കുവൈത്തി പൗരന്മാർക്ക് പാസ്പോർട്ട് പുതുക്കുന്നതിനുള്ള നടപടിക്രമങ്ങൾ കൂടുതൽ എളുപ്പമാക്കി ആഭ്യന്തര മന്ത്രാലയം. 21 വയസും അതിന് മുകളിലും പ്രായമുള്ള സ്വദേശി പൗരന്മാർക്ക് ഇനി സർക്കാർ ഏകീകൃത ഡിജിറ്റൽ സേവന പ്ലാറ്റ്ഫോമായ ‘സഹൽ’ ആപ്പ് വഴി പാസ്പോർട്ട് ഓൺലൈനായി പുതുക്കാൻ സാധിക്കും.
പൊതുജനങ്ങൾക്ക് സർക്കാർ സേവനങ്ങൾ വേഗത്തിലും സുതാര്യമായും ലഭ്യമാക്കുന്നതിന്റെ ഭാഗമായി ജനറൽ ഡയറക്ടറേറ്റ് ഓഫ് നാഷണാലിറ്റി ആൻഡ് ട്രാവൽ ഡോക്യുമെന്റ്സാണ് പുതിയ ഓൺലൈൻ സൗകര്യം അവതരിപ്പിച്ചത്.
‘സഹൽ’ വഴി പാസ്പോർട്ട് പുതുക്കുന്നത് എങ്ങനെ?
1. ആഭ്യന്തര മന്ത്രാലയ സേവനം തിരഞ്ഞെടുക്കുക
‘സഹൽ’ ആപ്പ് തുറന്ന് ‘Services’ വിഭാഗത്തിൽ പ്രവേശിക്കുക. തുടർന്ന് ‘Ministry of Interior’ തിരഞ്ഞെടുക്കുക.
2. പാസ്പോർട്ട് സേവനത്തിലേക്ക് പ്രവേശിക്കുക
‘Kuwaiti Passport Services’ തിരഞ്ഞെടുക്കുകയും തുടർന്ന് ‘Renew Kuwaiti Passport’ എന്ന ഓപ്ഷനിൽ ക്ലിക്ക് ചെയ്യുകയും ചെയ്യുക.
3. ആവശ്യമായ വിവരങ്ങൾ നൽകുക
പുതിയ പാസ്പോർട്ട് കൈപ്പറ്റേണ്ട കേന്ദ്രം, ഓട്ടോമേറ്റഡ് അഡ്രസ് നമ്പർ തുടങ്ങിയ വിവരങ്ങൾ നൽകണം. തുടർന്ന് പാസ്പോർട്ടിന്റെ കാലാവധി 5 വർഷമോ 10 വർഷമോ എന്ന് തിരഞ്ഞെടുക്കാം.
4. ഫോട്ടോ അപ്ലോഡ് ചെയ്ത് ഫീസ് അടയ്ക്കുക
നിശ്ചിത മാനദണ്ഡങ്ങൾ പാലിക്കുന്ന പുതിയ പാസ്പോർട്ട് സൈസ് ഫോട്ടോ അപ്ലോഡ് ചെയ്യുക. വിവരങ്ങൾ പരിശോധിച്ച് ഉറപ്പാക്കിയ ശേഷം ഓൺലൈനായി ആവശ്യമായ ഫീസ് അടച്ച് അപേക്ഷ സമർപ്പിക്കാം.
ശ്രദ്ധിക്കേണ്ട കാര്യങ്ങൾ
പാസ്പോർട്ട് പുതുക്കുന്നതിന് അപേക്ഷിക്കുന്നവർ ചില നിബന്ധനകൾ പാലിക്കണമെന്ന് ആഭ്യന്തര മന്ത്രാലയം വ്യക്തമാക്കി.
- അപ്ലോഡ് ചെയ്യുന്ന ഫോട്ടോ കഴിഞ്ഞ ആറ് മാസത്തിനുള്ളിൽ എടുത്തതും വ്യക്തവുമായിരിക്കണം.
- പഴയ പാസ്പോർട്ടിൽ ഉപയോഗിച്ച ഫോട്ടോ വീണ്ടും ഉപയോഗിക്കാൻ പാടില്ല.
- 21 വയസ്സിന് താഴെയുള്ളവർക്ക് ‘സഹൽ’ വഴി പാസ്പോർട്ട് പുതുക്കാൻ സാധിക്കില്ല. ഇവർ രക്ഷിതാവിനൊപ്പം ആവശ്യമായ രേഖകളുമായി നാഷണൽ ഐഡന്റിറ്റി സെന്ററിൽ നേരിട്ട് എത്തണം.
- ജിസിസി രാജ്യങ്ങളിലേക്ക് യാത്ര ചെയ്യുമ്പോൾ പാസ്പോർട്ടിന്റെ കാലാവധി നിർണായകമാണ്. സിവിൽ ഐഡിക്ക് കാലാവധിയുണ്ടെങ്കിലും പാസ്പോർട്ട് കാലഹരണപ്പെട്ടാൽ ജിസിസി രാജ്യങ്ങളിലേക്ക് യാത്ര ചെയ്യാൻ സാധിക്കില്ല.
- യാത്രയ്ക്ക് മുൻപായി സ്വന്തം പാസ്പോർട്ടിന്റെയും കുട്ടികളുടെ പാസ്പോർട്ടുകളുടെയും കാലാവധി പരിശോധിച്ച് ആവശ്യമായാൽ നേരത്തെ തന്നെ പുതുക്കുന്നത് യാത്രാ തടസ്സങ്ങൾ ഒഴിവാക്കാൻ സഹായിക്കും.
