രാജ്യത്തിനായി ഔദ്യോഗിക ദൗത്യത്തിനിടെ ഹെലികോപ്റ്റർ തകർന്നുവീണുണ്ടായ അപകടത്തിൽ യുഎഇ സായുധസേനയിലെ രണ്ട് പൈലറ്റുമാർ വീരമൃത്യു വരിച്ചതിനെ തുടർന്ന് രാജ്യമൊട്ടാകെ ദുഃഖം നിറഞ്ഞിരിക്കുകയാണ്. ക്യാപ്റ്റൻ പൈലറ്റ് സഈദ് റാഷിദ് ഹമദ് അൽ ബലൂഷിയും ഫസ്റ്റ് ലഫ്റ്റനന്റ് പൈലറ്റ് അലി സാലിഹ് ഇസ്മായിൽ അൽ തുനൈജിയും ആണ് അപകടത്തിൽ ജീവൻ നഷ്ടപ്പെട്ടതെന്ന് യുഎഇ പ്രതിരോധ മന്ത്രാലയം അറിയിച്ചു. മാർച്ച് 9 തിങ്കളാഴ്ച സാങ്കേതിക തകരാറിനെ തുടർന്ന് ഹെലികോപ്റ്റർ തകർന്നുവീഴുകയായിരുന്നു. അപകടത്തിന് തൊട്ടുമുമ്പ് അലി അൽ തുനൈജി അയച്ച ശബ്ദസന്ദേശം സോഷ്യൽ മീഡിയയിൽ വ്യാപകമായി പ്രചരിച്ച് യുഎഇ നിവാസികളുടെ മനസ്സ് ഉലയ്ക്കുകയാണ്.

ശബ്ദസന്ദേശത്തിൽ തന്റെ ദൗത്യത്തോടുള്ള പ്രതിബദ്ധതയും രാജ്യത്തോടുള്ള കടമയും അദ്ദേഹം സമാധാനത്തോടെ പങ്കുവെക്കുകയായിരുന്നു. “മഹത്തായ പ്രതിഫലം അല്ലാഹുവിൽ നിന്നാണ്. ഞങ്ങൾ രക്തസാക്ഷികളാകണമെന്ന് വിധിച്ചിട്ടുണ്ടെങ്കിൽ അത് സംഭവിക്കും. എന്നാൽ ദൈവം ഞങ്ങൾക്ക് ജീവിതം അനുവദിച്ചാൽ, ജനങ്ങൾ സമാധാനത്തോടെ ഉറങ്ങുന്നതും സുരക്ഷിതരായി ജീവിക്കുന്നതും കാണുന്നത് തന്നെ ഞങ്ങൾക്ക് മതിയാകും,” എന്നാണ് സന്ദേശത്തിൽ പറഞ്ഞത്. ഫസ്റ്റ് ലഫ്റ്റനന്റ് അലി അൽ തുനൈജിയുടെ സംസ്കാരം ചൊവ്വാഴ്ച ലുഹർ നമസ്കാരത്തിന് ശേഷം റാസൽഖൈമയിലെ അൽ റംസിലുള്ള അബ്ദുള്ള അൽ അമാഷി പള്ളിയിൽ നടന്നു. ക്യാപ്റ്റൻ സഈദ് അൽ ബലൂഷിയുടെ സംസ്കാരം അൽ ഐനിലെ അൽ മുഅ്തറദ് അൽ കബീർ പള്ളിയിലായിരുന്നു.

സംഭവത്തിൽ വിവിധ രാജ്യങ്ങളിൽ നിന്നുള്ള നേതാക്കളും അനുശോചനം രേഖപ്പെടുത്തി. ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽ താനി യുഎഇ വിദേശകാര്യ മന്ത്രി ഷെയ്ഖ് അബ്ദുള്ള ബിൻ സായിദ് അൽ നഹ്യാനെ ഫോണിൽ ബന്ധപ്പെട്ട് അനുശോചനം അറിയിച്ചു. ഒമാൻ, ബഹ്‌റൈൻ, സൗദി അറേബ്യ എന്നിവയും യുഎഇയോടുള്ള ഐക്യദാർഢ്യം പ്രഖ്യാപിച്ചു. ഫെബ്രുവരി 28 മുതൽ തുടരുന്ന ഇറാൻ ആക്രമണങ്ങളുടെ പശ്ചാത്തലത്തിലാണ് ഈ അപകടം നടന്നത്. യുഎഇ പ്രതിരോധ മന്ത്രാലയത്തിന്റെ കണക്കുകൾ പ്രകാരം ഇതുവരെ 238 ബാലിസ്റ്റിക് മിസൈലുകളും 1,422 ഡ്രോണുകളും യുഎഇയിലേക്ക് ലക്ഷ്യമിട്ട് തൊടുത്തുവിട്ടതായി റിപ്പോർട്ട് ചെയ്യുന്നു. ഇതിൽ 221 മിസൈലുകളും 1,342 ഡ്രോണുകളും പ്രതിരോധ സംവിധാനങ്ങൾ തകർത്തതായി അധികൃതർ അറിയിച്ചു. ആക്രമണങ്ങളിൽ ഇതുവരെ വിവിധ രാജ്യക്കാരായ നാല് പേർ മരണപ്പെടുകയും 112 പേർക്ക് പരിക്കേൽക്കുകയും ചെയ്തിട്ടുണ്ട്. ഇറാൻ നടത്തുന്ന ആക്രമണങ്ങൾ പ്രകോപനമില്ലാത്തതാണെന്നും നിലവിൽ രാജ്യം ‘പ്രതിരോധാവസ്ഥയിൽ’ (State of Defence) തുടരുകയാണെന്നും യുഎഇ വിദേശകാര്യ മന്ത്രാലയം വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം

റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്‌സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്‌ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.

ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt