Dubai Rent Increase; ദുബായിൽ വാടകക്കാരുടെ അവകാശങ്ങൾ സംരക്ഷിക്കുന്നതിന് കൃത്യമായ നിയമാവലികളുണ്ടെന്നും റെറയുടെ അനുമതിയില്ലാതെ വാടക കൂട്ടാൻ ഉടമകൾക്ക് അധികാരമില്ലെന്നും ദുബായ് ലാൻഡ് ഡിപ്പാർട്ട്‌മെന്റ് വ്യക്തമാക്കുന്നു. റിയൽ എസ്റ്റേറ്റ് റെഗുലേറ്ററി ഏജൻസി (റെറ) പുറത്തിറക്കുന്ന റെന്റ് ഇൻഡക്സ് പ്രകാരം അനുമതിയില്ലെങ്കിൽ വീട്ടുടമസ്ഥർക്ക് ഏകപക്ഷീയമായി വാടക വർധിപ്പിക്കാൻ നിയമപരമായി കഴിയില്ല. കരാർ പുതുക്കുമ്പോൾ വാടകയിലോ വ്യവസ്ഥകളിലോ മാറ്റം വരുത്താൻ ആഗ്രഹിക്കുന്ന ഉടമ, നിലവിലെ കരാർ അവസാനിക്കുന്നതിന് കുറഞ്ഞത് 90 ദിവസം മുമ്പെങ്കിലും വാടകക്കാരന് രേഖാമൂലം നോട്ടീസ് നൽകിയിരിക്കണം. 90 ദിവസത്തെ നോട്ടീസ് നൽകാതെയുള്ള വാടക വർധനവ് നിയമപരമായി നിലനിൽക്കില്ല. ഇതിനുപുറമെ ദുബായ് വാടക നിയമപ്രകാരം കൃത്യമായ മാനദണ്ഡങ്ങൾ പാലിച്ചുമാത്രമേ നിരക്കുകൾ ഉയർത്താൻ സാധിക്കൂ. ഒരു പ്രദേശത്തെ സമാനമായ ഫ്ലാറ്റുകളുടെ ശരാശരി വാടക നിരക്കിനേക്കാൾ 10 ശതമാനം വരെ മാത്രമാണ് നിങ്ങളുടെ നിലവിലെ വാടക കുറവെങ്കിൽ ഒരു രൂപ പോലും വാടക കൂട്ടാൻ ഉടമയ്ക്ക് അവകാശമില്ല. വാടകയിലെ വ്യത്യാസം 11 മുതൽ 20 ശതമാനം വരെയാണെങ്കിൽ പരമാവധി അഞ്ച് ശതമാനവും, 21 മുതൽ 30 ശതമാനം വരെയാണെങ്കിൽ പത്ത് ശതമാനവും മാത്രമേ വർധിപ്പിക്കാൻ പാടുള്ളൂ. നിരക്കിലെ വ്യത്യാസം 31 മുതൽ 40 ശതമാനം വരെയാണെങ്കിൽ പരമാവധി 15 ശതമാനവും, 40 ശതമാനത്തിലധികമാണെങ്കിൽ ഇരുപത് ശതമാനവും വരെ മാത്രമേ വാടക ഉയർത്താൻ നിയമം അനുവദിക്കുന്നുള്ളൂ. ദുബായ് ലാൻഡ് ഡിപ്പാർട്ട്‌മെന്റിന്റെ ‘സ്മാർട്ട് റെന്റൽ ഇൻഡക്സ്’ പരിശോധിച്ചാൽ ഓരോ പ്രദേശത്തെയും അനുവദനീയമായ വാടക എത്രയെന്ന് വാടകക്കാർക്ക് നേരിട്ട് മനസ്സിലാക്കാം. റെറ ഇൻഡക്സ് പ്രകാരം വാടക വർധനവ് അനുവദനീയമല്ലെങ്കിൽ ഉടമ ആവശ്യപ്പെടുന്ന തുക നൽകാൻ വാടകക്കാർ ബാധ്യസ്ഥരല്ല. വാടക കൂട്ടുന്നതുമായി ബന്ധപ്പെട്ട് ഉടമയുമായി തർക്കമുണ്ടാകുകയും പരസ്പര ധാരണയിൽ എത്താൻ കഴിയാതെ വരികയും ചെയ്താൽ, വാടകക്കാർക്ക് ദുബായിലെ റെന്റൽ ഡിസ്‌പ്യൂട്ട് സെന്ററിനെ (RDC) സമീപിച്ച് ഔദ്യോഗികമായി പരാതി നൽകാം. പരിശോധനകൾക്ക് ശേഷം ആർ.ഡി.സി നിശ്ചയിക്കുന്ന ന്യായമായ നിരക്കായിരിക്കും നിയമപരമായി നിലനിൽക്കുക. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t