ജൂൺ 21, 2026-ന് യുഎഇയിൽ വർഷത്തിലെ ഏറ്റവും ദൈർഘ്യമേറിയ പകലും ഏറ്റവും കുറഞ്ഞ രാത്രിയും അനുഭവപ്പെടും. ജ്യോതിശാസ്ത്രപരമായി ഉത്തരാർധഗോളത്തിൽ വേനൽക്കാലത്തിന്റെ ഔദ്യോഗിക തുടക്കം കുറിക്കുന്ന ‘സമ്മർ സോൾസ്റ്റിസ്’ (Summer Solstice) എന്ന പ്രതിഭാസമാണ് ഇതിന് കാരണമാകുന്നത്. ഈ ദിവസം യുഎഇയിൽ ഏകദേശം 13 മണിക്കൂറും 50 മിനിറ്റും പകൽ വെളിച്ചം നീണ്ടുനിൽക്കും.

ഭൂമി അതിന്റെ അച്ചുതണ്ടിൽ 23.5 ഡിഗ്രി ചരിഞ്ഞു സഞ്ചരിക്കുന്നതിനാലാണ് ഈ പ്രതിഭാസം ഉണ്ടാകുന്നത്. ജൂൺ 21-ന് യുഎഇ സമയം ഉച്ചയ്ക്ക് 12.25-ഓടെ സൂര്യൻ ഭൂമധ്യരേഖയ്ക്ക് ഏറ്റവും വടക്കായി കർക്കടക രേഖയ്ക്ക് (Tropic of Cancer) നേരെ മുകളിൽ എത്തും. ജൂൺ 18 മുതൽ 24 വരെയുള്ള ദിവസങ്ങളിൽ യുഎഇയിൽ പകലിന്റെ ദൈർഘ്യം കൂടുതലായിരിക്കുമെന്ന് എമിറേറ്റ്സ് അസ്ട്രോണമിക്കൽ സൊസൈറ്റി ചെയർമാൻ ഇബ്രാഹിം അൽ ജർവാൻ വ്യക്തമാക്കി. ഈ ദിവസം കർക്കടക രേഖ കടന്നുപോകുന്ന പ്രദേശങ്ങളിൽ നിഴലുകൾ പൂർണമായും അപ്രത്യക്ഷമാകുന്ന അപൂർവ്വ കാഴ്ചയും കാണാൻ സാധിക്കും. അറേബ്യൻ ഉപദ്വീപിലാകെ നിഴലുകളുടെ നീളം ഏറ്റവും കുറയുന്ന ദിവസവും കൂടിയാണിത്.

ഏറ്റവും ദൈർഘ്യമേറിയ പകലാണെങ്കിലും വർഷത്തിലെ ഏറ്റവും ചൂടുകൂടിയ ദിവസം ഇതായിരിക്കില്ല. ഭൂമിയും കടലും കൂടുതൽ ചൂട് ആഗിരണം ചെയ്യുന്നതിനാൽ വരും ആഴ്ചകളിലാണ് താപനില ക്രമാതീതമായി ഉയരുക. ജൂലൈ മാസത്തിലും ഓഗസ്റ്റ് ആദ്യവാരത്തിലുമായിരിക്കും ഗൾഫ് മേഖലയിൽ ഏറ്റവും കടുത്ത ചൂട് അനുഭവപ്പെടുകയെന്ന് കാലാവസ്ഥാ വിദഗ്ധർ മുന്നറിയിപ്പ് നൽകുന്നു.

ജൂൺ 21 മുതൽ ഓഗസ്റ്റ് 10 വരെയുള്ള വേനലിന്റെ ആദ്യ പകുതിയിൽ യുഎഇയിൽ ശരാശരി പകൽ താപനില 41 മുതൽ 43 ഡിഗ്രി സെൽഷ്യസ് വരെയായിരിക്കും. ചില ദിവസങ്ങളിൽ ഇത് 50 ഡിഗ്രി സെൽഷ്യസും കടന്നേക്കാം. രാത്രിയിൽ താപനില 27 മുതൽ 31 ഡിഗ്രി വരെയായിരിക്കും. ഈ ഘട്ടത്തിൽ കാറ്റും മണൽക്കാറ്റും ശക്തമാകാൻ സാധ്യതയുണ്ട്.

ഓഗസ്റ്റ് 11 മുതൽ സെപ്റ്റംബർ 23 വരെയുള്ള വേനലിന്റെ രണ്ടാം പകുതിയിൽ അന്തരീക്ഷത്തിൽ ഈർപ്പത്തിന്റെ അളവ് വർധിക്കും. ഈർപ്പം കൂടുന്നത് അസ്വസ്ഥത വർധിപ്പിക്കുമെങ്കിലും, ഹജർ മലനിരകളിൽ കൺവെക്റ്റീവ് മേഘങ്ങൾ രൂപപ്പെടാനും കിഴക്കൻ മേഖലകളിൽ ഇടിയോടുകൂടിയ ശക്തമായ മഴ പെയ്യാൻ അനുകൂലമായ സാഹചര്യം ഒരുങ്ങാനും ഇത് കാരണമാകുമെന്ന് കാലാവസ്ഥാ നിരീക്ഷകർ വിലയിരുത്തുന്നു.

ഇത്തരത്തിൽ നീളമേറിയ പകലിന് ശേഷം, പകലിന്റെ ദൈർഘ്യം പടിപടിയായി കുറഞ്ഞ് സെപ്റ്റംബറിലെ ശരത്കാല വിഷുവിലേക്ക് (Autumnal Equinox) പ്രകൃതി മാറും. കടുത്ത വേനലിലേക്ക് കടക്കുന്ന ഈ സാഹചര്യത്തിൽ പ്രവാസികൾ ആരോഗ്യകാര്യങ്ങളിലും ജലാംശം നിലനിർത്തുന്നതിലും കൂടുതൽ ശ്രദ്ധ പുലർത്തേണ്ടതുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t