കുവൈത്തിൽ തൊഴിൽ കരാർ അവസാനിപ്പിക്കാം എപ്പോൾ? പ്രവാസികൾ അറിയേണ്ട നിർദേശങ്ങൾ

കുവൈത്തിൽ തൊഴിൽ കരാർ അവസാനിപ്പിക്കാവുന്ന സാഹചര്യങ്ങൾ വിശദീകരിച്ച് പബ്ലിക് അതോറിറ്റി ഫോർ മാൻപവർ (PAM) മാർഗനിർദേശം പുറത്തിറക്കി. തൊഴിൽ നിയമപ്രകാരം തൊഴിലാളികൾക്കും തൊഴിലുടമകൾക്കും പ്രത്യേക അവകാശങ്ങളും ബാധ്യതകളും ഉണ്ടെന്നും നിശ്ചിത സാഹചര്യങ്ങളിൽ നിയമപരമായി തന്നെ തൊഴിൽ കരാർ അവസാനിപ്പിക്കാമെന്നും PAM വ്യക്തമാക്കി.

കരാർ സ്വാഭാവികമായി അവസാനിക്കുന്ന സാഹചര്യങ്ങൾ

നിയമപ്രകാരം താഴെപ്പറയുന്ന സാഹചര്യങ്ങളിൽ തൊഴിൽ കരാർ അവസാനിക്കാം:

തൊഴിലാളിയുടെ മരണം.
ജോലി നിർവഹിക്കാൻ തൊഴിലാളിക്ക് കഴിയില്ലെന്ന് സ്ഥിരീകരിക്കപ്പെടുന്നത്.
നിയമപ്രകാരം അനുവദിച്ചിട്ടുള്ള അസുഖാവധി പൂർണമായി ഉപയോഗിച്ചുതീരുന്നത്.
സ്ഥാപനം സ്ഥിരമായി അടച്ചുപൂട്ടുന്നത്.
തൊഴിലുടമ പാപ്പരാണെന്ന് പ്രഖ്യാപിക്കുന്ന അന്തിമ കോടതി വിധി ഉണ്ടാകുന്നത്.

തൊഴിലാളിക്കും കരാർ അവസാനിപ്പിക്കാം

നിയമം അനുവദിക്കുന്ന പ്രത്യേക സാഹചര്യങ്ങളിൽ തൊഴിലാളിക്കും തൊഴിൽ കരാർ അവസാനിപ്പിക്കാനുള്ള അവകാശമുണ്ട്. ചില സാഹചര്യങ്ങളിൽ മുൻകൂർ അറിയിപ്പ് നൽകാതെയും ജോലി ഉപേക്ഷിക്കാനും സർവീസ് അവസാന ആനുകൂല്യത്തിനുള്ള അവകാശം നിലനിർത്താനും തൊഴിലാളിക്ക് സാധിക്കും.

തൊഴിലുടമ തൊഴിൽ കരാറിലെയോ തൊഴിൽ നിയമത്തിലെയോ വ്യവസ്ഥകൾ ലംഘിക്കുന്ന സാഹചര്യം, തൊഴിലുടമയോ അദ്ദേഹത്തിന്റെ പ്രതിനിധിയോ തൊഴിലാളിയെ ആക്രമിക്കുന്ന സാഹചര്യം, തൊഴിലാളിയുടെ സുരക്ഷയ്ക്കോ ആരോഗ്യത്തിനോ ഗുരുതരമായ ഭീഷണി നേരിടുന്ന സാഹചര്യം എന്നിവ ഇതിൽ ഉൾപ്പെടുന്നു. ഇത്തരം സാഹചര്യങ്ങളിൽ നിയമത്തിലെ വ്യവസ്ഥകൾക്ക് വിധേയമായാണ് തൊഴിലാളിക്ക് ഈ അവകാശം ഉപയോഗിക്കാനാകുക.

തൊഴിലുടമയ്ക്കും പിരിച്ചുവിടാം

തൊഴിൽ നിയമം അനുവദിക്കുന്ന സാഹചര്യങ്ങളിൽ തൊഴിലുടമയ്ക്കും മുൻകൂർ അറിയിപ്പ് നൽകാതെ തൊഴിലാളിയുടെ സേവനം അവസാനിപ്പിക്കാം. കാലാവധി നിശ്ചയിച്ചിട്ടില്ലാത്ത തൊഴിൽ കരാറുകൾ ആവശ്യമായ മുൻകൂർ അറിയിപ്പ് നൽകി അവസാനിപ്പിക്കാനും സാധിക്കും.

അതേസമയം, നിയമത്തിൽ പ്രത്യേകം വ്യക്തമാക്കിയിട്ടുള്ള ഗുരുതരമായ സാഹചര്യങ്ങളിൽ മുൻകൂർ അറിയിപ്പില്ലാതെയും തൊഴിലാളിയെ പിരിച്ചുവിടാൻ തൊഴിലുടമയ്ക്ക് അധികാരമുണ്ട്.

അന്യായ പിരിച്ചുവിടലിനെതിരെ നിയമനടപടി

തന്നെ അന്യായമായാണ് പിരിച്ചുവിട്ടതെന്ന് തൊഴിലാളിക്ക് തോന്നുന്ന പക്ഷം പിരിച്ചുവിടലിനെതിരെ നിയമപരമായി ചോദ്യം ചെയ്യാനുള്ള അവകാശമുണ്ടെന്നും PAM വ്യക്തമാക്കി.

തൊഴിൽ കരാർ അവസാനിപ്പിക്കുന്ന സാഹചര്യമനുസരിച്ച് കുവൈത്ത് തൊഴിൽ നിയമത്തിലെ 41, 44, 46, 48, 49, 50 വകുപ്പുകളിലെ വ്യവസ്ഥകളാണ് ബാധകമാകുന്നതെന്നും PAM അറിയിച്ചു.