ദുബൈ സെൻ്റ് മേരീസ് ചർച്ച് വീണ്ടും തുറക്കുന്നു. സംഘർഷ പശ്ചാത്തലത്തിൽ അടച്ചിട്ടിരുന്ന പള്ളി ഇന്ന് മുതൽ നിയന്ത്രണങ്ങളോടെ പ്രവർത്തനം പുനരാരംഭിക്കും. അപ്പസ്തോലിക് വികാരിയേറ്റ് ഓഫ് സതേൺ അറേബ്യ ( (AVOSA) അറിയിച്ചതനുസരിച്ച്, ഇൻഡോർ സൗകര്യങ്ങളിൽ മാത്രം പരിമിതമായ പ്രാർഥനാ ശുശ്രൂഷകൾക്കാണ് അനുമതി നൽകിയിരിക്കുന്നത്. യു.എസ്–ഇസ്രായേൽ–ഇറാൻ വെടിനിർത്തൽ നിലവിൽ വന്ന പശ്ചാത്തലത്തിലാണ് ആരാധനാലയങ്ങൾ വീണ്ടും തുറക്കുന്നത്.

ഓൺലൈൻ രജിസ്ട്രേഷൻ നിർബന്ധം

ശനി, ഞായർ ദിവസങ്ങളിലെ കുർബാനയിൽ പങ്കെടുക്കാൻ പള്ളിയുടെ വെബ്സൈറ്റ് വഴിയുള്ള ഓൺലൈൻ രജിസ്ട്രേഷൻ നിർബന്ധമാണ്. പ്രധാന പള്ളി, ബിഷപ്പ് ബെർണാഡ് ഡ്രെമറി ഹാൾ, ബിഷപ്പ് പോൾ ഹിൻഡർ ഹാൾ എന്നിവ ഉൾപ്പെടെയുള്ള ഇൻഡോർ സൗകര്യങ്ങളിൽ മാത്രമായിരിക്കും പ്രവേശനം.

നിയന്ത്രണങ്ങൾ തുടരുന്നു

കുർബാനയ്ക്ക് പുറമെ പള്ളി കോമ്പൗണ്ടിൽ മറ്റ് പരിപാടികൾക്ക് അനുമതിയില്ല. സുരക്ഷാ കാരണങ്ങളാൽ 18 വയസ്സിനു മുകളിലുള്ളവർക്ക് മാത്രമാണ് പ്രവേശനം; കുട്ടികൾക്ക് പ്രവേശനം അനുവദിക്കില്ല. രജിസ്റ്റർ ചെയ്യാൻ സാധിക്കാത്തവർക്ക് ഓൺലൈൻ സ്ട്രീമിംഗ് വഴി പങ്കെടുക്കാം.

സുരക്ഷാ നിർദ്ദേശങ്ങൾ

അടിയന്തര സാഹചര്യങ്ങൾ നേരിടുന്നതിനുള്ള നിർദ്ദേശങ്ങളോടെ വിവിധ ഭാഷകളിലുള്ള പോസ്റ്ററുകൾ പള്ളിയിൽ സ്ഥാപിച്ചിട്ടുണ്ട്. സംശയാസ്പദമായ പ്രവർത്തനങ്ങൾ കണ്ടാൽ 800-4444 എന്ന ടോൾ ഫ്രീ നമ്പറിൽ ‘അൽ അമീൻ’ സേവനത്തെ അറിയിക്കണമെന്നും അധികൃതർ നിർദേശിച്ചു. പൊതുസുരക്ഷ ഉറപ്പാക്കുന്നതിൽ സഹകരിച്ച സർക്കാർ ഏജൻസികൾക്ക് പള്ളി അധികൃതർ നന്ദി അറിയിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t