കുവൈത്തിൽ അടച്ചിട്ടിരിക്കുന്ന വിമാനത്താവളത്തിലെ ടെർമിനൽ T1 നവംബറിൽ വീണ്ടും പ്രവർത്തനം ആരംഭിക്കുമെന്ന് പ്രഖ്യാപനം. രാജ്യത്ത് നടക്കാനിരിക്കുന്ന സൗദി സൂപ്പർ കപ്പ് മത്സരങ്ങൾക്ക് മുന്നോടിയായാണ് ടെർമിനൽ തുറക്കുന്നത്. കുവൈത്ത് ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ-യൂസുഫാണ് ഇക്കാര്യം അറിയിച്ചത്.
ജാബർ അൽ അഹമ്മദ് അന്താരാഷ്ട്ര സ്റ്റേഡിയത്തിൽ സൗദി സൂപ്പർ കപ്പുമായി ബന്ധപ്പെട്ട സർക്കാർ പങ്കാളിത്ത സ്പോൺസർഷിപ്പ് കരാർ ഒപ്പിടുന്ന ചടങ്ങിൽ പങ്കെടുത്തശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. മത്സരങ്ങൾ കാണാനെത്തുന്ന സൗദി ആരാധകരുടെ യാത്രയും രാജ്യത്തേക്കുള്ള പ്രവേശനവും സുഗമമാക്കുന്നതിനായി ആഭ്യന്തര മന്ത്രാലയം വിവിധ ക്രമീകരണങ്ങൾ ഏർപ്പെടുത്തിയിട്ടുണ്ടെന്നും അദ്ദേഹം വ്യക്തമാക്കി.
ഇതിന്റെ ഭാഗമായി നുവൈസീബ് അതിർത്തി ചെക്ക്പോസ്റ്റിന്റെ ശേഷി വർധിപ്പിക്കും. യാത്രക്കാരെ സ്വീകരിക്കുന്നതിനായി ഇവിടെ 20 പ്രത്യേക കൗണ്ടറുകൾ സജ്ജീകരിക്കാനാണ് തീരുമാനം. ഇതിലൂടെ അതിർത്തി കടന്നുള്ള യാത്രാ നടപടികൾ കൂടുതൽ വേഗത്തിലാക്കാൻ കഴിയുമെന്നാണ് പ്രതീക്ഷ.
സൂപ്പർ കപ്പിൽ പങ്കെടുക്കുന്ന കളിക്കാർക്കും ടീം മാനേജ്‌മെന്റ് അംഗങ്ങൾക്കും വിമാനത്താവളത്തിലെ ബയോമെട്രിക് വിരലടയാള പരിശോധനയിൽ നിന്ന് ഇളവും അനുവദിക്കും. പകരം, കുവൈത്തിലേക്കുള്ള പ്രവേശനവും മടക്കയാത്രയും എളുപ്പമാക്കുന്നതിനായി പ്രത്യേക തിരിച്ചറിയൽ കാർഡുകൾ നൽകും.
മത്സരങ്ങൾക്കായി എത്തുന്ന ടീമുകൾക്കും ഉദ്യോഗസ്ഥർക്കും ആരാധകർക്കും തടസ്സരഹിതമായ യാത്ര ഉറപ്പാക്കുന്നതിന്റെ ഭാഗമായാണ് ഈ നടപടികൾ. ടെർമിനൽ T1 വീണ്ടും തുറക്കുന്നതും അതിർത്തിയിലെ സൗകര്യങ്ങൾ വിപുലീകരിക്കുന്നതും കുവൈത്തിലെ കായികമേളയ്ക്കുള്ള ഒരുക്കങ്ങൾക്ക് കൂടുതൽ വേഗം നൽകുമെന്നാണ് പ്രതീക്ഷിക്കുന്നത്.
