബങ്ങളാണ് പ്രതിസന്ധി നേരിടുന്നത്. ഒക്ടോബർ 14 വൈകുന്നേരത്തോടെയാണ് കെട്ടിടത്തിലെ ജലവിതരണം പൂർണമായും നിലച്ചതെന്ന് താമസക്കാർ പറയുന്നു. കെട്ടിടത്തിലെ കെയർടേക്കർ വാട്ടർ മോട്ടോർ അഴിച്ചുമാറ്റിയെന്നും പകരം പുതിയ മോട്ടോർ സ്ഥാപിക്കാൻ കെട്ടിട ഉടമ തയ്യാറാകുന്നില്ലെന്നുമാണ് ഇവരുടെ ആരോപണം.

കുടിക്കാനും ഭക്ഷണം പാകം ചെയ്യാനും കുളിക്കാനും വസ്ത്രങ്ങൾ അലക്കാനും വെള്ളമില്ലാത്ത സ്ഥിതിയാണെന്ന് കുടുംബങ്ങൾ പരാതിപ്പെടുന്നു. പലരും പണം നൽകി പുറത്തുനിന്ന് വെള്ളവും ഭക്ഷണവും വാങ്ങിയാണ് ദൈനംദിന ആവശ്യങ്ങൾ നിറവേറ്റുന്നത്. മറ്റു ചിലർ കെട്ടിടത്തിന്റെ താഴത്തെ നിലയിലുള്ള ടാങ്കിൽനിന്ന് വെള്ളം കോരിയെടുത്താണ് ഉപയോഗിക്കുന്നത്.

കുവൈത്ത് ആരോഗ്യ മന്ത്രാലയത്തിൽ ജോലി ചെയ്യുന്ന നഴ്സുമാരും സ്കൂൾ വിദ്യാർഥികളും ഗർഭിണികളും കൊച്ചുകുട്ടികളും ഉൾപ്പെടെ നിരവധി പേരാണ് കെട്ടിടത്തിൽ താമസിക്കുന്നത്. വിവിധ ഷിഫ്റ്റുകളിലായി ജോലി ചെയ്യുന്ന ജീവനക്കാർക്ക് ഡ്യൂട്ടിക്ക് പോകുന്നതിന് മുമ്പും ജോലി കഴിഞ്ഞ് തിരിച്ചെത്തിയ ശേഷവും വെള്ളമില്ലാത്തത് വലിയ ബുദ്ധിമുട്ടാണ് സൃഷ്ടിക്കുന്നത്. ദൈനംദിന ജീവിതത്തെ ബാധിക്കുന്നതിനൊപ്പം ആരോഗ്യപരമായും മാനസികമായും പ്രയാസങ്ങൾ നേരിടുന്നതായി താമസക്കാർ പറയുന്നു.

കഴിഞ്ഞ ഒന്നോ രണ്ടോ മാസമായി കെട്ടിടത്തിൽ ഇടയ്ക്കിടെ ജലവിതരണം തടസ്സപ്പെട്ടിരുന്നതായി പ്രവാസിയായ അതുൽ വ്യക്തമാക്കി. പ്രത്യേകിച്ച് രാത്രികാലങ്ങളിൽ മണിക്കൂറുകളോളം വെള്ളം ലഭിക്കാത്ത സാഹചര്യമുണ്ടായിരുന്നു. ഇക്കാര്യം കെയർടേക്കറെ പലതവണ അറിയിച്ചിട്ടും ശാശ്വത പരിഹാരമുണ്ടായില്ലെന്നും അദ്ദേഹം പറഞ്ഞു.

പ്രശ്നത്തിൽ കുവൈത്ത് അധികൃതർ അടിയന്തരമായി ഇടപെട്ട് ജലവിതരണം പുനഃസ്ഥാപിക്കണമെന്നും വാട്ടർ മോട്ടോർ അഴിച്ചുമാറ്റിയ സംഭവത്തിൽ അന്വേഷണം നടത്തണമെന്നുമാണ് ദുരിതത്തിലായ ഇന്ത്യൻ കുടുംബങ്ങളുടെ ആവശ്യം.