കുവൈത്തിലെ സഹകരണ സൊസൈറ്റികളിലും യൂണിയനുകളിലും ജോലി ചെയ്യുന്ന 67 വയസിന് മുകളിലുള്ള ജീവനക്കാരെ സർവീസിൽ നിന്ന് ഒഴിവാക്കാൻ സാമൂഹിക കാര്യ മന്ത്രാലയം നിർദേശം നൽകി. തൊഴിൽ മേഖല കൂടുതൽ ക്രമീകരിക്കുന്നതിനും സ്വദേശിവൽക്കരണ നടപടികൾ ശക്തമാക്കുന്നതിനുമുള്ള സർക്കാർ നീക്കത്തിന്റെ ഭാഗമായാണ് പുതിയ തീരുമാനം. നിലവിലുള്ള നിയമങ്ങളും ചട്ടങ്ങളും പൂർണമായി പാലിച്ചായിരിക്കണം ജീവനക്കാരുടെ സേവനം അവസാനിപ്പിക്കേണ്ടതെന്ന് മന്ത്രാലയം നിർദേശിച്ചു. പിരിച്ചുവിടുന്ന ജീവനക്കാർക്ക് ലഭിക്കാനുള്ള ശമ്പളം, സർവീസ് ആനുകൂല്യങ്ങൾ ഉൾപ്പെടെയുള്ള എല്ലാ സാമ്പത്തിക അവകാശങ്ങളും കൃത്യമായി നൽകണമെന്നും ഉത്തരവിൽ വ്യക്തമാക്കിയിട്ടുണ്ട്. രാജ്യത്തെ എല്ലാ സഹകരണ സൊസൈറ്റികളെയും തീരുമാനം അറിയിക്കുന്നതിന് യൂണിയൻ ഓഫ് കോ-ഓപ്പറേറ്റീവ് സൊസൈറ്റീസിനും മന്ത്രാലയം നിർദേശം നൽകി. നിയമം നടപ്പാക്കിയതിന്റെ രേഖകളും സർവീസിൽ നിന്ന് ഒഴിവാക്കിയ ജീവനക്കാരുടെ പട്ടികയും 30 ദിവസത്തിനകം മന്ത്രാലയത്തിന് സമർപ്പിക്കണം.

‘കുവൈത്ത് വിഷൻ 2035’ന്റെ ലക്ഷ്യങ്ങൾക്ക് അനുസൃതമായി തൊഴിൽ വിപണിയിൽ കൂടുതൽ പരിഷ്കാരങ്ങൾ കൊണ്ടുവരികയാണ് തീരുമാനത്തിലൂടെ ലക്ഷ്യമിടുന്നത്. മുതിർന്ന ജീവനക്കാർക്ക് പകരം യോഗ്യതയുള്ള കുവൈത്തി യുവാക്കൾക്ക് സഹകരണ മേഖലയിൽ കൂടുതൽ തൊഴിലവസരങ്ങൾ ഒരുക്കുന്നതിനും തീരുമാനം സഹായിക്കുമെന്നാണ് വിലയിരുത്തൽ. സഹകരണ സൊസൈറ്റികളുടെ പ്രവർത്തനക്ഷമത വർധിപ്പിക്കുന്നതിനും യുവതലമുറയുടെ കഴിവുകൾ കൂടുതൽ പ്രയോജനപ്പെടുത്തുന്നതിനുമുള്ള നടപടികളുടെ ഭാഗമായാണ് പ്രായപരിധി കർശനമാക്കുന്നതെന്നും അധികൃതർ വ്യക്തമാക്കി. പുതിയ നിർദേശത്തിന്റെ അടിസ്ഥാനത്തിൽ രാജ്യത്തെ വിവിധ സഹകരണ സൊസൈറ്റികൾ ഇതിനകം തന്നെ നടപടികൾ ആരംഭിച്ചതായാണ് വിവരം.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/J8DppBWsXPaAoNLAwKnfF8?mode=gi_t

കുവൈത്തിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

കുവൈറ്റ് ആകാശത്ത് മിസൈൽ ആക്രമണം; 24 മണിക്കൂറിനിടെ 5 ബാലിസ്റ്റിക് മിസൈലുകളും 7 ഡ്രോണുകളും വെടിവെച്ചിട്ട് വ്യോമപ്രതിരോധ സേന

കുവൈറ്റിന്റെ ആകാശപരിധി ലക്ഷ്യമിട്ടെത്തിയ വൻ വ്യോമാക്രമണ ശ്രമങ്ങളെ രാജ്യം വിജയകരമായി പ്രതിരോധിച്ചു. കഴിഞ്ഞ 24 മണിക്കൂറിനിടെ അഞ്ച് ബാലിസ്റ്റിക് മിസൈലുകളെയും ഏഴ് ഡ്രോണുകളെയുമാണ് കുവൈറ്റ് വ്യോമപ്രതിരോധ സേന ആകാശത്തുവെച്ച് തന്നെ തകർത്തത്. ശത്രുരാജ്യങ്ങളുടെ ഭാഗത്തുനിന്നുണ്ടായ പ്രകോപനങ്ങളെ അതിശക്തമായ രീതിയിൽ നേരിടാൻ രാജ്യത്തിന്റെ പ്രതിരോധ സംവിധാനങ്ങൾക്ക് സാധിച്ചു എന്നത് സൈന്യത്തിന്റെ കരുത്ത് തെളിയിക്കുന്ന ഒന്നായി മാറി.

രാജ്യത്തെ തന്ത്രപ്രധാനമായ കേന്ദ്രങ്ങളെയും ജനവാസ മേഖലകളെയും ലക്ഷ്യമാക്കിയാണ് ഈ ആക്രമണങ്ങൾ ആസൂത്രണം ചെയ്തിരുന്നത്. എന്നാൽ അത്യാധുനികമായ റഡാർ സംവിധാനങ്ങളും മിസൈൽ പ്രതിരോധ കവചങ്ങളും കൃത്യസമയത്ത് പ്രവർത്തിച്ചതോടെ വലിയൊരു ദുരന്തമാണ് ഒഴിവായത്. വെടിവെച്ചിട്ട മിസൈലുകളുടെയും ഡ്രോണുകളുടെയും അവശിഷ്ടങ്ങൾ വിജനമായ പ്രദേശങ്ങളിൽ വീണതായാണ് റിപ്പോർട്ടുകൾ സൂചിപ്പിക്കുന്നത്. സംഭവത്തിൽ ആർക്കും പരിക്കേൽക്കുകയോ നാശനഷ്ടങ്ങൾ സംഭവിക്കുകയോ ചെയ്തിട്ടില്ലെന്ന് ഔദ്യോഗിക വൃത്തങ്ങൾ വ്യക്തമാക്കി.

മേഖലയിൽ നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ കുവൈറ്റ് സൈന്യം അതീവ ജാഗ്രതയിലാണ്. ഏത് തരത്തിലുള്ള അപ്രതീക്ഷിത ആക്രമണങ്ങളെയും നേരിടാൻ രാജ്യം സുസജ്ജമാണെന്ന് സൈനിക വക്താവ് അറിയിച്ചു. അതിർത്തികളിലും ആകാശപരിധിയിലും നിരീക്ഷണം ശക്തമാക്കിയിരിക്കുകയാണ്. ജനങ്ങൾ പരിഭ്രാന്തരാകേണ്ടതില്ലെന്നും ഔദ്യോഗിക അറിയിപ്പുകൾ മാത്രം ശ്രദ്ധിക്കണമെന്നും അധികൃതർ നിർദ്ദേശിച്ചു. വരും ദിവസങ്ങളിലും സുരക്ഷാ പരിശോധനകളും നിരീക്ഷണങ്ങളും കർശനമായി തുടരാനാണ് പ്രതിരോധ മന്ത്രാലയത്തിന്റെ തീരുമാനം.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/J8DppBWsXPaAoNLAwKnfF8?mode=gi_t