കുവൈറ്റ് സിറ്റി: കുവൈറ്റിൽ കഴിഞ്ഞ 28 വർഷത്തിനിടെ 1400-ലധികം ഭൂചലനങ്ങൾ രേഖപ്പെടുത്തിയതായി കുവൈറ്റ് ഇൻസ്റ്റിറ്റ്യൂട്ട് ഫോർ സയന്റിഫിക് റിസർച്ച് (KISR) വെളിപ്പെടുത്തി. കുവൈറ്റ് നാഷണൽ സീസ്മിക് നെറ്റ്വർക്ക് സ്ഥാപിതമായ 1997 മുതലുള്ള ഔദ്യോഗിക കണക്കുകളാണ് ഇൻസ്റ്റിറ്റ്യൂട്ട് ഡയറക്ടർ ഡോ. ഫൈസൽ അൽ-ഹുമാദാൻ ഇപ്പോൾ പുറത്തുവിട്ടിരിക്കുന്നത്.
രാജ്യത്തിന്റെ വിവിധ ഭാഗങ്ങളിൽ ഉണ്ടാകുന്ന ചെറിയ ചലനങ്ങൾ പോലും ഒപ്പിയെടുക്കാൻ അത്യാധുനിക സംവിധാനങ്ങളാണ് കുവൈറ്റ് ഒരുക്കിയിട്ടുള്ളത്. നിലവിൽ ഒമ്പത് ഫീൽഡ് സ്റ്റേഷനുകൾ വഴി ലഭിക്കുന്ന വിവരങ്ങൾ ഷുവൈഖിലെ പ്രധാന കേന്ദ്രത്തിൽ വിശകലനം ചെയ്താണ് ഭൂകമ്പസാധ്യതകൾ വിലയിരുത്തുന്നത്. കഴിഞ്ഞ വർഷങ്ങളിൽ ഉണ്ടായ ചലനങ്ങളിൽ ഭൂരിഭാഗവും തീവ്രത കുറഞ്ഞവയായിരുന്നുവെങ്കിലും സുരക്ഷാ മുൻകരുതലിന്റെ ഭാഗമായി നിരീക്ഷണം ശക്തമാക്കിയിട്ടുണ്ട്.
കെട്ടിടങ്ങളുടെ സുരക്ഷാ മാനദണ്ഡങ്ങൾ നിശ്ചയിക്കുന്നതിനും പാരിസ്ഥിതിക ആഘാതങ്ങൾ പഠിക്കുന്നതിനുമായി പ്രത്യേക സീസ്മിക് നെറ്റ്വർക്കും കുവൈറ്റ് വികസിപ്പിച്ചിട്ടുണ്ട്. പ്രാദേശികമായ ചലനങ്ങൾ മാത്രമല്ല, അയൽരാജ്യങ്ങളിലുണ്ടാകുന്ന പ്രകമ്പനങ്ങൾ കുവൈറ്റിനെ എങ്ങനെയെല്ലാം ബാധിക്കുമെന്ന കാര്യത്തിലും 24 മണിക്കൂറും നിരീക്ഷണം നടക്കുന്നുണ്ട്. അറബ് മേഖലയിലെ ശാസ്ത്ര ഗവേഷണ രംഗത്ത് മുൻപന്തിയിലുള്ള കുവൈറ്റ്, കാലാവസ്ഥാ വ്യതിയാനവും ജലസുരക്ഷയും ഉൾപ്പെടെയുള്ള വിഷയങ്ങളിൽ വലിയ പ്രാധാന്യമാണ് നൽകുന്നതെന്നും അധികൃതർ വ്യക്തമാക്കി.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/Du8AGPEDfJfGa0vgu1h2fL
ആഡംബര കാറുകളുമായി അഭ്യാസപ്രകടനം, വീഡിയോ വൈറൽ: പ്രവാസികളെ കയ്യോടെ പൊക്കി കുവൈത്ത് പോലീസ്
കുവൈത്ത് സിറ്റി: ജലീബ് അൽ ശുയൂഖിൽ ആഡംബര വാഹനങ്ങൾ ഉപയോഗിച്ച് റോഡിൽ അഭ്യാസപ്രകടനം നടത്തിയ ഏഷ്യൻ വംശജരായ യുവാക്കളെ കുവൈത്ത് ആഭ്യന്തര മന്ത്രാലയം (MoI) അറസ്റ്റ് ചെയ്തു. സോഷ്യൽ മീഡിയയിൽ ഇവരുടെ അഭ്യാസപ്രകടനങ്ങളുടെ വീഡിയോ വൈറലായതിനെ തുടർന്നാണ് അധികൃതർ നടപടി സ്വീകരിച്ചത്. കഴിഞ്ഞ ദിവസങ്ങളിൽ സോഷ്യൽ മീഡിയയിൽ പ്രചരിച്ച വീഡിയോയിൽ, ആഡംബര കാറുകൾ ഉപയോഗിച്ച് പൊതുനിരത്തിൽ അപകടകരമായ രീതിയിൽ വാഹനമോടിക്കുകയും മറ്റ് യാത്രക്കാർക്കും പൊതുജനങ്ങൾക്കും ഭീഷണിയാകുന്ന തരത്തിൽ സ്റ്റണ്ടുകൾ കാണിക്കുകയും ചെയ്യുന്നത് ദൃശ്യമായിരുന്നു. ജലീബ് അൽ ശുയൂഖ് മേഖലയിലാണ് ഈ നിയമലംഘനങ്ങൾ നടന്നതെന്ന് പോലീസ് കണ്ടെത്തി.
വീഡിയോ ശ്രദ്ധയിൽപ്പെട്ട ഉടൻ തന്നെ ജനറൽ ട്രാഫിക് ഡിപ്പാർട്ട്മെന്റിലെ സെക്യൂരിറ്റി കൺട്രോൾ വിഭാഗം അന്വേഷണം ആരംഭിച്ചു. വീഡിയോ ദൃശ്യങ്ങൾ പരിശോധിച്ച് വാഹനങ്ങളും ഡ്രൈവർമാരെയും തിരിച്ചറിഞ്ഞ പോലീസ്, ഇവരെ പിടികൂടുകയായിരുന്നു. പിടിയിലായവർ ഏഷ്യൻ വംശജരാണെന്ന് അധികൃതർ സ്ഥിരീകരിച്ചു. പിടികൂടിയ ഡ്രൈവർമാർക്കെതിരെ കടുത്ത നിയമനടപടികളാണ് മന്ത്രാലയം സ്വീകരിച്ചിരിക്കുന്നത്. ഇവരുടെ ആഡംബര വാഹനങ്ങൾ പോലീസ് പിടിച്ചെടുത്തു. ഗതാഗത നിയമങ്ങൾ ലംഘിക്കുന്നവർക്കും പൊതുജനങ്ങളുടെ ജീവന് ഭീഷണിയാകുന്ന രീതിയിൽ പെരുമാറുന്നവർക്കുമെതിരെ വിട്ടുവീഴ്ചയില്ലാത്ത നടപടികൾ തുടരുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി. റോഡുകളിൽ സുരക്ഷിതമായി വാഹനമോടിക്കണമെന്നും നിയമലംഘനങ്ങൾ ശ്രദ്ധയിൽപ്പെട്ടാൽ അധികൃതരെ അറിയിക്കണമെന്നും മന്ത്രാലയം പൊതുജനങ്ങളോട് അഭ്യർത്ഥിച്ചു.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/Du8AGPEDfJfGa0vgu1h2fL
