Fake driving licence scam; വിദേശ രാജ്യങ്ങളിൽ നേരിട്ട് പോകാതെയോ ഡ്രൈവിംഗ് ടെസ്റ്റുകൾ പൂർത്തിയാക്കാതെയോ വ്യാജ ഡ്രൈവിംഗ് ലൈസൻസുകൾ സംഘടിപ്പിച്ചു നൽകിയ എട്ടംഗ അന്താരാഷ്ട്ര തട്ടിപ്പ് സംഘത്തെ ദുബായ് പോലീസ് അറസ്റ്റ് ചെയ്തു. അന്താരാഷ്ട്ര കരാറുകൾ പ്രകാരം ചില രാജ്യങ്ങളിലെ ഡ്രൈവിംഗ് ലൈസൻസുകൾ അധിക പരിശീലനമോ ടെസ്റ്റോ ഇല്ലാതെ യുഎഇ ഡ്രൈവിംഗ് ലൈസൻസുകളാക്കി മാറ്റിയെടുക്കാൻ (Licence Exchange) സാധിക്കും. ഈ നിയമം ദുരുപയോഗം ചെയ്താണ് സംഘം തട്ടിപ്പ് നടത്തിയത്. ഇത്തരത്തിൽ വ്യാജമായി തയ്യാറാക്കിയ ഒരു വിദേശ ലൈസൻസിന് 10,000 ദിർഹം വീതമാണ് ഇവർ ഉപഭോക്താക്കളിൽ നിന്ന് ഈടാക്കിയിരുന്നത്. ദുബായ് പോലീസിന്റെ ജനറൽ ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷൻ, യുഎഇ വിദേശകാര്യ മന്ത്രാലയം, ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ – RTA) എന്നിവർ സംയുക്തമായി നടത്തിയ അന്വേഷണത്തിലാണ് പ്രതികൾ പിടിയിലായത്. ദുബായ് പോലീസിലെ ഇക്കണോമിക് ക്രൈംസ് ഡിപ്പാർട്ട്‌മെന്റാണ് തട്ടിപ്പിന്റെ വിവരങ്ങൾ പുറത്തുവിട്ടത്. യുഎഇയിലെ ട്രാൻസാക്ഷൻ പ്രോസസിംഗ് (ടൈപ്പിംഗ്/രേഖകൾ ശരിയാക്കുന്ന) കേന്ദ്രങ്ങൾ മറയാക്കിയാണ് പ്രതികൾ ഇടപാടുകാരെ കണ്ടെത്തിയിരുന്നത്. അയൽരാജ്യങ്ങളിലേക്ക് യാത്ര ചെയ്യാതെയോ ഡ്രൈവിംഗ് പരിശീലനം നടത്താതെയോ ലൈസൻസ് തരപ്പെടുത്തി നൽകാമെന്ന് ഇവർ വാഗ്ദാനം ചെയ്തു. തുടർന്ന്, ഈ വ്യാജ രേഖകൾ ദുബായ് ആർടിഎയിൽ സമർപ്പിച്ച് നിയമപരമായി ലഭിച്ചതാണെന്ന വ്യാജേന യുഎഇ ലൈസൻസാക്കി മാറ്റിയെടുക്കുകയായിരുന്നു ഇവരുടെ രീതി. റോഡിൽ സുരക്ഷിതമായി വാഹനമോടിക്കാൻ ആവശ്യമായ യോഗ്യതകളും പരിശോധനകളും പൂർണ്ണമായും ഒഴിവാക്കാനാണ് ഇവർ ശ്രമിച്ചത്.

നിയമപരമായ നടപടികൾ പാലിക്കാതെ പണം നൽകി ഇത്തരം വ്യാജ സേവനങ്ങൾ ഉപയോഗിക്കുന്നവരും ക്രിമിനൽ കുറ്റത്തിന് ശിക്ഷിക്കപ്പെടുമെന്ന് ദുബായ് പോലീസ് ശക്തമായ മുന്നറിയിപ്പ് നൽകി. വ്യാജരേഖകൾ ഉപയോഗിച്ച് യുഎഇ ലൈസൻസ് നേടിയെടുത്താലും അത് മുൻകാല നിയമലംഘനങ്ങളിൽ നിന്നോ നിയമനടപടികളിൽ നിന്നോ വ്യക്തികളെ ഒഴിവാക്കില്ല. അനധികൃതമായി ലൈസൻസ് നേടുന്നത് കേവലം നിയമലംഘനം മാത്രമല്ല, പൊതുജനങ്ങളുടെ ജീവനും റോഡ് സുരക്ഷയ്ക്കും വലിയ ഭീഷണിയാണെന്ന് പോലീസ് വ്യക്തമാക്കി. കൃത്യമായ പരിശീലനവും ടെസ്റ്റുകളും വഴിയാണ് ഒരാൾക്ക് റോഡിൽ വാഹനമോടിക്കാനുള്ള യോഗ്യതയുണ്ടോ എന്ന് ഉറപ്പുവരുത്തുന്നത്. മതിയായ യോഗ്യതയില്ലാത്തവർ റോഡിലിറങ്ങുന്നത് കാൽനടയാത്രക്കാരുടെയും മറ്റ് വാഹനങ്ങളുടെയും സുരക്ഷയെ അപകടത്തിലാക്കും.
ആവശ്യമായ പരിശോധനകളോ പരിശീലനങ്ങളോ ഇല്ലാതെ എളുപ്പത്തിൽ ലൈസൻസ് വാഗ്ദാനം ചെയ്യുന്ന വ്യക്തികൾക്കും സ്ഥാപനങ്ങൾക്കുമെതിരെ ജാഗ്രത പാലിക്കണമെന്ന് ദുബായ് പോലീസ് പൊതുജനങ്ങളോട് അഭ്യർത്ഥിച്ചു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t