Dubai petroleum products safety; ദുബായിൽ പെട്രോളിയം ഉൽപ്പന്നങ്ങളുടെ വ്യാപാര രംഗത്ത് സുരക്ഷയും നിയമപാലനവും കർശനമാക്കാൻ ദുബായ് സുപ്രീം കൗൺസിൽ ഓഫ് എനർജി (DSCE) നടപടി തുടങ്ങി. പെട്രോളിയം ഉൽപ്പന്നങ്ങളുടെ സംഭരണം, ഗതാഗതം, വിതരണം തുടങ്ങിയ എല്ലാ ഘട്ടങ്ങളിലും സുരക്ഷിതവും കാര്യക്ഷമവുമായ പ്രവർത്തനങ്ങൾ ഉറപ്പാക്കുന്നതിന്റെ ഭാഗമായാണ് ഈ തീരുമാനം. മേഖലയിലെ സുരക്ഷാ മാനദണ്ഡങ്ങൾ ലംഘിക്കുന്നതായും ലൈസൻസില്ലാത്ത കേന്ദ്രങ്ങളിൽ ഡീസൽ സംഭരിക്കുന്നതായും അധികൃതരുടെ പരിശോധനയിൽ കണ്ടെത്തിയതിനെ തുടർന്നാണ് നടപടി കർശനമാക്കിയിരിക്കുന്നത്. എക്സിക്യൂട്ടീവ് കൗൺസിൽ റെസലൂഷൻ നമ്പർ 85/2025-ന്റെ അടിസ്ഥാനത്തിലാണ് ഈ നിയന്ത്രണങ്ങൾ നടപ്പിലാക്കുന്നത്. പെട്രോളിയം വ്യാപാര മേഖലയിലെ കാര്യക്ഷമതയും വിശ്വാസ്യതയും വർദ്ധിപ്പിക്കുന്നതിനും അനധികൃത പ്രവർത്തനങ്ങളും സുരക്ഷാ വീഴ്ചകളും തടയുന്നതിനും ഈ ചട്ടങ്ങൾ വഴിയൊരുക്കുന്നു. പെട്രോളിയം വ്യാപാരത്തിൽ ഏർപ്പെട്ടിരിക്കുന്ന എല്ലാ കമ്പനികളും കൃത്യമായ ലൈസൻസുകളും പെർമിറ്റുകളും കൈവശം വെക്കണമെന്ന് ദുബായ് റെഗുലേറ്ററി കമ്മിറ്റി ഫോർ പെട്രോളിയം പ്രോഡക്ട്സ് ചെയർമാൻ അഹമ്മദ് ബുട്ടി അൽ മുഹൈർബി വ്യക്തമാക്കി. സംഭരണ കേന്ദ്രങ്ങളും ഗതാഗത മാർഗ്ഗങ്ങളും അംഗീകൃത മാനദണ്ഡങ്ങൾ കർശനമായി പാലിക്കണം. ജീവനക്കാരുടെ സുരക്ഷ, അപകടസാധ്യത ലഘൂകരണം, പരിസ്ഥിതി സംരക്ഷണം എന്നിവയ്ക്ക് കമ്പനികൾ ഉയർന്ന മുൻഗണന നൽകണം.

സർക്കാരിന്റെ വിവിധ വകുപ്പുകളുമായി ചേർന്ന് ഡി.എസ്.സി.ഇ നടത്തിയ പരിശോധനകളിൽ ലൈസൻസില്ലാത്ത കേന്ദ്രങ്ങളിൽ ഡീസൽ സൂക്ഷിക്കുന്നതും സുരക്ഷാ മാനദണ്ഡങ്ങൾ പാലിക്കാത്ത രീതിയിൽ അത് കടത്തുന്നതും കണ്ടെത്തിയിട്ടുണ്ട്. ഇത്തരം കാര്യങ്ങൾ പെട്രോൾ ചോർച്ചയ്ക്കും വലിയ പാരിസ്ഥിതിക പ്രശ്നങ്ങൾക്കും കാരണമാകുമെന്നതിനാൽ മുഴുവൻ ഘട്ടങ്ങളിലും കർശന നിരീക്ഷണം അത്യാവശ്യമാണെന്ന് കൗൺസിൽ വ്യക്തമാക്കി. ഡീസൽ, എൽ.പി.ജി മേഖലകളിൽ പ്രത്യേക പരിശോധനാ ക്യാമ്പെയ്നുകൾ തുടരുന്നുണ്ട്. 2022 ജൂലൈയിൽ പ്രവർത്തനം ആരംഭിച്ച ജോയിന്റ് ഫീൽഡ് ഇൻസ്പെക്ഷൻ ടീം ഇതുവരെ എൽ.പി.ജി മേഖലയിൽ മാത്രം 449 സംയുക്ത പരിശോധനകൾ നടത്തിയിട്ടുണ്ട്. ഈ സമഗ്രമായ നിരീക്ഷണത്തിലൂടെ അനധികൃത വ്യാപാരങ്ങൾ തടയാനും ജീവനക്കാരുടെയും പൊതുജനങ്ങളുടെയും പരിസ്ഥിതിയുടെയും സുരക്ഷ ഉറപ്പാക്കാനും ദുബായ് ലക്ഷ്യമിടുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t