കുവൈത്ത് സിറ്റി: ഒക്ടോബർ മാസം മുതൽ മുടങ്ങിക്കിടന്ന കുവൈത്ത്-കോഴിക്കോട് എയർ ഇന്ത്യ എക്സ്പ്രസ് സർവീസ് മാർച്ച് ഒന്നാം തീയതി മുതൽ പുനരാരംഭിക്കുന്നു. വിന്റർ ഷെഡ്യൂളിന്റെ ഭാഗമായി നിർത്തിവെച്ച സർവീസ് വീണ്ടും തുടങ്ങുമെന്ന് എയർ ഇന്ത്യ എക്സ്പ്രസ് അധികൃതർ ഔദ്യോഗികമായി അറിയിച്ചു. ആഴ്ചയിൽ മൂന്ന് ദിവസം, അതായത് ഞായർ, ബുധൻ, വെള്ളി ദിവസങ്ങളിലായാണ് നിലവിൽ വിമാന സർവീസ് ക്രമീകരിച്ചിരിക്കുന്നത്.

കഴിഞ്ഞ കുറച്ചു മാസങ്ങളായി കുവൈത്തിൽ നിന്നും മലബാർ മേഖലയിലേക്കുള്ള നേരിട്ടുള്ള വിമാനങ്ങൾ ഇല്ലാതിരുന്നത് പ്രവാസികളെ വലിയ രീതിയിൽ ദുരിതത്തിലാക്കിയിരുന്നു. മറ്റ് വിമാനങ്ങളെ ആശ്രയിച്ച് ഇരട്ടിയിലധികം തുക നൽകിയും മണിക്കൂറുകളോളം യാത്ര ചെയ്തും നാട്ടിലെത്തേണ്ടി വന്ന സാഹചര്യത്തിനാണ് ഇപ്പോൾ മാറ്റമുണ്ടാകുന്നത്. എന്നാൽ കോഴിക്കോടിനൊപ്പം തന്നെ സർവീസ് നിർത്തിവെച്ച കണ്ണൂരിലേക്ക് എന്ന് വിമാനമുണ്ടാകുമെന്ന കാര്യത്തിൽ ഇപ്പോഴും അവ്യക്തത തുടരുകയാണ്. കണ്ണൂർ സർവീസിനെക്കുറിച്ച് യാതൊരു അറിയിപ്പും അധികൃതരുടെ ഭാഗത്ത് നിന്നും വന്നിട്ടില്ല.

അതേസമയം, വേനലവധി കാലത്തെ തിരക്ക് കണക്കിലെടുത്ത് യാത്രക്കാരിൽ നിന്നും ഉയർന്ന നിരക്ക് ഈടാക്കാനുള്ള തന്ത്രമായാണ് ഈ പുനരാരംഭത്തെ പ്രവാസികൾ കാണുന്നത്. സർവീസ് നിർത്തിവെച്ചതിലൂടെ കഴിഞ്ഞ കുറേ മാസങ്ങളായി യാത്രക്കാർ അനുഭവിച്ച കഷ്ടപ്പാടുകൾക്കെതിരെ സോഷ്യൽ മീഡിയയിൽ വലിയ പ്രതിഷേധമാണ് നടക്കുന്നത്. എയർ ഇന്ത്യ എക്സ്പ്രസിനെ ബഹിഷ്കരിക്കണമെന്ന ആഹ്വാനങ്ങൾ സജീവമാണെങ്കിലും നാട്ടിലെത്താൻ മറ്റ് മാർഗങ്ങളില്ലാത്തതിനാൽ പ്രവാസികൾ നിസ്സഹായരായി തുടരുകയാണ്.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL

ആഡംബര കാറുകളുമായി അഭ്യാസപ്രകടനം, വീഡിയോ വൈറൽ: പ്രവാസികളെ കയ്യോടെ പൊക്കി കുവൈത്ത് പോലീസ്

കുവൈത്ത് സിറ്റി: ജലീബ് അൽ ശുയൂഖിൽ ആഡംബര വാഹനങ്ങൾ ഉപയോഗിച്ച് റോഡിൽ അഭ്യാസപ്രകടനം നടത്തിയ ഏഷ്യൻ വംശജരായ യുവാക്കളെ കുവൈത്ത് ആഭ്യന്തര മന്ത്രാലയം (MoI) അറസ്റ്റ് ചെയ്തു. സോഷ്യൽ മീഡിയയിൽ ഇവരുടെ അഭ്യാസപ്രകടനങ്ങളുടെ വീഡിയോ വൈറലായതിനെ തുടർന്നാണ് അധികൃതർ നടപടി സ്വീകരിച്ചത്. കഴിഞ്ഞ ദിവസങ്ങളിൽ സോഷ്യൽ മീഡിയയിൽ പ്രചരിച്ച വീഡിയോയിൽ, ആഡംബര കാറുകൾ ഉപയോഗിച്ച് പൊതുനിരത്തിൽ അപകടകരമായ രീതിയിൽ വാഹനമോടിക്കുകയും മറ്റ് യാത്രക്കാർക്കും പൊതുജനങ്ങൾക്കും ഭീഷണിയാകുന്ന തരത്തിൽ സ്റ്റണ്ടുകൾ കാണിക്കുകയും ചെയ്യുന്നത് ദൃശ്യമായിരുന്നു. ജലീബ് അൽ ശുയൂഖ് മേഖലയിലാണ് ഈ നിയമലംഘനങ്ങൾ നടന്നതെന്ന് പോലീസ് കണ്ടെത്തി.

വീഡിയോ ശ്രദ്ധയിൽപ്പെട്ട ഉടൻ തന്നെ ജനറൽ ട്രാഫിക് ഡിപ്പാർട്ട്‌മെന്റിലെ സെക്യൂരിറ്റി കൺട്രോൾ വിഭാഗം അന്വേഷണം ആരംഭിച്ചു. വീഡിയോ ദൃശ്യങ്ങൾ പരിശോധിച്ച് വാഹനങ്ങളും ഡ്രൈവർമാരെയും തിരിച്ചറിഞ്ഞ പോലീസ്, ഇവരെ പിടികൂടുകയായിരുന്നു. പിടിയിലായവർ ഏഷ്യൻ വംശജരാണെന്ന് അധികൃതർ സ്ഥിരീകരിച്ചു. പിടികൂടിയ ഡ്രൈവർമാർക്കെതിരെ കടുത്ത നിയമനടപടികളാണ് മന്ത്രാലയം സ്വീകരിച്ചിരിക്കുന്നത്. ഇവരുടെ ആഡംബര വാഹനങ്ങൾ പോലീസ് പിടിച്ചെടുത്തു. ഗതാഗത നിയമങ്ങൾ ലംഘിക്കുന്നവർക്കും പൊതുജനങ്ങളുടെ ജീവന് ഭീഷണിയാകുന്ന രീതിയിൽ പെരുമാറുന്നവർക്കുമെതിരെ വിട്ടുവീഴ്ചയില്ലാത്ത നടപടികൾ തുടരുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി. റോഡുകളിൽ സുരക്ഷിതമായി വാഹനമോടിക്കണമെന്നും നിയമലംഘനങ്ങൾ ശ്രദ്ധയിൽപ്പെട്ടാൽ അധികൃതരെ അറിയിക്കണമെന്നും മന്ത്രാലയം പൊതുജനങ്ങളോട് അഭ്യർത്ഥിച്ചു.കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ  https://chat.whatsapp.com/Du8AGPEDfJfGa0vgu1h2fL