അടിയന്തര സാഹചര്യങ്ങളിൽ അധികൃതരിൽ നിന്ന് മുന്നറിയിപ്പ് സന്ദേശങ്ങൾ ലഭിക്കുകയാണെങ്കിൽ പരിഭ്രാന്തരാകാതെ ഉടൻ തന്നെ സുരക്ഷിത സ്ഥാനങ്ങളിലേക്ക് മാറണമെന്ന് അധികൃതർ നിർദേശിച്ചു. യാത്രയിലോ ഷോപ്പിംഗിലോ ആയിരിക്കുമ്പോൾ ഇത്തരം സന്ദേശങ്ങൾ ലഭിച്ചാൽ സമീപത്തെ സുരക്ഷിത കെട്ടിടങ്ങളിലേക്ക് മാറി ഔദ്യോഗിക നിർദേശങ്ങൾ ലഭിക്കുന്നതുവരെ അവിടെതന്നെ തുടരണമെന്നും അറിയിച്ചു. കെട്ടിടത്തിനുള്ളിലാണെങ്കിൽ ഉടൻ ജോലി നിർത്തി ജനലുകളുടെയും ഗ്ലാസ് പ്രതലങ്ങളുടെയും സമീപത്ത് നിന്ന് മാറി ബേസ്‌മെന്റുകളിലോ ഉൾവശത്തെ മുറികളിലോ അഭയം തേടണം. ലിഫ്റ്റുകൾക്ക് പകരം പടവുകൾ ഉപയോഗിക്കണമെന്നും അധികൃതർ ഓർമ്മിപ്പിച്ചു.

വ്യാജ വാർത്തകൾക്കെതിരെ ജാഗ്രത

അടിയന്തര ഘട്ടങ്ങളിൽ ഔദ്യോഗിക സ്ഥാപനങ്ങളുടെ പേരിൽ വരുന്ന വ്യാജ സന്ദേശങ്ങളെയും ലിങ്കുകളെയും ജാഗ്രതയോടെ സമീപിക്കണം. സംശയകരമായ ലിങ്കുകളിൽ ക്ലിക്ക് ചെയ്യുകയോ വ്യക്തിഗത വിവരങ്ങൾ പങ്കുവെക്കുകയോ ചെയ്യരുത്. ഔദ്യോഗിക സ്രോതസ്സുകളിൽ നിന്ന് ലഭിക്കുന്ന വിവരങ്ങൾ മാത്രം വിശ്വസിക്കുകയും അതേ വിവരങ്ങൾ മാത്രമേ മറ്റുള്ളവരിലേക്ക് കൈമാറാവൂ എന്നും അധികൃതർ നിർദേശിച്ചു. അടിസ്ഥാനരഹിതമായ വാർത്തകൾ പ്രചരിപ്പിക്കുന്നത് സമൂഹത്തിൽ അനാവശ്യ ഭീതി സൃഷ്ടിക്കുന്നതിനാൽ അത് ഒഴിവാക്കണമെന്നും മുന്നറിയിപ്പ് നൽകി.

കുട്ടികൾക്കും മുതിർന്നവർക്കും പ്രത്യേക ശ്രദ്ധ

പ്രതിസന്ധി ഘട്ടങ്ങളിൽ കുട്ടികളുടെ മാനസികാവസ്ഥയ്ക്ക് പ്രത്യേക പരിഗണന നൽകണം. അവരോട് ശാന്തമായി സംസാരിച്ച് സുരക്ഷിതരാണെന്ന ആത്മവിശ്വാസം നൽകുകയും ഭയപ്പെടുത്തുന്ന വാർത്തകൾ കാണുന്നതിൽ നിയന്ത്രണം ഏർപ്പെടുത്തുകയും വേണം. പ്രായമായവർക്കും ആരോഗ്യപ്രശ്നങ്ങളുള്ളവർക്കും ആവശ്യമായ മരുന്നുകളും മറ്റ് ഉപകരണങ്ങളും സുലഭമായി ലഭ്യമാകുന്ന രീതിയിൽ സൂക്ഷിക്കണമെന്നും അധികൃതർ നിർദേശിച്ചു. കുടുംബ കൗൺസിലിങ് സേവനത്തിനായി 80033322 എന്ന നമ്പറിൽ ബന്ധപ്പെടാം.

വാഹനമോടിക്കുമ്പോൾ ശ്രദ്ധിക്കേണ്ട കാര്യങ്ങൾ

റോഡിലായിരിക്കുമ്പോഴാണ് മുന്നറിയിപ്പ് ലഭിക്കുന്നതെങ്കിൽ വാഹനത്തിന്റെ വേഗത കുറച്ച് സമീപത്തെ സുരക്ഷിതമായ കെട്ടിടത്തിൽ അഭയം തേടണം. തുറസ്സായ സ്ഥലങ്ങളിലോ വലിയ ആൾക്കൂട്ടത്തിനിടയിലോ വാഹനം നിർത്തുന്നത് ഒഴിവാക്കണം. സമീപത്ത് സുരക്ഷിത കെട്ടിടങ്ങൾ ഇല്ലെങ്കിൽ വാഹനം ഒതുക്കി നിർത്തി എൻജിൻ ഓഫ് ചെയ്ത് ഗ്ലാസുകൾ അടച്ച് വാഹനത്തിനുള്ളിൽ തന്നെ തുടരുന്നതാണ് സുരക്ഷിതം. അപകടദൃശ്യങ്ങൾ പകർത്തി സാമൂഹ്യമാധ്യമങ്ങളിൽ പങ്കുവയ്ക്കുന്നത് ഒഴിവാക്കണമെന്നും നിർദേശം നൽകി.

മാളുകളിലും പൊതുസ്ഥലങ്ങളിലും

മാളുകളിലോ മറ്റ് പൊതുസ്ഥലങ്ങളിലോ ഉള്ളവർ സുരക്ഷാ ഉദ്യോഗസ്ഥരുടെ നിർദേശങ്ങൾ കൃത്യമായി പാലിക്കണം. തിരക്ക് സൃഷ്ടിക്കാതെ കെട്ടിടത്തിന്റെ ഉൾഭാഗങ്ങളിലേക്ക് നീങ്ങുകയും ഗ്ലാസ് ചുവരുകൾ, പരസ്യപ്പലകകൾ തുടങ്ങിയവയുടെ സമീപത്ത് നിന്ന് മാറിനിൽക്കുകയും വേണം. പുകയോ പൊടിയോ ഉണ്ടെങ്കിൽ മൂക്കും വായയും തുണികൊണ്ട് മൂടി തല സംരക്ഷിക്കുന്ന രീതിയിൽ താഴേക്ക് കിടക്കുന്നതാണ് ഉചിതമെന്നും അധികൃതർ അറിയിച്ചു.

വളർത്തുമൃഗങ്ങളുടെ സുരക്ഷയും സമൂഹത്തിന്റെ ഉത്തരവാദിത്തവും

അടിയന്തര സാഹചര്യങ്ങളിൽ വളർത്തുമൃഗങ്ങളെ വീടിനുള്ളിൽ സുരക്ഷിതമായി സൂക്ഷിക്കുകയും ആവശ്യമായ ഭക്ഷണം, വെള്ളം, മരുന്നുകൾ എന്നിവ കരുതുകയും വേണം. മൃഗങ്ങളെ സംരക്ഷിക്കാൻ ബുദ്ധിമുട്ടുണ്ടെങ്കിൽ മുനിസിപ്പാലിറ്റി വിഭാഗത്തെ 993 എന്ന നമ്പറിൽ ബന്ധപ്പെടാവുന്നതാണ്.

അധികൃതർ നൽകുന്ന നിർദേശങ്ങൾ കൃത്യമായി പാലിക്കുകയും സമൂഹത്തിലെ ദുർബല വിഭാഗങ്ങൾക്ക് സഹായഹസ്തം നീട്ടുകയും ചെയ്യുന്നത് ഓരോ പൗരന്റെയും ഉത്തരവാദിത്തമാണെന്ന് ഭരണകൂടം വ്യക്തമാക്കി. കൂട്ടായ പരിശ്രമത്തിലൂടെയാണ് പ്രതിസന്ധികളെ അതിജീവിച്ച് സമൂഹത്തിന്റെ സുരക്ഷ ഉറപ്പാക്കാനാകുന്നതെന്നും അധികൃതർ കൂട്ടിച്ചേർത്തു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

ശ്രദ്ധിക്കുക; യുഎഇയിൽ ജിപിഎസ് തകരാറുകൾ? നിങ്ങളുടെ ഗൂഗിൾ മാപ്സും വെയ്സും തെറ്റായ ലൊക്കേഷനുകൾ കാണിച്ചേക്കാം

യുഎഇയിലുടനീളമുള്ള നിരവധി ഡ്രൈവർമാരും താമസക്കാരും ഗൂഗിൾ മാപ്സ്, വേസ് തുടങ്ങിയ നാവിഗേഷൻ ആപ്പുകളിൽ സമീപകാലത്ത് കൃത്യതക്കുറവ് അനുഭവപ്പെടുന്നതായി റിപ്പോർട്ട് ചെയ്യുന്നു. ചില ഉപയോക്താക്കൾ അവരുടെ മൊബൈൽ ഫോണുകളിൽ കാണുന്ന ലൊക്കേഷൻ യഥാർത്ഥ സ്ഥാനത്തുനിന്ന് ഏറെ അകലെയാണെന്ന് ശ്രദ്ധയിൽപ്പെടുത്തിയിട്ടുണ്ട്. ഈ പ്രശ്‌നം സംബന്ധിച്ച് നിരവധി പേർ സോഷ്യൽ മീഡിയയിലും ഓൺലൈൻ ഫോറങ്ങളിലുമായി ചർച്ച ചെയ്യുകയും ചെയ്തു. വിദഗ്ധർ പറയുന്നത്, ഉപഗ്രഹ സിഗ്നലുകളെ ബാധിക്കുന്ന ചില സാങ്കേതിക കാരണങ്ങളാൽ ഇത്തരം തടസ്സങ്ങൾ ഇടയ്ക്കിടെ ഉണ്ടാകാമെന്നാണ്. പ്രത്യേകിച്ച് സംഘർഷാവസ്ഥകളിൽ സുരക്ഷാ മുൻകരുതലുകളുടെ ഭാഗമായി ജിപിഎസ് സിഗ്നലുകളിൽ താൽക്കാലിക ഇടപെടലുകൾ സംഭവിക്കാൻ സാധ്യതയുണ്ടെന്ന് മുഹമ്മദ് ബിൻ റാഷിദ് സ്പേസ് സെന്റർ ലാബിലെ ഡിജിറ്റൽ ട്രാൻസ്ഫോർമേഷൻ മേധാവി മുഹമ്മദ് ഹനീഫ് വിശദീകരിച്ചു. സെൻസിറ്റീവ് സ്ഥലങ്ങളുടെ സുരക്ഷ ഉറപ്പാക്കുന്നതിനായി അധികാരികൾ ചിലപ്പോൾ പ്രത്യേക സാങ്കേതിക നടപടികൾ സ്വീകരിക്കാറുണ്ടെന്നും ഇതിന്റെ ഭാഗമായി ജിപിഎസ് സിഗ്നലുകൾക്ക് താൽക്കാലിക തടസ്സങ്ങൾ ഉണ്ടാകാമെന്നും അദ്ദേഹം പറഞ്ഞു. ഇതിന്റെ ഫലമായി ഗൂഗിൾ മാപ്സ് പോലുള്ള നാവിഗേഷൻ ആപ്പുകളിൽ തെറ്റായ ലൊക്കേഷനുകളോ അസാധാരണമായ റൂട്ടുകളോ കാണാൻ സാധ്യതയുണ്ട്.

സുരക്ഷാ ഏജൻസികൾ ഉപയോഗിക്കുന്ന ജിപിഎസ് ജാമിംഗ്, ജിപിഎസ് സ്പൂഫിംഗ് പോലുള്ള സാങ്കേതിക വിദ്യകളും ഇതിന് കാരണമാകാം. ജിപിഎസ് ജാമിംഗ് സിഗ്നലുകൾ തടയുന്നതും, ജിപിഎസ് സ്പൂഫിംഗ് ഉപകരണങ്ങളിലേക്ക് തെറ്റായ സിഗ്നലുകൾ അയയ്ക്കുന്നതുമാണ്. സിവിലിയൻ നാവിഗേഷൻ ആപ്പുകൾ ഒരേ ഉപഗ്രഹ സിഗ്നലുകളെ ആശ്രയിക്കുന്നതിനാൽ ഇത്തരം നടപടികൾ അവയുടെ കൃത്യതയെ ബാധിച്ചേക്കാമെന്ന് വിദഗ്ധർ പറയുന്നു. എങ്കിലും മിക്ക സാഹചര്യങ്ങളിലും ഉപഗ്രഹ സിഗ്നലുകൾ വീണ്ടും സ്ഥിരത കൈവരിക്കുന്നതോടെ നാവിഗേഷൻ സംവിധാനങ്ങൾ സ്വാഭാവികമായി ശരിയായ നിലയിലേക്ക് മടങ്ങുമെന്നും വിദഗ്ധർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt