കുവൈത്തിലെ പബ്ലിക് അതോറിറ്റി ഫോർ സിവിൽ ഇൻഫർമേഷൻ (PACI), വ്യാജ വിലാസ രജിസ്ട്രേഷനുകൾക്കെതിരെ കർശന നടപടികളെടുക്കാൻ ഒരുങ്ങുന്നു. കാലഹരണപ്പെട്ട ലീസ് കരാറുകൾ, ആവശ്യമായ രേഖകൾ ഇല്ലാത്ത അവസ്ഥ, കെട്ടിട ഉടമസ്ഥാവകാശങ്ങളിലെ മാറ്റങ്ങൾ, പൊളിച്ചുമാറ്റേണ്ട കെട്ടിടങ്ങൾ എന്നിവയെയാണ് പ്രധാനമായും അധികൃതർ ലക്ഷ്യമിടുന്നത്.

വാടകക്കാർ വിലാസം മാറ്റുന്നതിനുള്ള പ്രധാന കാരണങ്ങളിലൊന്ന്, അവർ താമസിക്കുന്ന കെട്ടിടം മറ്റൊരു വ്യക്തിക്ക് കൈമാറ്റം ചെയ്യപ്പെടുന്നതാണ്. പുതിയ വാടകക്കാർക്ക് വിലാസം മാറ്റി നൽകുന്നത് കെയർടേക്കർമാർ വഴി നടക്കുന്നു, ഇതിനായി ഇവർ പണം കൈപ്പറ്റുന്നുണ്ട്.

കെയർടേക്കർമാർ വ്യാജ ലീസ് കരാറുകളും, വ്യാജ PACI നമ്പറുകളും, മറ്റ് രേഖകളും ഉണ്ടാക്കി നൽകാൻ 70 മുതൽ 150 കുവൈറ്റ് ദിനാർ വരെ വാങ്ങാറുണ്ട്. ഈ വ്യാജ രേഖകൾ ഉപയോഗിച്ച് PACI സിസ്റ്റത്തിൽ വിലാസം പുതുക്കുന്നു, ഇത് പഴയ വാടകക്കാരന്റെ നിയമപരമായ വിലാസം ഇല്ലാതാക്കുന്നു. ഇതോടെ താമസക്കാരന് തന്റെ യഥാർത്ഥ വിലാസം തെളിയിക്കാൻ കഴിയാതെ വരുന്നു.

ചില കെട്ടിടങ്ങളിൽ വാടകക്കാർക്ക് ലീസ് കരാറോ ഔദ്യോഗിക രസീതുകളോ നൽകാറില്ല. ഉടമ വിദേശത്താണ്, രേഖകൾ തയ്യാറാക്കാൻ സമയമെടുക്കും എന്നൊക്കെ പറഞ്ഞ് കെയർടേക്കർമാർ വാടകക്കാരെ കബളിപ്പിക്കുന്നു. ഇതിനു പുറമെ, ചിലർ 150 മുതൽ 200 കുവൈറ്റ് ദിനാർ വാങ്ങി തങ്ങളുടെ താമസ വിലാസം മറ്റൊരാൾക്ക് “വിൽക്കുന്ന” പ്രവണതയുമുണ്ട്. കുവൈത്തിലെ താമസ രേഖകൾക്ക് നിയമപരമായ സാധുത ആവശ്യമായതുകൊണ്ട് തന്നെ PACI-യുടെ ഈ നീക്കം സുതാര്യമായ പ്രവർത്തനങ്ങൾക്ക് സഹായകമാകും.

കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/LXkAQWFENhKJ0MX7QxTdN5?mode=ac_t