കുവൈത്ത് സിറ്റി: മിഡിൽ ഈസ്റ്റിലെ വ്യാപാര ഭൂപടം മാറ്റിവരയ്ക്കാൻ ലക്ഷ്യമിട്ട് കുവൈത്തിൽ കൂറ്റൻ തുറമുഖം വരുന്നു. ജഹ്‌റ ഗവർണറേറ്റിലെ മുബാറക് അൽ കബീർ തുറമുഖത്തിന്റെ നിർമ്മാണത്തിനായി പ്രമുഖ ചൈനീസ് കമ്പനിയായ ചൈന കമ്മ്യൂണിക്കേഷൻ കൺസ്ട്രക്ഷൻ കമ്പനിയുമായി (CCCC) കുവൈത്ത് ഭരണകൂടം കരാർ ഒപ്പിട്ടു. ഏകദേശം 410 കോടി ഡോളർ (ഏകദേശം 34,000 കോടി രൂപ) ചിലവിട്ടാണ് ഈ പദ്ധതിയൊരുങ്ങുന്നത്. കുവൈത്ത് പ്രധാനമന്ത്രി ശൈഖ് അഹമ്മദ് അബ്ദുല്ലയുടെ സാന്നിധ്യത്തിലാണ് കരാർ ഒപ്പിടൽ ചടങ്ങുകൾ നടന്നത്.

ചൈനയുടെ സ്വപ്ന പദ്ധതിയായ ‘ബെൽറ്റ് ആൻഡ് റോഡ് ഇനീഷ്യേറ്റീവ്’ (BRI) പാതയുമായി ഈ തുറമുഖത്തെ ബന്ധിപ്പിക്കാനാണ് ചൈന ലക്ഷ്യമിടുന്നത്. പാകിസ്താൻ വഴിയുള്ള ചൈനീസ് ചരക്കുപാത കുവൈത്തിലെ തുറമുഖവുമായി ചേരുന്നതോടെ പശ്ചിമേഷ്യയിലെയും യൂറോപ്പിലെയും വിപണികളിൽ ചൈനയ്ക്ക് മേധാവിത്വം നേടാനാകും. ഗൾഫ് മേഖലയിൽ ചൈനീസ് കമ്പനി നിർമ്മിക്കുന്ന ആദ്യത്തെ വലിയ തുറമുഖം എന്ന പ്രത്യേകതയും ഇതിനുണ്ട്.

സൗദി അറേബ്യയും യുഎഇയും ചെയ്യുന്നതുപോലെ ക്രൂഡ് ഓയിൽ വരുമാനത്തെ മാത്രം ആശ്രയിക്കാതെ സാമ്പത്തിക ഭദ്രത കൈവരിക്കാനാണ് കുവൈത്തിന്റെ നീക്കം. ‘വിഷൻ 2035’ എന്ന ബൃഹത് പദ്ധതിയുടെ ഭാഗമായാണ് പുതിയ തുറമുഖ നിർമ്മാണം. ആഗോള ചരക്കുനീക്കത്തിന്റെ പ്രധാന കേന്ദ്രമായി മാറുന്നതോടെ കുവൈത്തിന്റെ സാമ്പത്തിക രംഗം കൂടുതൽ ശക്തിപ്പെടുമെന്ന് ഭരണകൂടം വിശ്വസിക്കുന്നു.

ഇന്ത്യ മുതൽ യൂറോപ്പ് വരെയുള്ള സാമ്പത്തിക ഇടനാഴി (IMEC) ചർച്ചകളിൽ സജീവമായിരിക്കെയാണ് ചൈനയുടെ ഈ പുതിയ നീക്കം. ഇറാനിലെ ചബഹാർ തുറമുഖം ഇന്ത്യ വികസിപ്പിക്കുന്നുണ്ടെങ്കിലും അമേരിക്കൻ ഉപരോധങ്ങൾ അതിന് തടസ്സമാകുന്നുണ്ട്. എന്നാൽ ചൈനയുടെ ചരക്കുപാത അതിവേഗം മുന്നേറുകയാണ്. പശ്ചിമേഷ്യൻ വിപണി പിടിച്ചെടുക്കാൻ ഇന്ത്യയുടെ സാമ്പത്തിക ഇടനാഴിയും ചൈനയുടെ ബെൽറ്റ് ആൻഡ് റോഡ് പദ്ധതിയും തമ്മിൽ വരും വർഷങ്ങളിൽ കടുത്ത മത്സരം തന്നെ ഉണ്ടായേക്കാം.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL

കുവൈറ്റ് പ്രവാസികൾക്ക് സന്തോഷവാർത്ത! റെസിഡൻസിയും താൽക്കാലിക പെർമിറ്റും ഇനി വിരൽത്തുമ്പിൽ; ഓൺലൈൻ സേവനങ്ങൾക്ക് തുടക്കമായി

കുവൈറ്റ് സിറ്റി: കുവൈറ്റിലെ പ്രവാസികൾക്ക് ആശ്വാസമായി ആഭ്യന്തര മന്ത്രാലയത്തിന്റെ (MoI) പുതിയ നീക്കം. സ്വകാര്യ മേഖലയിലെ ജീവനക്കാർക്കും മറ്റും ആദ്യമായി റെസിഡൻസി പെർമിറ്റ് എടുക്കുന്നതിനും, താൽക്കാലിക റെസിഡൻസി (Article 14) നേടുന്നതിനും ഇനി മുതൽ ഓൺലൈൻ വഴി അപേക്ഷിക്കാം. മന്ത്രാലയത്തിന്റെ വെബ്സൈറ്റ് വഴിയാണ് ഈ പുതിയ സേവനങ്ങൾ ലഭ്യമാകുക.

പുതിയ സേവനങ്ങൾ പ്രധാനമായും താഴെ പറയുന്നവയാണ്:

1. ആദ്യമായി റെസിഡൻസി എടുക്കുന്നവർക്ക് (First Time Residency): സ്വകാര്യ മേഖലയിലെ (Article 18) തൊഴിൽ വിസയിൽ കുവൈറ്റിൽ എത്തിയവർക്ക് അവരുടെ ആദ്യത്തെ താമസരേഖ (Iqama) ഇനി ഓൺലൈൻ വഴി നടപടികൾ പൂർത്തിയാക്കി സ്വന്തമാക്കാം. ഓഫീസുകൾ കയറിയിറങ്ങാതെ തന്നെ ഈ സേവനം ഉപയോഗപ്പെടുത്താം.
2. താൽക്കാലിക റെസിഡൻസി (Temporary Residency – Article 14): ആർട്ടിക്കിൾ 18 വിസയിലുള്ളവർക്ക് താൽക്കാലികമായി താമസം നീട്ടിക്കിട്ടുന്നതിനായുള്ള ‘ആർട്ടിക്കിൾ 14’ ലേക്ക് മാറാനുള്ള സൗകര്യവും ഓൺലൈനിൽ ലഭ്യമാക്കിയിട്ടുണ്ട്.

നേട്ടങ്ങൾ: ഡിജിറ്റൽ വൽക്കരണത്തിന്റെ ഭാഗമായി കൊണ്ടുവന്ന ഈ മാറ്റം മൂലം താമസകാര്യ ഓഫീസുകളിലെ തിരക്ക് കുറയുന്നതിനൊപ്പം, താമസരേഖകൾ വേഗത്തിൽ ലഭിക്കാനും പ്രവാസികൾക്ക് സാധിക്കും. സ്പോൺസർമാർക്കോ കമ്പനികൾക്കോ തങ്ങളുടെ ജീവനക്കാരുടെ വിസ നടപടികൾ മന്ത്രാലയത്തിന്റെ ഔദ്യോഗിക പോർട്ടൽ വഴി ലളിതമായി പൂർത്തിയാക്കാം.

കുവൈറ്റിലെ പുതിയ താമസ നിയമങ്ങൾ പ്രാബല്യത്തിൽ വരുന്ന പശ്ചാത്തലത്തിൽ, നടപടിക്രമങ്ങൾ സുതാര്യമാക്കുന്നതിന്റെ ഭാഗമായാണ് ആഭ്യന്തര മന്ത്രാലയത്തിന്റെ ഈ പരിഷ്കാരം.

കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL

കുവൈത്തിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

1500 രൂപയുടെ കൂപ്പൺ, ഒന്നാം സമ്മാനം സ്വന്തം വീട്, രണ്ടാം സമ്മാനം ഥാർ; ഭാര്യയുടെ ചികിത്സക്ക് പണം കണ്ടെത്താൻ ലോട്ടറി, ഒടുവിൽ മുൻ പ്രവാസി അറസ്റ്റിൽ

കണ്ണൂർ: അർബുദബാധിതയായ ഭാര്യയുടെ ചികിത്സാച്ചെലവ് കണ്ടെത്താനും ബാധ്യതകൾ തീർക്കാനുമായി തന്റെ ഏക സമ്പാദ്യമായ വീടും സ്ഥലവും ഒന്നാം സമ്മാനമായി പ്രഖ്യാപിച്ച് നറുക്കെടുപ്പ് നടത്തിയ പ്രവാസി മലയാളി അറസ്റ്റിലായി. അടയ്ക്കാത്തോട് കാട്ടുപാലം സ്വദേശിയായ ബെന്നി തോമസിനെയാണ് കേളകം പോലീസ് പിടികൂടിയത്. സ്വകാര്യ നറുക്കെടുപ്പുകൾ നടത്തുന്നത് നിയമവിരുദ്ധമാണെന്ന് കാട്ടി സംസ്ഥാന ഭാഗ്യക്കുറി വകുപ്പ് നൽകിയ പരാതിയിലാണ് നടപടി.

മുപ്പത്തിയഞ്ച് വർഷം സൗദി അറേബ്യയിലെ റിയാദിൽ ജോലി ചെയ്ത് ബെന്നി സമ്പാദിച്ച 26 സെന്റ് സ്ഥലവും ഏഴ് മുറികളുള്ള 3300 സ്ക്വയർ ഫീറ്റ് ഇരുനില വീടുമായിരുന്നു നറുക്കെടുപ്പിലെ ഒന്നാം സമ്മാനം. 1500 രൂപയുടെ കൂപ്പൺ വഴി ഒന്നാം സമ്മാനത്തിന് പുറമെ മഹീന്ദ്ര ഥാർ, കാർ, റോയൽ എൻഫീൽഡ് ബുള്ളറ്റ് എന്നിവയും സമ്മാനമായി പ്രഖ്യാപിച്ചിരുന്നു.

റിയാദിൽ സ്പെയർ പാർട്സ് ബിസിനസ് നടത്തിയിരുന്ന ബെന്നിയുടെ വീഴ്ച തുടങ്ങുന്നത് കോവിഡ് കാലത്താണ്. നാട്ടിൽ കൃഷി ആവശ്യത്തിനായി എടുത്ത 55 ലക്ഷം രൂപയുടെ വായ്പയും ബിസിനസിലെ തിരിച്ചടികളും അദ്ദേഹത്തെ തളർത്തി. ഇതിനിടെ സ്പോൺസർ മരിച്ചതും ബിസിനസ് പങ്കാളി ചതിച്ചതും മൂലം വിസ നഷ്ടപ്പെട്ട് ബെന്നിക്ക് നാട്ടിലേക്ക് മടങ്ങേണ്ടി വന്നു. തിരിച്ചടികൾക്കിടയിലാണ് ഭാര്യയ്ക്ക് അർബുദം ബാധിക്കുന്നത്. ഓരോ 21 ദിവസത്തെ ചികിത്സയ്ക്കും ലക്ഷങ്ങൾ വേണ്ടിവന്നതോടെ കടബാധ്യത 85 ലക്ഷം രൂപയായി വർദ്ധിച്ചു. ബാങ്ക് ജപ്തി നടപടികളുമായി മുന്നോട്ട് പോയതോടെ വീട് വിൽക്കാൻ ശ്രമിച്ചെങ്കിലും കൃത്യമായ വില ലഭിച്ചില്ല. ഈ ഗതികേടിലാണ് നറുക്കെടുപ്പിലൂടെ പണം കണ്ടെത്താൻ ബെന്നി തീരുമാനിച്ചത്.

കഴിഞ്ഞ മാർച്ചിൽ ആരംഭിച്ച കൂപ്പൺ വിൽപനയുടെ നറുക്കെടുപ്പ് നടക്കാൻ ദിവസങ്ങൾ ബാക്കിനിൽക്കെയാണ് പോലീസ് ഇടപെടൽ ഉണ്ടായത്. തിങ്കളാഴ്ച രാവിലെ ബെന്നിയുടെ വീട്ടിൽ റെയ്ഡ് നടത്തിയ പോലീസ് വിൽക്കാത്ത കൂപ്പണുകൾ പിടിച്ചെടുക്കുകയും അദ്ദേഹത്തെ കസ്റ്റഡിയിൽ എടുക്കുകയുമായിരുന്നു. കോടതിയിൽ ഹാജരാക്കിയ ബെന്നിയെ നിലവിൽ റിമാൻഡ് ചെയ്തിരിക്കുകയാണ്. നിയമം ലംഘിക്കപ്പെട്ടെങ്കിലും, ചികിത്സയ്ക്കും നിലനിൽപ്പിനും വേണ്ടി ഒരു മനുഷ്യൻ നടത്തിയ അവസാനത്തെ പോരാട്ടവും പരാജയപ്പെട്ടതിന്റെ വേദനയിലാണ് നാട്ടുകാർ.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL