UAE Social Media Ban; യുഎഇയിൽ സോഷ്യൽ മീഡിയ ഉപയോഗിക്കുന്നതിന് പുതിയ പ്രായപരിധി നിശ്ചയിച്ച സാഹചര്യത്തിൽ, നിയമം ലംഘിക്കാൻ കുട്ടികളെ സഹായിക്കരുതെന്ന് അധികൃതർ മാതാപിതാക്കൾക്ക് കർശന നിർദ്ദേശം നൽകി. 15 വയസ്സിന് താഴെയുള്ള കുട്ടികൾ സ്വന്തമായി സോഷ്യൽ മീഡിയ അക്കൗണ്ടുകൾ നിർമ്മിക്കുന്നത് നിരോധിച്ചുകൊണ്ടുള്ള മന്ത്രിസഭാ തീരുമാനത്തിന് പിന്നാലെയാണിത്. നിയമം നടപ്പിലാക്കുന്നതിൽ സോഷ്യൽ മീഡിയ പ്ലാറ്റ്‌ഫോമുകൾക്കാണ് പ്രധാന ഉത്തരവാദിത്തമെങ്കിലും, കുട്ടികൾ ഈ നിയമം മറികടക്കാൻ മാതാപിതാക്കളെ ഒരു പഴുതായി ഉപയോഗിക്കരുതെന്ന് ടെലികമ്മ്യൂണിക്കേഷൻസ് ആൻഡ് ഡിജിറ്റൽ ഗവൺമെന്റ് റെഗുലേറ്ററി അതോറിറ്റി പോളിസി ആൻഡ് പ്രോഗ്രാംസ് ഡയറക്ടർ എൻജിനീയർ അബ്ദുൾറഹ്മാൻ അൽ മർസൂഖി വ്യക്തമാക്കി. പ്ലാറ്റ്‌ഫോമുകൾ ഉപയോക്താക്കളുടെ പ്രായം കൃത്യമായി പരിശോധിക്കണമെന്നത് നിയമപരമായ ബാധ്യതയാണ്. എന്നാൽ ഈ മാറ്റത്തോട് സഹകരിക്കാൻ രക്ഷിതാക്കൾക്കും കടമയുണ്ടെന്ന് അദ്ദേഹം ഓർമ്മിപ്പിച്ചു. കുട്ടികൾക്ക് വേണ്ടി മാതാപിതാക്കൾ സ്വന്തം പേരിൽ അക്കൗണ്ടുകൾ തുടങ്ങിക്കൊടുക്കുന്ന രീതി ഒഴിവാക്കണം. ഇത്തരം പ്രവർത്തികൾ നിയമം മറികടക്കാനുള്ള ശ്രമമായി കണക്കാക്കപ്പെടും. പകരം, കുട്ടികളുടെ സുരക്ഷയ്ക്കായി പ്ലാറ്റ്‌ഫോമുകൾ നൽകുന്ന നിയന്ത്രണ സംവിധാനങ്ങൾ ഉപയോഗിക്കാൻ രക്ഷിതാക്കൾ തയ്യാറാകണം. ആർട്ടിഫിഷ്യൽ ഇന്റലിജൻസ്, ബയോമെട്രിക് ഫേഷ്യൽ റെക്കഗ്നിഷൻ അല്ലെങ്കിൽ സർക്കാർ ഐഡി എന്നിവ വഴി ഉപയോക്താക്കളുടെ പ്രായം കൃത്യമായി പരിശോധിക്കാൻ സോഷ്യൽ മീഡിയ കമ്പനികൾക്ക് നിർദ്ദേശം നൽകിയിട്ടുണ്ട്. നിലവിൽ 15 വയസ്സിന് താഴെയുള്ള കുട്ടികൾ ഉപയോഗിക്കുന്ന അക്കൗണ്ടുകൾ കണ്ടെത്തി നീക്കം ചെയ്യാൻ കമ്പനികൾക്ക് 12 മാസത്തെ സമയം അനുവദിച്ചിട്ടുണ്ട്.

15-നും 16-നും ഇടയിൽ പ്രായമുള്ളവർക്ക് സോഷ്യൽ മീഡിയ ഉപയോഗിക്കാമെങ്കിലും അവർക്ക് മുതിർന്നവരെപ്പോലെ പൂർണ്ണ സ്വാതന്ത്ര്യം ഉണ്ടായിരിക്കില്ല. ഇവരുടെ അക്കൗണ്ടുകളിൽ മാതാപിതാക്കളുടെ നിയന്ത്രണം ഉറപ്പാക്കുന്ന ടൂളുകൾ കമ്പനികൾ നിർബന്ധമായും നൽകണം. കുട്ടികൾ എത്ര സമയം സോഷ്യൽ മീഡിയ ഉപയോഗിക്കണം, അവർ എത്തരം ഉള്ളടക്കങ്ങൾ കാണണം തുടങ്ങിയ കാര്യങ്ങൾ നിയന്ത്രിക്കാൻ ഇതിലൂടെ രക്ഷിതാക്കൾക്ക് സാധിക്കും. അതേസമയം, ചൈൽഡ് ഇൻഫ്ലുവൻസർമാർക്ക് ഈ നിയമത്തിൽ ഇളവുകൾ നൽകിയിട്ടുണ്ട്. കുട്ടികൾക്ക് നല്ല രീതിയിലുള്ള ഉള്ളടക്കങ്ങൾ നിർമ്മിക്കുന്നതിൽ പങ്കാളികളാകാം, എന്നാൽ ആ അക്കൗണ്ടുകൾ പൂർണ്ണമായും നിയന്ത്രിക്കേണ്ടതും ലോഗിൻ ചെയ്യേണ്ടതും മാതാപിതാക്കളായിരിക്കണം. കുട്ടികൾ നേരിട്ട് അക്കൗണ്ട് കൈകാര്യം ചെയ്യുന്നത് ഒഴിവാക്കുന്നതിലൂടെ അവരെ സൈബർ അപകടങ്ങളിൽ നിന്നും മോശം ഉള്ളടക്കങ്ങളിൽ നിന്നും അപരിചിതരുമായുള്ള സമ്പർക്കത്തിൽ നിന്നും സംരക്ഷിക്കാൻ സാധിക്കുമെന്നാണ് അധികൃതരുടെ വിലയിരുത്തൽ. നിയമങ്ങളെക്കുറിച്ച് പൊതുജനങ്ങളെ ബോധവാന്മാരാക്കാൻ സർക്കാർ വൈകാതെ തന്നെ വലിയ പ്രചാരണ പരിപാടികൾ ആരംഭിക്കും. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t