UAE flights low visibility; യുഎഇയിൽ നിലനിൽക്കുന്ന കാലാവസ്ഥാ വ്യതിയാനം വിമാന സർവീസുകളെ ബാധിച്ചേക്കാമെന്ന് ജനറൽ സിവിൽ ഏവിയേഷൻ അതോറിറ്റി (GCAA) അറിയിച്ചു. കാലാവസ്ഥയിലുണ്ടാകുന്ന മാറ്റങ്ങൾ രാജ്യത്തിന്റെ ചില ഭാഗങ്ങളിൽ കാഴ്ചാപരിധി (ഹൊറിസോണ്ടൽ വിസിബിലിറ്റി) കുറയാൻ കാരണമായേക്കാം. ഇത് വിമാന സർവീസുകളെ ബാധിക്കാനും ചെറിയ തോതിൽ സർവീസുകൾ വൈകാനും ഇടയാക്കുമെന്നും അധികൃതർ മുന്നറിയിപ്പ് നൽകി. ഇത്തരം പ്രതികൂല കാലാവസ്ഥകളിൽ ഉണ്ടാകുന്ന സാധാരണ പ്രവർത്തന വെല്ലുവിളികളുടെ ഭാഗമായാണ് ഇതെന്നും അതോറിറ്റി വ്യക്തമാക്കി. വ്യോമയാന സുരക്ഷാ മാനദണ്ഡങ്ങളും നടപടിക്രമങ്ങളും കർശനമായി പാലിച്ചുകൊണ്ട് എയർലൈനുകളും വിമാനത്താവള ഓപ്പറേറ്റർമാരും ആവശ്യമായ എല്ലാ മുൻകരുതലുകളും സ്വീകരിച്ചിട്ടുണ്ട്. വിമാനങ്ങളുടെ സമയക്രമത്തിലുണ്ടാകുന്ന മാറ്റങ്ങളും പുതിയ വിവരങ്ങളും അതത് എയർലൈനുകളും വിമാനത്താവള അധികൃതരും തങ്ങളുടെ ഔദ്യോഗിക ചാനലുകൾ വഴി യാത്രക്കാരെ യഥാസമയം അറിയിക്കുമെന്നും സിവിൽ ഏവിയേഷൻ അതോറിറ്റി കൂട്ടിച്ചേർത്തു.