കുവൈത്തിൽ എൽപിജി സിലിണ്ടർ വിതരണത്തിൽ സുപ്രധാന മാറ്റം പ്രഖ്യാപിച്ച് കുവൈത്ത് നാഷണൽ പെട്രോളിയം കമ്പനി (KNPC). ഓഗസ്റ്റ് 5 മുതൽ ഗാർഹിക എൽപിജി സിലിണ്ടറുകൾക്ക് മുകളിൽ ഘടിപ്പിച്ചിരുന്ന പരമ്പരാഗത പ്ലാസ്റ്റിക് സുരക്ഷാ ക്യാപ്പുകൾ ഒഴിവാക്കി പുതിയ വിതരണ രീതി നടപ്പിലാക്കുമെന്ന് കമ്പനി അറിയിച്ചു. പ്ലാസ്റ്റിക് മാലിന്യം കുറയ്ക്കുകയും പരിസ്ഥിതി സംരക്ഷണം ശക്തിപ്പെടുത്തുകയും ചെയ്യുന്ന സർക്കാർ പദ്ധതികളുടെ ഭാഗമായാണ് ഈ തീരുമാനം. പ്ലാസ്റ്റിക് ക്യാപ്പുകൾ ഒഴിവാക്കിയാലും സിലിണ്ടറുകളുടെ സുരക്ഷയിലോ ഗുണനിലവാരത്തിലോ യാതൊരു കുറവും ഉണ്ടാകില്ലെന്ന് KNPC വ്യക്തമാക്കി.
പുതിയ സംവിധാനത്തിൽ സിലിണ്ടറുകൾ വിതരണം ചെയ്യുന്നതിന് മുമ്പ് എല്ലാ സുരക്ഷാ പരിശോധനകളും പതിവുപോലെ തുടരും. ഉപഭോക്താക്കൾ സിലിണ്ടർ സ്വീകരിക്കുന്നതിന് മുൻപ് വാൽവും സീലും സുരക്ഷിതമാണെന്ന് ഉറപ്പുവരുത്തണമെന്നും കമ്പനി നിർദേശിച്ചു. സംശയകരമായ സാഹചര്യങ്ങളുണ്ടെങ്കിൽ സിലിണ്ടർ സ്വീകരിക്കാതെ ഉടൻ അധികൃതരെ അറിയിക്കണമെന്നും മുന്നറിയിപ്പുണ്ട്. പ്ലാസ്റ്റിക് ഉപയോഗം കുറച്ച് കൂടുതൽ പരിസ്ഥിതി സൗഹൃദമായ പ്രവർത്തനങ്ങളിലേക്ക് മാറാനുള്ള ദേശീയ ശ്രമങ്ങളുടെ ഭാഗമായാണ് ഈ നടപടിയെന്ന് KNPC വ്യക്തമാക്കി. പുതിയ സംവിധാനം നടപ്പിലാക്കിയാലും എൽപിജി വിതരണത്തിൽ യാതൊരു തടസ്സവും ഉണ്ടാകില്ലെന്നും ഉപഭോക്താക്കൾ ആശങ്കപ്പെടേണ്ട സാഹചര്യമില്ലെന്നും കമ്പനി അറിയിച്ചു.
