kuwait Commercial Concealment Law;രാജ്യത്തെ നിഴൽ സമ്പദ്വ്യവസ്ഥയെ ഇല്ലാതാക്കാനും പ്രാദേശിക വിപണി പരിഷ്കരിക്കാനുമുള്ള നിർണ്ണായക നീക്കവുമായി കുവൈറ്റ്. നിയമവിരുദ്ധമായ വാണിജ്യ ഇടപാടുകളും ബിനാമി ബിസിനസുകളും തടയുന്നതിനുള്ള പുതിയ ‘കൊമേഴ്സ്യൽ കൺസീൽമെന്റ് ലോ’ നടപ്പിലാക്കാൻ സർക്കാർ ഒരുങ്ങുന്നു. കുവൈറ്റിന്റെ സാമ്പത്തിക ഘടനയിൽ വലിയ മാറ്റങ്ങൾ കൊണ്ടുവരാൻ ലക്ഷ്യമിട്ടുള്ള ഈ നീക്കത്തെ സാമ്പത്തിക വിദഗ്ധരും നിക്ഷേപകരും സ്വാഗതം ചെയ്തു. സ്വദേശികളുടെ പേരിൽ ലൈസൻസ് എടുത്ത് വിദേശികൾ ബിസിനസ് നടത്തുകയും, ലാഭം മുഴുവൻ വിദേശികൾ കൊണ്ടുപോവുകയും ചെയ്യുന്ന രീതിക്ക് തടയിടുകയാണ് ഈ നിയമത്തിന്റെ പ്രധാന ലക്ഷ്യം. പകരം ലൈസൻസ് ഉടമയായ സ്വദേശിക്ക് നിശ്ചിത തുക മാത്രം പ്രതിവർഷം നൽകുന്ന രീതിയാണ് നിലവിലുള്ളത്. ഇത് വിപണിയിലെ ആരോഗ്യകരമായ മത്സരത്തെ ബാധിക്കുന്നുവെന്നാണ് വിലയിരുത്തൽ.
സാമ്പത്തിക-റിയൽ എസ്റ്റേറ്റ് വിദഗ്ധനായ ഖൈസ് അൽ-ഗാനിം ഈ നീക്കത്തെ പിന്തുണച്ചു. എങ്കിലും, നിയമം തയ്യാറാക്കുമ്പോൾ സ്വകാര്യ മേഖലയിലെ വിദഗ്ധരെ കൂടി ഉൾപ്പെടുത്തണമെന്ന് അദ്ദേഹം നിർദ്ദേശിച്ചു. കുവൈറ്റിലെ ചെറുകിട ബിസിനസ് മേഖലയിൽ (ഗ്രോസറികൾ, വർക്ക്ഷോപ്പുകൾ, ലോൺട്രികൾ) വിദേശികളുടെ അനുഭവസമ്പത്തും മൂലധനവും വലിയ പങ്കുവഹിക്കുന്നുണ്ട്. അതിനാൽ സ്വദേശികളും വിദേശികളും തമ്മിലുള്ള വാണിജ്യ ബന്ധങ്ങളെ കൃത്യമായി ക്രമീകരിക്കുന്ന നിയമനിർമ്മാണമാണ് വേണ്ടതെന്നും അദ്ദേഹം പറഞ്ഞു.
ഭക്ഷ്യസുരക്ഷാ കൺസൾട്ടന്റ് മുഹമ്മദ് അൽ-ഫുറൈഹ് പറയുന്നത്, ഈ നിയമം കർശനമായി നടപ്പിലാക്കുന്നത് കുവൈറ്റ് യുവാക്കൾക്ക് ചെറുകിട-ഇടത്തരം സംരംഭ മേഖലയിൽ കൂടുതൽ തൊഴിൽ-നിക്ഷേപ അവസരങ്ങൾ നൽകുമെന്നാണ്. ഇത് വിദേശ നിക്ഷേപത്തെ ബാധിക്കില്ലെന്നും അദ്ദേഹം വ്യക്തമാക്കി. ഔദ്യോഗിക ചാനലുകൾ വഴി വരുന്ന ഗൗരവക്കാരായ നിക്ഷേപകർക്ക് നിലവിൽ തന്നെ കുവൈറ്റിൽ പ്രത്യേക സംവിധാനങ്ങളുണ്ട് .
കുവൈറ്റ് കോൺട്രാക്ടേഴ്സ് അസോസിയേഷൻ മുൻ മേധാവി ഡോ. സലാ ബുർസ്ലി ഈ നിയമത്തെ രാജ്യത്തിന്റെ സാമ്പത്തിക ഭദ്രതയിലേക്കുള്ള തന്ത്രപരമായ ചുവടുവെപ്പായി വിശേഷിപ്പിച്ചു. നിഴൽ സമ്പദ്വ്യവസ്ഥ ഇല്ലാതാകുന്നത് വഴി വിപണിയിൽ സുതാര്യത ഉറപ്പാക്കാം. കൂടാതെ, എല്ലാ സ്ഥാപനങ്ങളും നേരിട്ട് സർക്കാർ മേൽനോട്ടത്തിലാകുന്നതോടെ ഉൽപ്പന്നങ്ങളുടെയും സേവനങ്ങളുടെയും ഗുണനിലവാരം വർദ്ധിക്കുകയും ഇത് ഉപഭോക്താക്കൾക്ക് ഗുണകരമാവുകയും ചെയ്യും. രാജ്യത്തിന്റെ വരുമാന സ്രോതസ്സുകൾ വൈവിധ്യവൽക്കരിക്കാനും കൂടുതൽ വിദേശ മൂലധനം ആകർഷിക്കാനുമുള്ള കുവൈറ്റ് സർക്കാരിന്റെ ദീർഘകാല പദ്ധതികളുടെ ഭാഗമായാണ് ഈ പുതിയ നിയമനിർമ്മാണം.
