Etihad Rail car rental service; യുഎഇയിലെ ദേശീയ പാസഞ്ചർ റെയിൽ ശൃംഖലയായ ഇത്തിഹാദ് റെയിലിൽ യാത്ര ചെയ്യുന്നവർക്ക് തങ്ങളുടെ ലക്ഷ്യസ്ഥാനങ്ങളിലേക്ക് തടസ്സമില്ലാതെ എത്തിച്ചേരാൻ പുതിയ സൗകര്യമൊരുങ്ങുന്നു. രാജ്യത്ത് ആദ്യമായി അവതരിപ്പിക്കുന്ന ‘റെയിൽ ടു റോഡ്’ പദ്ധതിയിലൂടെ ട്രെയിൻ സ്റ്റേഷനുകളിൽ നിന്ന് നേരിട്ട് കാറുകൾ വാടകയ്‌ക്കെടുക്കാൻ യാത്രക്കാർക്ക് സാധിക്കും. ഇതിനായി പ്രമുഖ അന്താരാഷ്ട്ര കാർ റെന്റൽ കമ്പനിയായ ‘ത്രിഫ്റ്റി യുഎഇ’യുമായി ഇത്തിഹാദ് റെയിൽ അഞ്ചു വർഷത്തെ കരാറിൽ ഒപ്പുവെച്ചു. ഇത്തിഹാദ് റെയിലിന്റെ മൊബൈൽ ആപ്പ്, വെബ്‌സൈറ്റ് എന്നിവ വഴിയോ അല്ലെങ്കിൽ ത്രിഫ്റ്റിയുടെ ഡിജിറ്റൽ പ്ലാറ്റ്‌ഫോം വഴിയോ യാത്രക്കാർക്ക് വാഹനങ്ങൾ മുൻകൂട്ടി ബുക്ക് ചെയ്യാം. ട്രെയിൻ ടിക്കറ്റുകൾ ബുക്ക് ചെയ്യുന്നതിനോടൊപ്പം തന്നെ കാർ റെന്റൽ സേവനവും ലഭ്യമാക്കുന്ന തരത്തിലുള്ള ഒരു ഏകീകൃത ഡിജിറ്റൽ സംവിധാനമാണ് അധികൃതർ ലക്ഷ്യമിടുന്നത്. ഇതിനുപുറമെ, റെയിൽ ശൃംഖലയിലെ 11 പാസഞ്ചർ സ്റ്റേഷനുകളിലും യാത്രക്കാർക്ക് സഹായത്തിനായി ഡിജിറ്റൽ കിയോസ്കുകളും പ്രത്യേക കൗണ്ടറുകളും പ്രവർത്തിക്കും. റെയിൽവേ സ്റ്റേഷനുകളിൽ നിന്ന് അകലെയുള്ള സ്ഥലങ്ങളിലേക്ക് യാത്ര ചെയ്യേണ്ടവർക്കും വിനോദസഞ്ചാരികൾക്കും ഏറെ പ്രയോജനകരമാകുന്നതാണ് ഈ പദ്ധതി. തുടക്കത്തിൽ 500 വാഹനങ്ങളാണ് ഇതിനായി മാറ്റിവെക്കുന്നത്. വരും വർഷങ്ങളിൽ യാത്രക്കാരുടെ തിരക്കിനനുസരിച്ച് വാഹനങ്ങളുടെ എണ്ണം വർദ്ധിപ്പിക്കും. ഈ സേവനം മികച്ച രീതിയിൽ നടപ്പിലാക്കുന്നതിനായി അടുത്ത അഞ്ച് വർഷത്തിനുള്ളിൽ 10 മില്യൺ ദിർഹത്തിലധികം രൂപയുടെ നിക്ഷേപമാണ് ത്രിഫ്റ്റി യുഎഇ നടത്തുന്നത്. കൂടാതെ, മികച്ച സേവനം നൽകുന്നതിനായി നിർമ്മിത ബുദ്ധി (AI) അടിസ്ഥാനമാക്കിയുള്ള ബുക്കിംഗ് ഫീച്ചറുകളും പ്ലാറ്റ്‌ഫോമിൽ ഉൾപ്പെടുത്തും. അബുദാബിയെയും ഫുജൈറയെയും ബന്ധിപ്പിച്ചുകൊണ്ടുള്ള പാസഞ്ചർ സർവീസിന്റെ ആദ്യഘട്ടം കഴിഞ്ഞ ജൂൺ 30-ന് ആരംഭിച്ചിരുന്നു. ശൃംഖലയുടെ കൂടുതൽ വിപുലീകരണം 2026 സെപ്റ്റംബറോടെ നടക്കും. ദുബായിലെ ജുമൈറ ഗോൾഫ് എസ്റ്റേറ്റിന് സമീപമുള്ള സ്റ്റേഷനും ഷാർജയിലെ അൽ ദൈദ് സ്റ്റേഷനും 2026 സെപ്റ്റംബർ 30-ന് തുറക്കുന്നതോടെ രാജ്യത്തെ പ്രധാന നഗരങ്ങളിലേക്കുള്ള റെയിൽ കണക്റ്റിവിറ്റി വർദ്ധിക്കും. അബുദാബിയിലെ അൽ ദഫ്ര മേഖലയിലുള്ള മദീനത്ത് സായിദ്, ലിവ സ്റ്റേഷനുകൾ 2026 നവംബർ 30-നും അൽ സില, അൽ ദന്ന, അൽ മിർഫ സ്റ്റേഷനുകൾ ഡിസംബർ 30-നും പ്രവർത്തനമാരംഭിക്കും. 2027 മാർച്ച് 30-ന് ഷാർജ യൂണിവേഴ്‌സിറ്റി സിറ്റി സ്റ്റേഷൻ കൂടി തുറക്കുന്നതോടെ പാസഞ്ചർ റെയിൽ ശൃംഖലയുടെ ആദ്യഘട്ടം പൂർത്തിയാകും. ശൃംഖല പൂർണ്ണതോതിൽ പ്രവർത്തനസജ്ജമാകുന്നതോടെ പ്രതിവർഷം ഒരു കോടിയോളം യാത്രക്കാർ ഇത്തിഹാദ് റെയിൽ ഉപയോഗിക്കുമെന്നാണ് പ്രതീക്ഷിക്കുന്നത്. റെയിൽ യാത്രയെയും റോഡ് യാത്രയെയും സ്മാർട്ട് ആയി ബന്ധിപ്പിക്കുന്ന ഈ പുതിയ പദ്ധതി യുഎഇയിലെ യാത്രാ മേഖലയിൽ വലിയ മാറ്റങ്ങൾ കൊണ്ടുവരുമെന്ന് അധികൃതർ അറിയിച്ചു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t