ട്രാഫിക് സിഗ്നലുകൾ മാറുന്നതിന് മുമ്പ് ഡ്രൈവർമാർക്കും കാൽനടയാത്രക്കാർക്കും മുന്നറിയിപ്പ് നൽകുന്ന പുതിയ ട്രാഫിക് ലൈറ്റ് പ്രീ-അലർട്ട് സംവിധാനം കുവൈത്തിൽ നിലവിൽ വന്നു. സിഗ്നൽ മാറ്റം മുൻകൂട്ടി മനസ്സിലാക്കി സുരക്ഷിതമായി പ്രതികരിക്കാൻ റോഡ് ഉപയോക്താക്കൾക്ക് കൂടുതൽ സമയം നൽകുകയാണ് സംവിധാനത്തിന്റെ ലക്ഷ്യം.ട്രാഫിക് ലൈറ്റ് മാറുന്നതിന് തൊട്ടുമുമ്പ് പ്രീ-അലർട്ട് പ്രവർത്തിക്കും. ഇതിലൂടെ വരാനിരിക്കുന്ന സിഗ്നൽ മാറ്റം മുൻകൂട്ടി മനസ്സിലാക്കി വാഹനത്തിന്റെ വേഗം നിയന്ത്രിക്കാനോ ആവശ്യമായാൽ വാഹനം നിർത്താനോ ഡ്രൈവർമാർക്ക് സാധിക്കും. കാൽനടയാത്രക്കാർക്കും റോഡ് മുറിച്ചുകടക്കുന്നതുമായി ബന്ധപ്പെട്ട് കൂടുതൽ ജാഗ്രത പാലിക്കാൻ ഇത് സഹായിക്കും.
രണ്ട് തരത്തിലുള്ള മുന്നറിയിപ്പുകൾ
റെഡ് ലൈറ്റ് അലർട്ട്:
സിഗ്നൽ മാറ്റം വരുന്നതായി ഡ്രൈവർമാർക്ക് മുൻകൂട്ടി അറിയിപ്പ് നൽകും. റോഡിന്റെ സാഹചര്യം വിലയിരുത്തി സുരക്ഷിതമായി മുന്നോട്ടുപോകാനോ ആവശ്യമായ നടപടികൾ സ്വീകരിക്കാനോ ഇത് സഹായിക്കും.
ഗ്രീൻ ലൈറ്റ് അലർട്ട്:
സിഗ്നൽ മാറുന്നതിന് മുമ്പ് വേഗത കുറച്ച് ക്രമേണയും സുരക്ഷിതമായും വാഹനം നിർത്താൻ ഡ്രൈവർമാർക്ക് മുന്നറിയിപ്പ് നൽകും.
സിഗ്നൽ മാറ്റങ്ങളോട് പ്രതികരിക്കാൻ ഡ്രൈവർമാർക്കും കാൽനടയാത്രക്കാർക്കും കൂടുതൽ സമയം ലഭിക്കുന്നതോടെ റോഡ് സുരക്ഷ മെച്ചപ്പെടുത്താൻ പുതിയ സംവിധാനത്തിന് കഴിയുമെന്ന് അധികൃതർ വ്യക്തമാക്കി. ട്രാഫിക് സിഗ്നലുകൾക്ക് സമീപമുള്ള പെട്ടെന്നുള്ള ബ്രേക്കിങ്, ആശയക്കുഴപ്പം, അപകടസാധ്യത എന്നിവ കുറയ്ക്കുന്നതിനും ട്രാഫിക് നിയമങ്ങൾ കൂടുതൽ സുരക്ഷിതമായി പാലിക്കുന്നതിനും പ്രീ-അലർട്ട് സംവിധാനം സഹായിക്കുമെന്നാണ് പ്രതീക്ഷ.
