സുബിയ പവർ ആൻഡ് വാട്ടർ ഡിസ്റ്റിലേഷൻ പ്ലാന്റിലെ ഒരു ഇന്ധന ടാങ്കിൽ ചെറിയ തീപിടിത്തം ഉണ്ടായതായി വൈദ്യുതി, ജലം, നവീകരണ ഊർജ മന്ത്രാലയം അറിയിച്ചു. സംഭവത്തെ തുടർന്ന് പ്ലാന്റ് പരിസരത്ത് പുക ഉയർന്നതായി മന്ത്രാലയത്തിന്റെ ഔദ്യോഗിക വക്താവ് എഞ്ചിനീയർ ഫാത്തിമ അബ്ബാസ് ജൗഹർ ഹയാത്ത് വ്യക്തമാക്കി. പ്ലാന്റിലെ സുരക്ഷാ വിഭാഗവും അടിയന്തര പ്രതികരണ സംഘങ്ങളും ഉടൻ ഇടപെട്ട് നിശ്ചിത സുരക്ഷാ നടപടികൾ പാലിച്ച് തീ വേഗത്തിൽ നിയന്ത്രണവിധേയമാക്കി. ഇതിലൂടെ തീ മറ്റ് ഭാഗങ്ങളിലേക്ക് പടരുന്നത് തടയാനായതായി അധികൃതർ അറിയിച്ചു. സംഭവത്തിൽ ആർക്കും പരിക്കേറ്റിട്ടില്ലെന്നും അവർ കൂട്ടിച്ചേർത്തു.

പ്ലാന്റിലെ യൂണിറ്റുകളും ഉപകരണങ്ങളും സുരക്ഷിതമാണെന്ന് ഉറപ്പാക്കുന്നതിനായി സാങ്കേതിക വിദഗ്ധ സംഘം വിശദമായ പരിശോധനയും വിലയിരുത്തലും നടത്തുകയാണ്. അതേസമയം, വൈദ്യുതി-ജല വിതരണ സേവനങ്ങൾ സാധാരണ നിലയിൽ തുടർന്നുകൊണ്ടിരിക്കുകയാണെന്നും മന്ത്രാലയം വ്യക്തമാക്കി. സാഹചര്യം നിരന്തരം നിരീക്ഷിച്ച് സേവനങ്ങൾ തടസമില്ലാതെ തുടരാൻ ആവശ്യമായ നടപടികൾ സ്വീകരിച്ചുകൊണ്ടിരിക്കുകയാണെന്നും അറിയിച്ചു. അടിയന്തര സാഹചര്യത്തിൽ വേഗത്തിൽ ഇടപെട്ട എഞ്ചിനീയർമാർക്കും ടെക്നീഷ്യന്മാർക്കും തൊഴിലാളികൾക്കും മന്ത്രാലയം നന്ദി രേഖപ്പെടുത്തി.

അതേസമയം, ഞായറാഴ്ച പുലർച്ചെ കുവൈത്തിന്റെ ആകാശപരിധിയിൽ കടന്നുകയറിയ മിസൈലുകളും ഡ്രോണുകളും കുവൈത്ത് സായുധസേന തടഞ്ഞതായി പ്രതിരോധ മന്ത്രാലയം അറിയിച്ചു. ഔദ്യോഗിക വക്താവ് കർണൽ സൗദ് അബ്ദുലഅസീസ് അൽ-ഒതൈബി നൽകിയ വിവരമനുസരിച്ച് വ്യോമ പ്രതിരോധ സംവിധാനം ഏഴ് ബാലിസ്റ്റിക് മിസൈലുകൾ കണ്ടെത്തി. ഇതിൽ മൂന്ന് മിസൈലുകൾ വിജയകരമായി തകർത്തുവെന്നും ബാക്കി നാല് മിസൈലുകൾ ഭീഷണി പരിധിക്കു പുറത്തായതിനാൽ ഇടപെടൽ ആവശ്യമായിരുന്നില്ലെന്നും വ്യക്തമാക്കി. കൂടാതെ അഞ്ച് ശത്രു ഡ്രോണുകൾ കണ്ടെത്തിയതിൽ രണ്ട് എണ്ണം തകർത്തുവെന്നും മൂന്ന് ഡ്രോണുകളെ നിർജ്ജീവമാക്കാൻ കഴിഞ്ഞില്ലെന്നും പ്രതിരോധ മന്ത്രാലയം അറിയിച്ചു.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/F01ELZ6DHGILPoqh1fXNmd

കുവൈത്തിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

18 വയസ് കഴിഞ്ഞാൽ സൈനിക സേവനം നിർബന്ധം; ദേശീയ സേവന നിയമത്തിൽ വൻ ഭേദഗതി കൊണ്ടുവന്ന് കുവൈത്ത്

കുവൈത്തിന്റെ പ്രതിരോധ സംവിധാനം കൂടുതൽ ശക്തിപ്പെടുത്തുന്നതിനും സൈനിക സന്നദ്ധത ഉയർത്തുന്നതിനുമായി ദേശീയ സൈനിക സേവന നിയമത്തിൽ സുപ്രധാന ഭേദഗതികൾ ഉൾപ്പെടുത്തി പുതിയ ഉത്തരവ് പുറപ്പെടുവിച്ചു. 2026-ലെ ഒമ്പതാം നമ്പർ നിയമഭേദഗതിയാണ് ഔദ്യോഗിക ഗസറ്റിൽ പ്രസിദ്ധീകരിച്ചത്. അഞ്ച് അനുച്ഛേദങ്ങൾ ഉൾക്കൊള്ളുന്ന ഭേദഗതി ഇന്ന് മുതൽ പ്രാബല്യത്തിൽ വന്നു.
പുതിയ നിയമപ്രകാരം, 18 വയസ് തികയുന്ന ഓരോ കുവൈത്ത് പൗരനും പ്രായപൂർത്തിയായതിന് ശേഷം 180 ദിവസത്തിനകം ബന്ധപ്പെട്ട അധികാരികളുടെ മുൻപാകെ ഹാജരായി ദേശീയ സൈനിക സേവനത്തിനായി രജിസ്റ്റർ ചെയ്യേണ്ടതാണ്.

സർക്കാർ-സ്വകാര്യ മേഖലകളിലെ തൊഴിൽ പ്രവേശനത്തിലും സ്വതന്ത്ര തൊഴിൽ ലൈസൻസിനും സൈനിക സേവനം പൂർത്തിയാക്കിയ സർട്ടിഫിക്കറ്റോ, ഒഴിവാക്കൽ രേഖയോ, അല്ലെങ്കിൽ സേവനം മാറ്റിവെച്ചതിന്റെ ഔദ്യോഗിക രേഖയോ നിർബന്ധമാക്കി. സൈനിക സേവനം വിജയകരമായി പൂർത്തിയാക്കിയവർക്ക് നിയമനങ്ങളിൽ മുൻഗണന നൽകുമെന്നും നിയമം വ്യക്തമാക്കുന്നു.

പ്രധാന ഭേദഗതികൾ:

ഒറ്റമകൻ/ഒറ്റമകൾ (മാതാപിതാക്കൾ ജീവനോടെയോ ഒരാൾ മരിച്ചാലോ) സൈനിക സേവനത്തിൽ നിന്ന് ഒഴിവാക്കും.

മയക്കുമരുന്ന് ഉപയോഗം സ്ഥിരീകരിച്ചവർക്ക് ചികിത്സ പൂർത്തിയാകുന്നത് വരെ സേവനം മാറ്റിവെക്കും.

സേവനത്തിന് ഹാജരാകാതിരുന്നാൽ അല്ലെങ്കിൽ വൈകിയാൽ ഘട്ടംഘട്ടമായ ഭരണപരമായ ശിക്ഷകൾ.

സജീവ സേവനം പൂർത്തിയാക്കിയവർ 10 വർഷത്തേക്ക് പ്രതിവർഷം 30 ദിവസം റിസർവ് സേവനത്തിൽ പങ്കെടുക്കണം, അല്ലെങ്കിൽ 45 വയസ് വരെ.

തടവുശിക്ഷ അനുഭവിക്കുന്ന കാലയളവ് സജീവ സേവനത്തിൽ ഉൾപ്പെടുത്തില്ല.

നിയമലംഘനങ്ങൾക്ക് തടവും പിഴയും ഉൾപ്പെടുന്ന കർശന ശിക്ഷകൾ.

ദേശീയ സുരക്ഷ ഉറപ്പാക്കുന്നതിനോടൊപ്പം നിയമനീതിയും സാമൂഹിക നീതിയും തമ്മിൽ സന്തുലിതാവസ്ഥ ഉറപ്പാക്കുന്നതാണ് ഭേദഗതികളുടെ ലക്ഷ്യമെന്ന് വിശദീകരണ കുറിപ്പിൽ പറയുന്നു.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/F01ELZ6DHGILPoqh1fXNmd